1 Zif llaqtayoq runakunan Saulman willaq Gabaa llaqtakama rispa nirqanku: –Davidmi pakakushan Jeshimonpa chimpan Haquila orqopi, nispanku. 2 Chaymi Saulqa David maskhaq Zif ch'inneqman puririrqan Israelmanta kinsa waranqa allichachaq qharikunantin. 3 Chayman chayaspan karpakurqanku llapanku Jeshimonpa chimpan ñan pata Haquila orqopi. Davidtaq chay ch'inneqpi kashaspa repararqan Saulpa chaykama qatipamusqanta, 4 chaymi qhamiyaqkunata kachamurqan Saulpunichus hamusqa chayta reqsinankupaq. 5 Hinaspan Davidqa Saulpa karpakusqanman usqhaylla rirqan, chaypitaq allinta qhawararqan may cheqaspichus Saulpa puñusqanta ejercitonpa umallin Nerpa churin Abnerpa puñusqantawan. Saultaq qorpachakusqankupipuni puñushasqa soldadonkuna chawpipi. 6 Chaymi Davidqa tapuykurqan Sarviaq churin Joabpa wawqen Abisaita Het runa Ahimelectawan: –¿Mayqenniykichismi ñoqawan riwaqchis Saulpa karpakusqanman? nispa. Abisaitaq nirqan: –Ñoqa riysisqayki, nispa. 7 Chay tutapachataq Davidqa Abisaipiwan karpakusqankuman rirqanku, Saultan tarirqanku pampapi puñushaqta. Sawnanan qayllapitaq lanzanqa pampaman sat'iykusqa sayasharqan, muyuriqninpitaq Abnerqa soldadonkunapiwan puñusharqanku. 8 Hinaspan Davidta Abisaiqa nirqan: –Kayqa awqaykita Diosninchis hap'iykachisunkin. Kunanqa ñoqalla lanzanwan hukpaqkamallaña pampaman mana ñak'arichispa sat'irqapusaq, nispa. 9 Davidtaq ichaqa nirqan: –Ama wañuchiychu. ¿Pitaq Señor Diospa akllakusqan reyta wañuchispa mana huchachasqari qhepakunman? 10 Señor Diosmi yachan, paymi kawsay qechuqqa, onqoypipas maqanakuypipas. 11 Ñoqataqa Señor Dios waqaychawachun paypa akllakusqan contra huchallikunaymanta. Aswanpas lanzanta unu jarrontawan aparikuspa hakuchis, nispa. 12 Chay hinatan Davidqa Saulpa sawnananpi lanzanta unu jarrontawan hoqarispa aparikurqan. Manataq pillapas paykunata rikurqanchu uyarirqanpaschu, manallataq rikch'arirqankupaschu. Llapallankun puñusharqanku Señor Diosqa paykunata misk'ita puñuchisqanrayku. 13 Chaymanta pasapuspataq Davidqa wayq'o chimpa orqo patamanta sayaykamurqan, Saulpa kasqanmantaqa karuraqmi karqan. 14 Hinaspataq Davidqa kunkayoqta waqyamurqan Nerpa churin Abnerta soldadonkunatawan: –¡Yaw, Abner, uyariway! nispa. Abnertaq nirqan: –¿Pitaq qanri kanki reyta waqyamunaykipaqri? nispa. 15 Niqtinmi Davidqa nirqan: –¿Pitaq qan hina Israelpi? ¿Manachu qan qhari kanki? Chayri, ¿imanaqtintaq reytari mana cuidankichu, huk runa reyman wañuchiy yuyaywan haykumushaqtinri? 16 Chay ruwasqaykiqa manan allinchu, Señor Diosmi yachan, qankunaqa llapaykichismi wañuchinapaq kankichis, Señor Diospa akllakusqanta mana cuidasqaykichismanta. ¿Kunanri maytaq reypa unu jarronpas sawnananpi kashaq lanzanpas? nispa. 17 Davidpa kunkanta reqsirqospataq Saulqa nirqan: –¿Manachu waway Davidpa kunkayki chayqa? nispa. Chaymi Davidqa nirqan: –Arí, ñoqaqpunin, reyníy. 18 Qanrí, ¿imanaqtintaq khaynata kamachiykita qatiykachawanki? ¿Imatapunitaq ruwarqani? ¿Ima huchaytan ñoqapi tarinki? 19 Kunanmi valekuyki, reyníy, kay kamachiykita uyariykuwanaykita. Señor Dioschus tanqarisunki ñoqata qatiykachawanaykipaq chayqa, may kusachá kanman, sumaq kawsay sacrificiowanqa tukukapunmanmi. Runakunataqchus tanqarisunki chayqa, paykunataqa Señor Diospuni ñakachun, ñoqata Señor Diospa hallp'anmanta wikch'uwaspanku: Wak dioskunata servimushachun, niq hina qarqowasqankumanta. 20 Ama Señor Dios munachunchu paymanta karupi wañunayta. ¿Imaraykun, reyníy, piki maskhaq hina otaq p'isaqa maskhaq hinaraq maskhawanki orqon-orqonta? nispa. 21 Hinan Saulqa kutichirqan: –Wawalláy David, reqsikunin huchallikusqayta, mana yuyayniyoq hina purispaymi hatuntapuni pantasqani. Chhaynaqa, kutimpuy, manan kunanmantaqa mana allinniykita maskhasaqñachu, kunan p'unchay kawsayniyta khuyapayaykuspa mana wañuchiwasqaykimanta, nispa. 22 Chaymi Davidqa nirqan: –Reyniy, kaymi lanzayki kashan, huk soldadoykita kachamuway apachimpunaypaq. 23 Señor Diostaq sapankaman kutichipuchun cheqaq kasqanman hina, hunt'aq kasqanman hina. Hinaña Señor Dios qanta makiyman hap'iykachiwashaqtinpas, manan ñoqaqa munarqanichu qan reyniyta wañuchiyta Señor Diospa akllasqan kaqtiyki. 24 Imaynan kunan kawsayniykita khuyapayasqayman hina Señor Diospas khuyapayawaspa tukuy llakikuymanta horqowachun, nispa. 25 Saultaq nirqan: –Wawalláy, David, qanqa saminchasqapunin kanki. Tukuy ruwasqaykipipas qanqa ñawpaqmanpunin rinki, nispa. Niykuspataq wasinta kutipurqan, Davidpas ñanninta ripurqan.
