1 Chay p'unchaykunataq Filistea runakuna Israel runakunawan maqanakunanpaq soldadonkunata huñuykusharqan. Chaymi Davidta Aquisqa nirqan: –Maqanakuymanmi kunan qanqa ñoqawan rinki runaykikunapiwan, nispa. 2 Davidtaq nirqan: –Kusa allinmi, kunanmi qan yachanki imatachus kamachiyki ruwasaq chayta, nispa. Aquistaq payta nirqan: –Chay hina kaqtinqa, ñoqa kikiyta waqaychaqpa umallintan pasaqpaq churasqayki, nispa. 3 Samuelqa wañupurqanñan, hinan kikin Ramá llaqtanpi p'ampapurqanku, Israel runakunataq waqayta tukurqankuña. Saulqa llapan watuqkunatan wañusqakunaq almanta tapuspa rimachiqkunatan Israel suyumanta wikch'usqa. 4 Chaykuna qhepatataq Filistea runakunaqa huñuykukuspa hatarimurqanku, hinaspan Sunem llaqtapi karpakurqanku. Kaqllataq Saulpas Israel runakunantin huñuykunakuspa lloqsillarqantaq Gilboa orqoman karpakuq. 5 Filistea soldadokunata rikurqospataq Saulqa pasaqta mancharikuspa sonqonpi muspharqan. 6 Chaymi payqa Señor Diosta tapuykurqan, Señor Diostaq payta mana ima nirqanpaschu, manapunin mosqoyllapipas, Urimnintapas, profetakunaq siminwanpas kutichimurqanku. 7 Hinan payqa oficialninkunata nirqan: –Pasaychis, wañusqakunaq almanta tapuspa rimachiq warmita maskhamuychis, paywan ñoqa tapuchikunaypaq, nispa. Chaymi oficialninkunaqa kutichirqan: –Kanmi Endor llaqtapi huk warmi, nispa. 8 Hinan Saulqa chay tutapacha wak p'achawan churarqokuspa iskay runantin chay warmiqta rirqan, hinaspa nirqan: –Ama hinachu kay, watuykapuway, chayachimpuwaytaq mayqen wañusqatachus munasaq chayta, nispa. 9 Warmitaq payta nirqan: –Qanmi aswan allinta yachanki, kay llaqtamanta llapan watuqkunata wañusqakunaq almanta tapuspa rimachiqkunatawan Saulpa wikch'usqanta. ¿Imaraykutaq hamuwanki? Icha, ¿wañunaytachu munanki? nispa. 10 Chayta niqtinmi Saulqa jurarqan: –Señor Diosmi yachan, manan ima mana allinpas kasunkichu, nispa. 11 Warmitaq payta nirqan: –¿Pitan munanki chayachimunayta? nispa. Chaymi payqa nirqan: –Samueltan, nispa. 12 Warmitaq Samuelta rikurqospa manchayta qaparirqan, Saultataq nirqan: 13 –¿Imapaqmi q'otuwanki? ¡Qanqa Saulmá kashasqanki! nispa. Chaymi rey Saulqa nirqan: –Ama mancharikuychu. ¿Imatan rikurqonki? nispa. Warmitaq nirqan: –Diosta hinan hallp'amanta suchurqamushaqta rikurqoni, nispa. 14 Saultaq tapuykurqan: –¿Imaynataq kasqari? nispa. Warmitaq nirqan: –Huk yuyaqmi capanwan p'istuykusqa, nispa. Chaymi Saulqa entienderqan Samuel kasqanta, hinaspan qonqoriykukurqan, pampakamaraq uyanpas tuparqan. 15 Samueltaq payta nirqan: –¿Imanaqtinmi samakushaqta hatarichimuwanki hamunaypaq? nispa. Saultaq nirqan: –Ñoqan sinchi phutisqa kashani, Filistea soldadokunan hatarimunku ñoqawan maqanakuq, Diospas saqerparipuwanmi, manapunin kutichimuwanchu profetakunaq siminwanpas mosqoypipas. Chayraykun qanllataña waqyachikamuyki ima ruwanaytapas willaykuwanaykipaq, nispa. 16 Samueltaq payta nirqan: –¿Imapaqñataq ñoqatapas tapukuwankiri? Señor Diospas manaña uyarishaqtin, awqaykiñataq kanpas chayri. 17 Señor Diosmi ñoqawan willachirqasunki qanmanta rey-kayniykita qechupuspa puriqmasiyki Davidman qoykapunanta, chaymi kunan hunt'akushan. 18 Qanqa manan Señor Diosta kasurqankichu: Amalec runakunata ch'usaqyachimuy, nishaqtinpas, chayraykun Señor Diosqa kayta ruwashasunki. 19 Hinaspapas Señor Diosmi Israel runakunata qantawan Filistea runakunaman hap'iykachinqa. Paqarinmi qanpas churiykikunapas ñoqawan kankichis, hinallataq Señor Diosqa Filistea runakunawan Israel soldadokunata atipachinqa, nispa. 20 Saultaq kaq ratopacha pampa qhawantin kumpakapurqan, Samuelpa nisqankunamanta llakikuspa yuyayninraq chinkarqan, manataq kallpanpas karqanñachu, chay kikin p'unchay tutantin mana imallatapas mikhusqanrayku. 21 Chaymantataq warmiqa Saulman chimpaykurqan, pasaq llaksasqallaña kashasqanta reparaspataq nirqan: –Kayqa niwasqaykita ruwani, wañuytapas mana manchakusparaq kamachiwasqaykita kasuyki. 22 Qantapas valekuykin nisqayta uyariwanaykita. Kunan mikhunata aparqamusqayki chayta mikhuykunki, chaywan kallpachaykukuspa ripunaykipaq, nispa. 23 Saultaq ichaqa mana mikhuyta munarqanchu. Oficialninkunataq chay warmipiwan mat'iykurqanku mikhunanpaq, chayraqmi kasuspa tiyarirqan, hinaspa puñuna patapi tiyaykurqan. 24 Chaykamataq warmiqa wira torillonta nak'arqochirqan, hak'umantataq mana qonchuyoq t'antata ruwarqorqan. 25 Hinaspan warmiqa Saulman oficialninkunamanwan aparqamurqan mikhunankupaq, paykunataq mikhuykuspanku chay tutapacha ripurqanku.
