1 Samuel 6

1Señor Diospa arcantaq Filistea runakunaq suyunpi qanchis killa kamurqan. 2Chaymantataq Filistea runakunaqa waqyachimurqanku llapan sacerdotenkunata watuqninkunatawan: –¿Imatataq ruwasun Señor Diospa arcanwan? Willawayku imaynatachus maypichus kasqanman kutichipunanchista, nispanku. 3Chaymi paykunaqa nirqanku: –Israel runakunaq Diosninpa arcanta kutichipuyta munankichis chayqa, ama mana imayoqtaqa apachipuychischu, aswanpas huchaykichis pampachachiq regalotawan kutichipuychis. Chhaynapin qhaliyankichis, yachankichistaq imamantachus sinchita Dios ñak'arichisqasuykichista, nispa. 4Paykunataq nirqanku: –¿Ima regalotataq apachisunmanri? nispa. Hinan paykunaqa kutichirqanku: –Phisqa umallikunataq llaqtanchispi kanku chayqa, chayman hina ruwaychis phisqa qori ch'uputa phisqa qori huk'uchatawan, chay kikin onqoyllawan ñak'arisqaykichisrayku. 5Chay hinaqa, ruwarqoychisyari ch'upuykichis kasqallanta, hallp'aykichis q'aruq huk'uchatapas kasqallantataq, hinaspataq Israelpa Diosninta hatunchankichis, ichapaschá Diosqa manaña phiñakuspa muchuchisunkichismanchu qankunatapas, diosniykichistapas, hallp'aykichistapas. 6Amayá qankunaqa sonqoykichista rumiyachiychischu Egipto runakunapas rey Faraonpas rumiyachikurqan hinataqa. Paykunatapas Diosqa imaymanawanmi ñak'arichirqan, chayraqmi Israel runakunata kacharimurqanku. 7Kunanqa mosoq carretata ruwarqoychis, chaytataq iskay uñayoq wakakunaq waqranman yugowan wataykuspa aysaykachinkichis, uñantataq waka kanchaman wisq'amunkichis. 8Hinallataq Señor Diospa arcantapas carretaman churaykunkichis, ladonmantaq huchaykichismanta regalota huk cajonchapi churaykunkichis, hinaspa ripunanpaq qatirparipunkichis. 9Chaytataq makilla qhawankichis. Bet-semes llaqta ñannintachus rinqa chayqa, chaypin yachasun Israelpa Diosninpuni kay ñak'ariyta churamusqanta, mana chayqa yachallasuntaqmi mana Diospa phiñakuyninchu, aswanpas yanqa onqoylla kasqanta, nispa. 10Nisqanman hinapunitaq paykunaqa carretata uñayoq iskay wakakunaman wataykurqanku, uñakunatañataq waka kanchaman wisq'amurqanku. 11Hinaspan Señor Diospa arcanta carretaman churaykurqanku, qori huk'uchakunayoq qori ch'upuyoq cajonchatataq arcatawan kuska churaykullarqankutaq. 12Wakakunataq Bet-semes llaqta ñannintapuni puririykapurqanku, mana maymanpas q'ewirispa cheqanllata rirqanku waqaykukuspa. Filistea runakunataq qhepanta qatipamurqanku Bet-semes llaqta qorpakama. 13Bet-semes llaqta runakunataq trigota wayq'opi ichhusharqanku, qonqay qhawarispataq arcata rikurqospa kusikurqanku. 14Carretataq chayamurqan Bet-semes llaqtapi Josuepa chakran pataman, hinaspan sayarparirqan hatun qaqaq kasqan cheqaspi. Ichhuqkunataq carretaq k'ullunta p'akirqarispa aysamuqnin wakakunata Señor Diosman haywaspa ruphachirqanku. 15Leví runakunan Señor Diospa arcanta apaqarqanku qori regaloyoq cajonchatawan, hinaspataq qaqa pataman iskayninta churarqanku. Chay kikin p'unchaymi Bet-semes llaqta runakunaqa Señor Diosman ruphachina sacrificiokunatawan sumaq kawsay sacrificiokunatawan haywarqanku. 16Chayta rikuspataq Filistea phisqantin umallikunaqa kikin p'unchaypacha Ecrón llaqtakama kutipurqanku. 17Filistea runakunaq Señor Diosman huchankumanta regalamusqanku qori ch'upukunataq karqan phisqantin llaqtakunamanta hukkama: Asdodmanta, Gazamanta, Ascalonmanta, Gatmanta, Ecronmantawan. 18Kaqllataq qori huk'uchakuna regalasqankupas karqan llapan phisqantin umalli runankunaq allin perqasqa llaqtankumanta llaqtachankumantawan. Señor Diospa arcan churasqanku qaqaqa Josuepa chakran Bet-semes llaqtapi kashallanpunin. 19Diosmi Bet-semespi runakunata wañurachirqan paypa arcan ukhuta qhawaykusqankumanta, hinaspan wañurarqanku phisqa chunka waranqa runayoq llaqtapi qanchis chunka runakuna. Chaymi llaqtallantin runakunaqa khuyayta waqaykurqanku Señor Diospa runakunata wañurachisqanmanta. 20Paykunaqa ninakurqankun: –¿Piñataq kanman ch'uya Señor Diospa ñawpaqenman chimpaykuqqa? ¿Maymanpunitaq apachisun kay arcantari? nispa. 21Hinaspan Quiriat-jearim llaqtaman willaqta kacharqanku: –Filistea runakunan Señor Diospa arcanta kutichimpusqaku, hamuychis apakampuq, nispanku.

will be added

X\