1 Samuelmi wañukapurqan, hinan llapan Israel runakunaqa huñuykukuspa llakisqa waqararqanku, Ramá llaqta wasinpitaq p'ampapurqanku. Chaymantataq Davidqa Parán ch'inneqta ripurqan. 2 Maón llaqtapin tiyarqan huk qhapaq runa, kinsa waranqa ovejayoq waranqa cabrayoq. Rutuy tiempopin ovejankunata rutuchisharqan Carmel llaqtapi, chaypi qhatunayoq rantinayoq kaspa. 3 Chay runan Caleb miraymanta karqan Nabal sutiyoq, payqa millay phiña uyayoq runan karqan maqllaraqtaq. Warmin Abigailñataq ichaqa allin yuyayniyoq munay rikch'ayniyoq sumaq warmi karqan. 4 Ch'inneqpi kashaspan Davidqa yacharqan Nabalpa oveja rutuchishasqanta, 5 chaymi payqa chunka runankunata kacharparimuspa nirqan: –Carmel llaqtatan Nabalpata rinkichis, sutiypin napaykunkichis. 6 Ninkichistaq: Q'aya wata kunan hinapas aswan allinraq kapusunki, wawaykikunapaqpas, wasiykipi lliw kaqkunapaqpas. 7 Kunantaqmi yacharqoni oveja rutuchiypi kashasqaykita, qanpas yachankiñan michiqniykikunaq ñoqaykuwan Carmelpi kasqanta. Ñoqaykuwan paykuna kashaqtinkuqa manan imallantapas qechuchirqaykuchu manallataq imanachirqaykupaschu. 8 Munaspaqa michiqniykikunata tapuy, paykunan aswan allintaqa willasunki. Chayrayku, qanta valekuyki, kay waynaykunata allillanta qhawaripuwanki, allin horasllapitaqmi hamushankupas. Kunantaqyá ima atisqallaykita paykunaman qoykapuway, ñoqapas churiyki hinan kani nispa, nispaykichis. 9 Davidpa runankunataq rispanku Nabalpaman chayaspa payman willarqanku Davidpa nisqankunata, hinaspan suyaykurqanku imatachus kutichinanta. 10 Waynakunatataq Nabalqa phiñarikurqan: –¿Pitaq Isaipa churinri? ¿Pitaq Davidri? Kunanqa askhan sapa p'unchay patronninkumanta chinkakuqkunaqa kashan. 11 ¿Imaynataq ñoqari qoyman rutuqniykunapaq wayk'uchikusqay mikhunata, ukyanata, aychatapas mana reqsisqay mana yachasqay runamanri? nispa. 12 Hinan waynakunaqa ñanninkuta kutipurqanku, chayaspataq Davidman Nabalpa nisqanta llapanta willarqanku. 13 Chaymi Davidqa runankunata nirqan: –Hakuchis espadaykichista apakuychis, nispa. Hinan runakunaqa chumpirqarikuspa espadankuta aparikurqanku, kaqllataq Davidpas. Paywan riqkunataq tawa pachak qharikuna karqan, wakin iskay pachaknintaq q'epita qhawaspa qheparqanku. 14 Nabalpa runankunaq hukkaqnintaq chay uyarisqanta Nabalpa warmin Abigailman willarqorqan: –Davidmi kachamusqa waynankunata wiraqocha napaykuqta, paytaqmi millayta phiñarikuspa kutichin. 15 Chay runakunaqa sumaqllañan ñoqaykupaqqa karqan, campopi paykunawan tiyamushaqtiykupas manan imaykutapas qechuwarqankuchu, manataqmi imanawarqankupaschu. 16 Tuta-p'unchaymi amachawarqanku ñoqaykutapas uywanchistapas. 17 Qanpa wiraqochaykin ichaqa millaypuni mana piqpapas imanirqonan, ¿icha imallatapas ruwawaqchu? Davidqa kunan ima mana allintaraqchá ruwanqa, Nabalta aylluntapas, nispa. 18 Chaymi Abigailqa usqhaylla q'epicharikurqan iskay pachak t'antata, iskay qara p'uyñu vinota, phisqa oveja aycha kankata, phisqa arroba hank'ata, pasasmanta pachak k'umpakunata, higosmanta iskay pachak k'umpakunatawan, chaykunatan llapanta asnokunapi cargaykukurqan. 19 Hinaspan runankunata nirqan: –Qankuna ñawpashaychisña, ñoqataq qhepataña hamusaq, nispa. Manataq qosanmanqa imatapas willarqanchu. 20 Abigailqa huk asnopi sillaykukuspan tiyasqan orqomanta pakayllanta uraykurqan. Chayllamanmi Davidta runankunantinta rikurqan pay cheqasman hamushaqta. 21 Davidtaq yuyaykusharqan: Yanqamá chay runaq lliw kaqnintaqa ch'inneqpi waqaychashasqani mana imantapas llamiykuspa, paytaq ichaqa allinta ruwashaqtiy mana allinwan kutichiwan. 22 Kunantaq chay awqayta llapa qharikunantinta wañurqarichimusaq, manan hukllapas qhepanqachu, mana hinata ruwaqtiyqa Señor Dios ñoqata ñak'arichiwachun, nispa. 