1 Samuel 9

1Benjamín ayllupin huk respetasqa qhapaq runa karqan Cis sutiyoq, taytantaq Abiel karqan, ñawpa taytankunataq Zeror, Becorat, Afiapiwan. 2Cispa churintaqmi karqan Saúl sutiyoq hatunkaray sumaq k'acha wayna, pay hinaqa manan pillapas Israel runakuna ukhupi karqanchu, llapan runatapunin hatun-kayninpi altonmanta qhawaykuq. 3Cispa china asnonkunan chinkarqorqan, hinan payqa churin Saulta nirqan: –Wawáy, phaway huk kamachita pusarikuspa asnonchiskunata maskhaq, nispa. 4Saultaq puririrqan Efrainpa orqon-orqonta, chaymantataq Salisa hap'iyninta rirqanku. Manapuni chaypipas kaqtintaq, Saalim hap'iyman rirqanku. Chaypipas manapuni tarispan Benjamín hallp'aman haykurqanku, chaypipas manallapunitaq tarirqankuchu. 5Hinaspan Zuf hap'iyman chayaspanku, Saulqa kamachinta nirqan: –Haku kutipusun, ñoqanchismantañataqmi asnomantaqa aswantaraq taytayqa llakikunman, nispa. 6Kamachitaq nirqan: –Ama ripusunraqchu, aswan haku Diospa profetanman. Payqa haqay llaqtapin tiyan, tukuy runaq reqsisqanmi kanpas. Payqa asnonchis maypichus kashasqantapas willawasunmanmi. Paypaqa tukuy ima nisqanpas hunt'akullanpunin, nispa. 7Saultaq kamachita nirqan: –Hakuyá, ichaqa, ¿imallatataq aparikusun Diospa profetanman qoykunanchispaqri? Manan wayaqaypi t'antanchispas kapunñachu, nispa. 8Hinan kamachiqa Saulta nirqan: –Kashanraqmi makiypi qolqe, chaytayá Diospa profetanman qoykusunchis purisqanchista sut'inchaykuwananchispaq, nispa. 9(Haqay p'unchaykunapin Dios tapukuq runakuna rimaqku, haku “Yuyayninpi rikuq” runaman nispanku, chay p'unchaykunapitaqmi profetakunata sutichallarqankutaq. “Yuyayninpi rikuq”, nispa). 10Hinan Saulqa nirqan: –Allinmi chhaynaqa, hakuyá, nispa. Pasarqankutaq profetaq tiyasqan llaqtaman. 11Chayman seqashaspankutaq unu aysakuq sipaskunawan tupaspa tapukurqanku: –¿Chaypichu “Yuyayninpi rikuq” kashan? nispa. 12Sipaskunataq paykunata nirqanku: –Arí, haqayneqpin kashan, riychis tariparqoychis, kunallanraqmi chayarqamun. Llaqta runakunan orqo patapi Dios yupaychana cheqaspi sacrificiota haywanqaku, chaymanmi hamusqa. 13Kunallan rispan taripankichis, sacrificio haywanaman manaraq wicharqoshaqtin. Chaypi kashaq runakunaqa paypa sacrificiota saminchanantaraqmi suyanqaku, chaymantaraqmi invitasqa runakunapas mikhunqaku, nispa. 14Paykunataq llaqtaman haykuspa Samuelta rikurqanku orqo pataman rispa paykuna ladoman hamushaqta. 15Saúl manaraq chayashaqtinmi, Samuelta Señor Diosqa nirqanña: 16–Paqarin kay horastan Benjamín ayllumanta huk runata kachamusqayki, paytan aceitewan hawiykunki Israel runakunaq reynin kananpaq. Payqa Filistea runakunamantan llaqtayta kacharichinqa, paykunaq mañakamuwasqantan uyarini, ñak'arisqankutataqmi rikuni, chaymi khuyapayani, nispa. 17Saulta Samuel rikurqoqtintaq Señor Diosqa nirqan: –Kaymi chay nisharqayki chay runaqa, paymi llaqtayta kamachinqa, nispa. 18Llaqta haykuna punkupi Samuel kashaqtintaq, Saulqa tapuykukurqan: –Wiraqocháy, ama hinachu kay, willaykuway maypin “Yuyayninpi rikuqpa” wasin, nispa. 19Samueltaq nirqan: –Ñoqan kani, hakuyá orqo patapi yupaychana cheqasman, chaypi mikhumusunchis. Tutamantaña ima munasqaykita tapukuwanki, willasqaykitaq, hinaspa ripunki. 20Ama llakikuychu kinsa p'unchayña chinkaq china asnomantaqa, ñan tarinkuña. Hinaspapas, ¿pitataq Israel runakunaqa sinchita munakunku? ¿Manachu qanta aylluykitawan? nispa. 21Saultaq nirqan: –¿Imanaqtintaq chay hinatari niwanki? Ñoqaqa kani Benjamín ayllumantan, kay aylluqa Israel suyupi llapa ayllukunamanta sinchi huch'uyllan, wawqeykunapas pisipaq qhawasqallan kanku, nispa. 22Hinan Samuelqa Saulta kamachintawan mikhunanku wasiman pusaykuspa tiyaykachirqan llapan kinsa chunkantinpa aswan allinnin tiyanapi. 23Samueltaq wayk'uqta nirqan: –Chay waqaychasqaykita kayman apamuy, nispa. 24Chaymi wayk'uqqa chakan aychata apamuspa, Saulpa mikhunanpaq churaykurqan. Samueltaq nirqan: –Kaytan waqaychapurqayki, ñoqan qanpaq waqaychachirqani kay invitasqa runakunawan kunanpuni mikhuykunaykipaq, nispa. Chay p'unchaymi Saulqa Samuelwan mikhurqan. 25Orqo patapi yupaychana cheqasmanta llaqtaman uraykamuqtinkutaq, wasi patapi Saulwan rimarqan. 26Tutallamantan hatarirqanku, Samueltaq wasi patapi kashaq Saulta waqyarqan: –Q'epichakullayña kacharparipunaypaq, nispa. Q'epichakuspataq Samuelwan kuskapacha lloqsirqanku. 27Llaqta hawakama rispankutaq Samuelqa Saulta nirqan: –Kamachiykita niy ñawpashananpaq, nispa. Kamachi ñawpariqtin hinataq, Samuelqa nirqan: –Qanqa qhepariyraq, Diospa niwasqantaraq sut'inchasqayki, nispa.

will be added

X\