1 Samuel 24

1Filistea runakunata qatiykachasqanmanta kutimuqtintaq, Saulman willaykurqanku Davidpa En-gadi ch'inneqpi kashasqanta. 2Chaymi Saulqa akllarqan llapan Israelmanta kinsa waranqa qharita, hinaspan Davidta runankunantinta maskhaq rirqanku k'ita cabrakunaq purinan qaqa-qaqa k'awchikamaraq. 3Purishaspankutaq chayarqanku oveja puñuna astanakunaman. Chaykuna qayllapitaq hatun qaqa wasi karqan, Davidtaq runankunantin chay ukhupi pakakusharqanku, chaymanmi Saulqa hisp'akuq haykuykurqan. 4Kayqá kunanmi hunt'akun Señor Diospa nisqasuyki: Makiykimanmi awqaykita hap'iykachisqayki ima munasqaykita ruwanaykipaq, nispa. Hinan Davidqa ch'inlla sayarirqospa, Saulpa capan ch'ullpata wit'urqorqan. 5Chaymantañataq Davidqa wit'urqosqanmanta pasaqta llakirqokurqan. 6Chaymi runankunata nirqan: –Kayqa Señor Diospa akllakusqan reymi, Dios waqaychawachun wiraqochay reyta mana allin ruwanaymanta, nispa. 7Chay hinata nispan Davidqa runankunata hark'arqan, Saulta mana hap'inankuta munaspa. Saultaq chay qaqa wasimanta lloqsispa ñanninta ripurqan. 8Qhepanta hinallataq Davidqa qaqa wasimanta lloqsirqamuspa kunkayoqta waqyakurqan: –¡Señorníy! ¡Reyníy! nispa. Saúl qhepanta qhawarikuqtintaq, Davidqa huch'uyyaykukuspa pampakama k'umuykukurqan, 9hinaspa nirqan: –¿Imaraykun “Davidmi mana allinniykita yuyaykun” niqkunata uyarinki? 10Reyníy, kunanqa qan kikiykin yachakunki. Haqay qaqa wasipi qanta makiyman Señor Dios hap'ichishawaqtinpas, ñoqaqa manan qan wañuchiyta munanichu, aswanpas qantan khuyapayaykuyki: Kayqa Señor Diospa akllakusqan reymi, nispa. 11Qhawariy, papáy, capaykiq ch'ullpantan hap'ishani. Qaqa wasiman haykumuqtiykin qanta mana wañuchiykichu, capaykiq ch'ullpallantan wit'urqoni. Kunanqa yachankin manapuni imamantapas awqayki kasqayta, manallataq qan contra ima mana allintapas ruwasqayta. Qanllapunin ichaqa wañuchiyta munawanki. 12Señor Diospuni iskayninchista chaninchachun, qanpa mana allin ruwasqaykimantataq Señor Dios ñak'arichisunki. Ñoqan ichaqa manapuni qan contra makillaytapas haywarisaqchu. 13Ñawpa rimaypin nin: “Mana allin-kayqa millaykunamantan paqarimun”, nispa, chayraykun ñoqaqa manapuni makillaytapas qan contra haywarisaqchu. 14Hinaspapas, ¿piqpa qhepantan Israelpa reynin lloqsimurqanki? ¿Pitan qatiykachashanki? Wañusqa alqotan, huk pikitan, chaymi ñoqaqa kani. 15Chayrayku, kikin Señor Dios chaninchachun, nichuntaq mayqenninchischus huchayoq kasqanchista. Paytaq ñoqata allinta qhawariwaspa makiykimanta horqowachun, nispa. 16Nimuyta tukuqtintaq Saulqa nirqan: –¿Manachu qanqa waway David kashanki? nispa. Hinaspan waqaykurqan. 17Hinaspataq nimurqan: –Qanqa chaninpunin kanki, ñoqataq pantashasqani, mana allinta ruwashaqtiy allinwan kutichiwanki. 18Kunantaqmi rikuchiwanki ñoqaq allinniy munasqaykita, Señor Diosña makiykiman ñoqata hap'ichishasuqtiykipas, manan wañuchiwarqankichu. 19¿Pitaq awqan runata tarishaspa hinallata qhawaykunman? Señor Diosña qanman allinta kutichipusunki khuyapayaykuwasqaykimanta. 20Kunanmi ichaqa, aswan cheqaqta yachani qan rey kanaykita, Israel suyupas qanwanqa allinta purinanta. 21Chayrayku, Señor Diospa sutinpi juraykapuway amapuni ñoqaq mirayniyta aylluytapas ch'usaqyachinaykita, nispa. 22Chaymi Davidqa jurarqan, Saultaq wasinta ripurqan. Davidñataq runankunantin pakakunankuman kutipurqanku.

will be added

X\