1 Filistea umallikunataq llapan soldadokunantin Afec llaqtapi huñuykukurqanku, Israel soldadokunataq Jezreel llaqta pukyu patapi karpakuspa kasharqanku. 2 Filistea ejército umallikuna pachak-pachak t'aqawan waranqa-waranqa t'aqawan pasashaqtinkun, qhepallataña Aquiswan Davidpas soldadonkunantin hamushallarqantaq. 3 Chaymi ejército umallikunaqa Aquista tapuykurqanku: –¿Imatan munan kay Hebreo runakuna? nispanku. Hinan Aquisqa nirqan: –Israelpa reynin Saulpa oficialnin Davidmi kayqa, unayñan ñoqawan tiyakushan, manataqmi ima mana allintapas kunankama ruwanchu, nispa. 4 Hinan Filistea ejército umallikunaqa Aquista phiñarikuspa nirqanku: –¡Kachapuy kay runata maypichus tiyachisqaykiman! Ama ñoqanchiswan maqanakuyman richunchu. Kuskan maqanakuypichá awqanchis tukunman, hinaspataq soldadonchiskunaq umankuta qhoruspa reyninwan chaskichikuspa munaykachikapunman. 5 ¿Manachu kayqa David, tususpapas takirqanku: Saulmi waranqa runata wañuchimun, Davidtaq chunka waranqa runata wañuchimun, nispa? nispanku. 6 Chaymi Aquisqa Davidta waqyarispa nirqan: –Señor Diosmi yachan qanqa hunt'aq runa kasqaykita. Ñoqapaqqa may allinmi maqanakuyman rinaykiqa kakushan, manan tarinichu ima mana allintapas ñoqawan purisqaykipi hamusqaykimantapacha kunankama. Ejército umallikunapaqmi ichaqa mana allinchu kanki. 7 Chayrayku, aswan kutikapullay kusisqalla, paykunata ama phiñachinanchispaq, nispa. 8 Davidtaq Aquista nirqan: –¿Ima mana allintataq ñoqari ruwarqani? ¿Ima mana allin ruwasqaytataq tarinki qanwan kasqay p'unchaykunapi? ¿Chaytaq mana awqaykiwan maqanakuymanchu? nispa. 9 Chaymi Aquisqa nirqan: –Ñoqapaqqa kusapunin kanki Diospa angelnin hinaraq, ichaqa Filistea ejército umallikunan mana munankuchu maqanakuyman ñoqaykuwan rinaykita. 10 Chayrayku, qanpas qanwan hamuq Saulpa kamachinkunapas paqarin kutipunkichis chayraq illarimushaqtin, nispa. 11 Chaymi Davidqa runankunallantin paqarisnintin ripurqanku Filistea suyuman, Filistea soldadokunataq Jezreel llaqta cheqasman wicharqanku.
