1 Samuel 8

1Samuelqa machuyaykapuspanmi churinkunata Israel runakuna chaninchaqta churarqan. 2Kurak churinpa sutinmi Joel karqan, sullk'akaqpataq Abías karqan, Beerseba llaqtapin paykunaqa servirqanku. 3Ichaqa manan taytanku hinañachu ruwarqanku, aswanpas qolqe sonqo kaspankun lluk'iykusqata chaskikuqku, chaninchaytapas waqllichiqku. 4Chaymi Israel kurak runakunaqa huñuykunakuspa Ramá llaqtaman Samuelwan parlaq rirqanku. 5Hinaspan nirqanku: –Qanqa machuñan kapushanki, churiykikunapas manañan qan hinañachu ruwanku, chayrayku reyta churapuwayku, wakin suyukuna hina reyniyoq kanaykupaq, nispa. 6“Reyta qowayku” nisqankun ichaqa Samuelmanqa mana allinchu rikch'akurqan, chaymi Señor Diosmanta payqa mañakurqan. 7Señor Diostaq Samuelta nirqan: –Uyarillay llaqtaq mañakusqasuykitaqa, manan qantachu pisichasunki, aswanpas ñoqatan pisichawanku, manaña paykunaq reynin kanayta munaspanku. 8Egipto suyumanta horqomusqaymantapachan wak dioskunata yupaychaspanku saqerparipuwanku, kaqllataqmi qantapas ñoqata hina pisichasunkiku. 9Uyarillay mañakusqankuta, ichaqa anyaykuspa sut'itapuni willay imakunatachus reyqa paykunata ruwanqa chayta, nispa. 10Hinan Samuelqa rey mañakuqkunaman Señor Diospa nisqanta willarqan: 11–Munasqaykichis reyqa kay hinatan ruwasunkichis: Churiykichiskunatan soldadopaq apanqa, wakintan maqanakuy carretaman churanqa, wakintataq caballopi maqanakuqman, wakintataq carretanpa ñawpaqen phawaqman. 12Akllakullanqataq wakinta waranqa soldado kamachiqpaq, wakintataq phisqa chunka kamachiqpaq. Hinallataq chakmaqpaq, wakinta ichhuqpaq, wakintataq maqanakuypaq arma ruwaqpaq, wakintañataq carretaq imankunapas ruwaqpaq churanqa. 13Chay hinallataq ususiykichiskunatapas churanqa wayk'uqpaq, t'anta ruwaqpaq, q'apaq hawina wakichiqpaq ima. 14Uvas chakraykichismantapas, olivos chakraykichismantapas aswan allinnin kaqtan qechusunkichis, chay chakratataqmi oficialninkunaman rakiykunqa. 15Chakraykichispa ruruntapas uvasniykichistapas chunkamanta huknintan qopunkichis, kamachikuqninkunaman oficialninkunamanwan pagananpaq. 16Kaqllataqmi runa uywasqaykichiskunawan, allichachaq uywaykichiswan, asnoykichiswanpas ruwananta llank'achikunqa. 17Uywaykichismantapas chunkamanta huknintan qopunkichis, qankunapas paypa kamachillantaqmi kapunkichis. 18Chay hinata akllakusqaykichis rey ruwaqtinmi, qankunaqa Diosmanta waqyakuyta qallarinkichis, manañataqmi payqa uyarisunkichischu, nispa. 19Llapa runakunataq ichaqa Samuelpa nisqanta mana uyariqpas tukurqankuchu, aswanmi nirqanku: –¡Reyniyoq kaytapunin munayku! nispa. 20Wakin suyukuna hinan ñoqaykupas reyniyoq kasaqku, paymi kamachiwanqaku, maqanakuqpas ñawpaqeykuta lloqsispan maqanakamunqa, nispa. 21Samueltaq llaqtaq nisqanta llapallanta Señor Diosman willarqan. 22Hinan Señor Diosqa nirqan: –Mañakusqankuman hina reyta churay, nispa. Chaymi Samuelqa Israel runakunata nirqan: –Ripuychis llaqtaykichista, nispa.

will be added

X\