23 Davidman tariparqospataq, Abigailqa usqhaylla asnonmanta uraykuspa Davidpa ñawpaqenpi qonqoriykukuspa pampakama k'umuykukurqan. 24 Chakinman qonqoriykukuspataq nirqan: –Wiraqocháy, hukta huchachanaykitaqa ñoqata aswan huchachaway. Uyariykuwaypuni rimapayasqayta. 25 Ñoqaqa waynaykikunata kachamushaqtiykiqa manan chaypichu karqani. Chhaynaqa, ama kasuychu chay uma muyusqa Nabaltaqa, imaynachus sutinqa Nabal, chay hinapunin payqa mana yuyayniyoq, imatapas manan yuyaywanpunichu ruwan. 26 Aswanpas Señor Diosmi manaraq munanchu qan hamuspayki yawar unuta ruwaspa makiykiwan awqaykita wañuchinaykita. Señor Diosraykun qanraykun jurani, qanta llapan mana allin ruway munaqkunaqa awqaykipiwan Nabal hina ruwasqapuni kachun. 27 Wiraqocháy, chaskiykuway kay apamusqay mikhunakunata, hinaspa rakiykuy runaykikunaman. 28 Hinallataq valekuyki pampachaykuwanaykita kay warmi kamachiykita. Señor Diosmi qantaqa takyachisunki wawaykiq wawankama kamachikuq-kayniykita, Señor Diosrayku maqanakuq kasqaykimanta, hinallataq tukuy p'unchay kawsayniykipi mana, ima mana allinpas kasunkichu. 29 Pillapas qanta wañuchinanpaq maskhaspa qatiykachaqniykimantaqa Diosniyki Señor Diosmi waqaychasunki, awqaykitan ichaqa kikin Señor Diospuni rumi warak'asqata hina warak'arparinqa. 30 Chhaynaqa, Señor Diospa llapan qanmanta allin nisqankuna hunt'akuqtin, Israelpipas umallita churaykusuqtiyki, 31 qanqa aman llakikunkichu amataq sonqoykipipas phutikunkichu huchayoqta mana wañuchisqaykimanta, qan kikiykiq munayniykiman hina vengakuspa wañuchisqaykimantapas. Señor Dios allinta ruwasuqtiykiqa, ñoqa kamachiykimantaqa yuyarikuwankipuni, nispa. 32 Chaymi Davidqa nirqan: –Saminchasqa kachun Israelpa Diosnin Señorqa ñoqaman qanta taripachimuwasqanmanta. 33 Saminchasqataq qanpas yuyaykusqaykipas kachun, ñoqa kikiy munayniyman hina makiykunawan wañuchispa yawar unuta ruwanay kashaqtin hark'aykuwasqaykimanta. 34 Israelpa Diosnin Señorpa sutinpin niyki, paymi mana allin ruwanaymanta hark'aykuwan, manachus qan usqhaylla taripamuwankiman karqan chayqa, qhariyki Nabalqa runankunantin manan kawsashaqñachu illarinkuman karqan, nispa. 35 Davidtaq chaskiykurqan payman apasqan mikhunakunata, hinaspan niykurqan: –Kunanqa kusisqa wasiykiman kutipuy, rikushanki hinapas niwasqaykikunata uyariykin, mañakusqaykitapas kasuykitaqmi, nispa. 36 Abigail wasinman kutipunanpaqtaq qharin Nabalqa hatun mikhuyta ruwasqa reypaq hinaraq, kusisqan kasharqan sinchi machasqallaña, chayraykun payqa mana ima nirqanpaschu qhepantin p'unchaykama. 37 Tutamantanñataq Nabalpa machasqan pasarqoqtin rikch'arimurqan, Abigailtaq llapanta willarqan imakunachus pasasqanta, chaymi Nabalpa sonqonqa qonqaylla phatarqorqan manataq kuyurirqanñachu. 38 Chunka p'unchaymanta hinataq Señor Diosqa Nabalta wañurqachipurqan. 39 Nabalpa wañukapusqanta uyarispataq Davidqa nirqan: –¡Saminchasqa Señor Diosqa kachun, Nabalpa millay nimuwasqanmanta pay kutichin! Mana allin ruwanayta hark'aykuwaspataq, Nabal kikinman kutichin mana allin ruwawasqanta, nispa. Chaymantataq payqa Abigailman kacharqan rimaykuqta, icha paywan casarakuyta munanmanchus chay tapuykuqta. 40 Kamachinkunataq Carmel llaqtata Abigailman chayaspa nirqanku: –Davidmi kachamushawanku: Qantan warminpaq munakusunki, nispanku. 41 Chaymi warmiqa qonqoriykukuspa nirqan: –Ñoqaqa huk kamachillan kani, chay hinaqa wiraqochaypa runankunaq chakin maqchiqllaqa kasaqmi, nispa. 42 Chaymantataq asnonpi sillaykukuspa, phisqa sipasninkunantin puririrqan Davidpa runankunaq qhepanta, chhaynapin Davidwan casarakapurqan. 43 Davidqa casarakullarqantaqmi Jezreel llaqtayoq Ahinoamwan, iskayninkutaq warminkuna karqanku. 44 Davidpa warmin Micaltataq taytan Saulqa qoykapurqan Galim llaqtayoq Laispa churin Paltiman warminpaq.
