1 Samuel 30

1Kinsa p'unchaymantañan Davidqa runankunantin Siclag llaqtaman chayarqanku, chaykamataq Amalec runakunaqa Neguev ch'inneqninta phawaykuspa Siclag llaqtata llat'anarqospa kanaykusqaku. 2Hinallataq warmikunata, wawakunata, qharikunatapas, chaypi kaqkunata presota apasqaku, mana pitapas wañuchispa. 3Runankunantin David chayamuspankutaq llaqtata ninawan kanaykusqata tarirqanku, warmikunatapas lliw wawakunatapas presota aparikapusqaku. 4Chaymi qaparispa waqararqanku kallpankuq chiriyanankamaraq. 5Davidpa iskaynin warminkuna Jezreel llaqtayoq Ahinoamta, Carmel llaqtayoq Nabalpa viudan Abigailtapas apallasqakutaq. 6Soldadokunapas llapallanku wawankumanta phutisqa kaspanku Davidta ch'aqeyta yuyaykusharqanku, chaymi Davidqa sinchi llakisqallaña kaykusharqan. Chaytukuypiwanpas payqa Diosnin Señor Diosllapin kallpachakusharqan. 7Chaymi Ahimelecpa churin Abiatarta nirqan: –Ama hinachu kay, Diospa munaynin tapuna Urimniyoq Tumimniyoq unkuta aparqamuway, nispa. Abiatartaq unkuta Davidman aparqamurqan, 8hinan Davidqa Señor Diosta tapuykurqan: –¿Chay llat'anaq suwakunata qatipasaqchu? ¿Atiymanchu taripayta? nispa. Señor Diostaq nirqan: –Qatipay, taripaspaykin apasqakunata qechumunki, nispa. 9Chaymi Davidqa kaq ratopacha soqta pachak runankunantin puririrqan, Besor ukhu wayq'o pataman chayaspataq chaypi wakin qhepakurqanku. 10Davidtaq tawa pachak runallantinña chay wayq'ota chimparqan, iskay pachak runataq qhepakapurqanku, wayq'ota mana chimpayta atispanku, sinchi sayk'usqa kasqankurayku. 11Ñan purisqanku pampapitaq Egipto suyu waynata tarirqanku. Paytataq Davidman pusarqorqanku, hinaspan mikhunata ukyanata qorqanku. 12Qollarqankutaq higos k'umpa phasmita, iskay k'umpa pasastawan. Chaykunata mikhuykuspataq Egipto suyu waynaqa chayraq kallpacharikurqan, kinsa p'unchay kinsa tutaña mana ima mikhusqa ukyasqa kasqanmanta. 13Chaymantataq Davidqa tapuykurqan: –¿Pin uywaqeyki? ¿Maymantan hamushanki? nispa. Waynataq kutichirqan: –Egipto suyumantan kani, Amalec runaq kamachin, ichaqa onqosqa kaqtiymi kinsa p'unchayña uywaqey wikch'upuwarqan. 14Ñoqaykuqa rirqayku llat'anaqmi Neguev ch'inneqpi tiyaq Ceret runakunata, Judapi wakin runakunata, Neguev ch'inneqpi tiyaq Calebpa mirayninkunatawan, hinallataq Siclag llaqtatapas ninawan kanaykamurqayku, nispa. 15Hinan Davidqa tapuykurqan: –¿Chay llat'anaq t'aqaman pusarqowankimanchu? nispa. Egipto waynataq kutichirqan: –Arí, paykunaman pusarqosqaykin, ichaqa juray Diospa sutinpi ama wañuchiwanaykipaq, amallataq uywaqeymanpas hap'iykachiwanaykipaq, nispa. 16Llat'anaqkunaq kasqanman pusarqoqtintaq, chay runakunaqa hinantin pampapi ch'eqeykusqa mikhushasqaku, ukyashasqaku, tusushasqaku ima, llapan Filistea hallp'amanta Judá hallp'amantawan llat'anaykusqankumanta. 17Hinan Davidqa qhepantin paqar chayllaraq illarimuymantapacha wañurachiyta qallarirqan ch'isiyaqnintin. Tawa pachak camellopi sillaykusqa waynakunallañan ayqerikuyta atirqanku. 18Chay hinatan Davidqa Amalec runakunaq llapan apasqankunata qechukampurqan, iskaynin warminkunatapas pusakampullarqantaq. 19Llat'anasqanku runamantapas wawamantapas kaqninkunamantapas lliw imapas llapallanmi kashasqa, llapallantan Davidqa apakampurqan. 20Chaymantapas Davidqa hap'illarqantaq ovejakunata wakakunatapas, chaykunatataq qatimurqanku: Davidpa tarikamusqan uywan, nispanku. 21Hinaspan Davidqa kutimpurqan chay iskay pachak runakunaq kasqanman, paykunaqa sinchi sayk'usqa kaspan mana riysispa Besor ukhu wayq'o patallapi qhepakurqanku. Chaymantan Davidman runankunamanwan napaykuq tariparqanku, Davidtaq paykunaman qayllaykamuspa sumaqta napaykurqan. 22Davidwan riq runakunamantan karqanku wakin millay mana chanin runakuna, paykunan nirqanku: –Manan imatapas qokunmanchu llat'anasqa apakamusqanchismantaqa mana riysiwaqninchiskunamanqa. Wawankuta warmillankutawan hap'ikapuchunku, hinaspa ripuchunku, nispa. 23Niqtinmi Davidqa paykunata nirqan: –Wawqeykuna, kaytaqa ama ruwaychischu Señor Diospa llapan qoykuwasqanchiswanqa, paymi kawsayninchistapas waqaychaqqa, chay llat'anaqninchis suwakunatapas hap'iykachiwaqninchisqa. 24Chay hinata niqtiykichisqa, ¿pitaq “allinmi” ninman? Phasminakusunchis chayqa, llapallan kaqtakama chaskisunchis, q'epi qhawaqpas, maqanakuyman riqpas, nispa. 25Chay p'unchaymantan unanchakurqan chay chaninchanakuy Israel llaqtaq ruwananpaq. 26Siclag llaqtaman chayaspataq Davidqa Judapi kurak runakunaman llat'anamusqankumanta wakinninta apachirqan: Kayqa qankunapaq huk qokuy, Señor Diospa awqankunamanta qechumusqaykuq wakinnin, nispa. 27Chaytan apachirqan Betel llaqtapi kaqkunaman, Neguevpi kaq Ramot llaqtamanpas, hinallataq Jatir llaqtaman, 28Arad llaqtaman, Sifmot llaqtaman, Estemoa llaqtaman, 29Rahal llaqtaman, Jerameelpa miraynin llaqtakunaman, Cen runakunaq llaqtankunaman, 30Horma llaqtaman, Borasán llaqtaman, Atac llaqtaman, 31Hebrón llaqtamanpas. Runankunantin purimusqanku llapan llaqtakunamanmi apachirqan.

will be added

X\