1 Samuel 5

1Filistea runakunataq Diospa arcanta qechurqospa “Yanapay Qaqa” nisqa cheqasmanta Asdod llaqtakama aparqanku. 2Chaypin Diospa arcantaqa Dagón diosninkuq wasinman apaykuspa, chaypa ladonman churaykurqanku. 3Qhepantin paqar hamuspankutaq, Asdod runakunaqa Dagón diosninkuta pampaman uyayuqta tarirqanku, Diospa arcanpa ñawpaqenpi wikch'urayashaqta. Wakmanta hoqarispataq maychus kasqanman churapurqanku. 4Qhepantin paqar hamunankupaqtaq, wakmanta Dagón diosninkuqa Diospa arcanpa ñawpaqenpi chawpi cuerpollanña wikch'urayapushasqa, umanwan iskaynin makinwantaq punku sarunapi kapushasqa. 5Chaymi chay p'unchaymantapacha chay punku haykunataqa manaña saruykurqankuchu Dagonpa sacerdotenkunapas haykuq runakunapas. 6Chaymantataq Señor Diosqa Asdod llaqtapi runakunata llaqta muyuriqpi runakunatawan ñak'arichispa, ch'upu onqoywan hap'ichirqan. 7Chayta rikuspan paykunaqa nirqanku: –Amaña ñoqanchiswan kachunñachu Israelpa Diosninpa kay arcanqa, chaymi ñoqanchistapas Dagón diosninchistapas ñak'arichishawanchis, nispa. 8Hinaspan Filistea umallikunata waqyachirqanku rimanakunankupaq, nirqankutaq: –¿Imanasunmi Israel runakunaq Diosninpa kay arcanta? nispa. Paykunataq nirqanku: –Gat llaqtaman aparqapusun, nispa. Hinan apapurqanku. 9Chayta apaqtinku hinataq Señor Diosqa Gat llaqtata llaksarqan hatuntapas huch'uytapas ch'upu onqoywan ñak'arichispa. 10Chaymantataq Diospa arcantaqa Ecrón llaqtaman aparqanku, chayman chayarqochiqtinku hinataq, chay llaqta runakunaqa qaparirqanku: –¡Israel runakunaq Diosninpa arcantan aparqamuwanchis llaqtantinta wañurachiwananchispaq! nispanku. 11Chaymi paykunaqa Filistea umallikunawan huñunakuspanku nirqanku: –Kasqanta apachipuychis maychus kasqanman Israel runakunaq Diosninpa arcanta, amaña ñoqanchistapas llaqtanchispi runatapas wañuchiwananchispaq, nispa. Paykunaqa Diospa ñak'arichisqanwanmi llaqtallantin wañuypa llaksasqan kasharqanku. 12Mana wañuqkunapas ch'upuwan k'iriykusqan karqanku, qaparkacharqankutaq hanaq pachaman uyarikuqtaraq.

will be added

X\