2 Crónicas 10

1Llapa Israel runakunan Shehemta rirqanku Roboamta reyta churanankupaq, chaymi Roboamqa Shehemta rirqan. 2Nabatpa churin Jeroboammi chayta yachaspa kutimpurqan. Payqa rey Salomonmantan Egiptoman ayqekapusqa, hinaspan chaypi tiyasharqan. 3Israel runakuna waqyachiqtinmi Jeroboamqa kutipurqan. Hinan llapan Israel runakunapiwan Roboamta rimaykuq rispa nirqanku: 4–Taytaykiqa sinchitan llank'achiwarqanku, chay hinaqa pisiyarichiyyá kay sasa llank'ayniykuta, sinchi sasa llank'ay churawasqankuta qechuriwayku, hinan ñoqayku servisqaykiku, nispa. 5Roboamtaq kutichirqan: –Ripuychis, minchha p'unchayña kutimunkichis, nispa. Chaymi runakunaqa kutipurqanku. 6Chaykamataq rey Roboamqa taytan Salomonpa yuyaychaqnin kurak runakunata tapukurqan: –Qankuna yuyaychawaychis, ¿ima nispan kutichisaq chay runakunaman? nispa. 7Hinan paykunaqa nirqanku: –Kay llaqtata serviyta munanki chayqa, allinta kutichiy sumaq simikunawan, hinan paykunaqa servishallasunkipuni, nispa. 8Roboamtaq ichaqa mana kasukurqanchu kurak runakunaq yuyaychasqanta, aswanpas payta serviq wiñaymasin waynakunata tapukurqan: 9–Qankuna yuyaychawaychis, ¿ima nispan kutichisaq chay runakunaman? Paykunan mañakuwarqanku taytaypa sasa llank'ay churasqanta pisiyachinaypaq, nispa. 10Hinan chay waynakunaqa kutichirqan: –Taytaykiq churasqan llank'ayta pisiyachinaykita mañakuq runakunamanqa kay hinata kutichiy: ¡Maki uña dedoymi aswan rakhu taytaypa wasanmantaqa! 11Payqa sasa llank'aytan kamachirqasunkichis, ñoqaqa aswan sasataraqmi llank'achisqaykichis. Payqa hasut'iwanmi soq'arqasunkichis, ñoqataq fierro khiskayoq hasut'iwanña soq'asqaykichis, nispa. 12Kinsa p'unchaymantataq rey Roboampa nisqanman hina Jeroboamqa llapan Israel runakunapiwan Roboamman asuykurqanku. 13Reytaq ichaqa kurak runakunaq yuyaychasqanta mana kasukuspa, k'arak simikunawan runakunaman kutichirqan. 14Chay waynakunaq yuyaychasqanta hap'ikuspan nirqan: –Taytaychus sinchi sasa llank'anata qorqasunkichis chayqa, ñoqaqa aswan sasataraqmi llank'achisqaykichis. Paychus hasut'iwan soq'arqasunkichis chayqa, ñoqaqa fierro khiskayoq hasut'iwanñan soq'asqaykichis, nispa. 15Señor Diosmi hunt'akunanta munarqan Silomanta profeta Ahiaswan Nabatpa churin Jeroboamman willachisqan simita, chaymi reyqa llaqtata mana uyarirqanchu. 16Llapan Israel runakunataq reypa paykunata mana uyarisqanta reparaspa nirqanku: –¡Manan imapas Davidwan ruwananchischu! ¡Manan Isaipa churinwan ima herenciapas phasminakunanchis kanchu! ¡Israel runakuna wasinchista ripusunchis! ¡Davidqa ayllullanpi kamachikuchun! nispa. Hinan Israel runakunaqa kaq rato wasinkuta ripurqanku. 17Judá suyu llaqtakunapi tiyaq Israel runakunatataq Roboamqa kamachishallarqanpuni. 18Chaymantataq Roboamqa mit'ani runakunaq umallin Adoramta Israel runakunaman kacharqan, paykunataq ichaqa rumiwan ch'aqespa Adoramta wañuchirqanku. Chaymi rey Roboamqa usqhaylla carretanman seqarqospa Jerusalenman ayqerqan. 19Chay p'unchaymantan Israel runakunaqa Davidpa ayllunwan churanakuqku.

will be added

X\