1 Samuel 7

1Quiriat-jearim llaqtamanta hamuspankutaq Señor Diospa arcanta apakampuspa Abinadabpa moqo patapi wasinman churapurqanku, chaypin churin Eleazarta ch'uyancharqanku, Señor Diospa arcanta qhawananpaq. 2Quiriat-jearim llaqtapin arcaqa unayta karqan, iskay chunka wata hina. Chay p'unchaykunapin Israel runakunaqa Señor Diosmanta mañakuspa waqapayarqanku. 3Samueltaq Israel runakunaman nirqan: –Tukuy sonqoykichismantachus Señor Diosman kutirikunkichis chayqa, Astarot diosakunata wak rikch'aykunatapas wikch'upuychis, hinaspa sonqoykichista wakichikuychis Señor Diosllataña yupaychanaykichispaq, hinan Señor Diosqa Filistea runakunamanta kacharichisunkichis, nispa. 4Chaymi Israel runakunaqa wikch'upurqanku Baal dioskunata Astarte diosakunatapas, hinaspa Señor Diosllataña yupaychapurqanku. 5Samueltaq Israel runakunata nirqan: –Mizpa llaqtaman huñukamuychis, Señor Diosmanta qankunapaq mañaykapunaypaq, nispa. 6Hinan Mizpa llaqtaman huñuykakamurqanku, unuta wisispataq Señor Diospa sutinpi hich'arqanku. Chay p'unchaymi ayunarqanku, chaypitaq rimarirqanku: Señor Dios contratapunin huchallikurqanchis, nispa. Samueltaq Mizpa llaqtapi Israel runakunata chanincharqan. 7Israel runakunaq Mizpapi huñukusqanta yachaspataq, Filistea runakunaqa wichamurqanku paykunawan maqanakuq. Chayta yachaspataq Israel runakunaqa paykunamanta mayta mancharikurqanku, 8chaymi Samuelta valekurqanku: –Ama samaykuspa Diosninchis Señor Diosmanta mañapuwayku Filistea runakunamanta amachaykuwanankupaq, nispa. 9Samueltaq ñuñuq ovejachata nak'aspa Señor Diospaq sacrificiota ruphachirqan, Israelta amachaykunanpaqtaq mañapurqan, chaymi Señor Diosqa mañakusqanta uyarirqan. 10Sacrificiota Samuel ruphachishallaqtinraqmi Filistea runakunaqa paykunaman asuykarqamurqanku phawaykunankupaq. Chay ratopachataq Señor Diosqa manchanata hanaq pachamanta kunununuchimurqan paykuna pataman, chaymi paykunaqa mancharikurqanku, chaykamataq Israel runakunaqa pasaqta atiparqanku. 11Hinan Mizpa llaqtamanta phawarqospa, Filistea runakunata qatipaspa wañurachirqanku Bet-car llaqtaq urankamaraq. 12Chaymantataq Samuelqa huk rumita hoqarispa Mizpa llaqtawan Sen llaqtawan tupaypi churaykurqan, sutichaykurqantaq “Yanapay Qaqata”: Kaykaman Señor Diosqa yanapaykamuwanchis, nispa. 13Chhaynapin Filistea runakunaqa atipasqa karqanku, manañataq Diosqa paykunata Israel suyuman kachaykurqanchu Samuelpa kawsasqan p'unchaykunapi. 14Filistea runakunaq llapan Israelmanta qechusqanku llaqtakunataq kutichisqa kapurqan Ecrón llaqtamanta Gat llaqtakama, chay hinapin Israel runakunaqa wakmanta qechukapurqanku llapan hallp'ankuta. Hinallataq Israel runakunaqa Amor runakunawanpas sumaqta kawsarqanku. 15Samuelqa tukuy kawsasqan p'unchaykunapin Israelta kamachirqan. 16Sapa watataq watukuq rispa muyumuq Betel llaqtata, Gilgal llaqtata, Mizpa llaqtatawan, chaykunapin Israel runakunata kamachimuq. 17Chaymantataq kutimpuq Ramá llaqtapi wasinman, hinaspan chaypipas kamachillarqantaq. Samuelqa chaypin Señor Diospaq altarta ruwapurqan.

will be added

X\