1 Samuel 23

1Huk p'unchaymi Filistea runakunaqa Keila llaqtaman phawaykuspa chayllaraq saruchisqa trigota suwakurqanku, chaytan Davidman willarqanku. 2Chaymi Davidqa Señor Diosta tapuykurqan: –¿Filistea runakunawan maqanakuq riymanchu? nispa. Señor Diostaq nirqan: –Riy, Keila llaqtata Filistea runakunaq makinmanta qechumuy, nispa. 3Runankunataq ichaqa payta nirqan: –Kay Judapi manchasqa kashanchis chayri, ¿imayna aswan manchasqaraqtaq Keila llaqtata risunman Filistea runakunawan maqanakuq? nispa. 4Chaymi Davidqa Señor Diosta tapuykullarqantaq, Señor Diostaq payta nirqan: –Rillay Keila llaqtata, Filistea runakunataqa hap'iykachisqaykin, nispa. 5Davidtaq runankunantin Keila llaqtata puririrqan, chaypin Filistea runakunawan maqanakamuspa pasaqta atipaykamurqanku, uywankutapas qatimurqanku. Chay hinatan Davidqa Keila llaqtapi tiyaq runakunata kacharichirqan. 6Keila llaqtapi Davidwan huñukapuyta yuyaspan Ahimelecpa churin Abiatarqa Diospa munaynin tapuna Urimniyoq Tumimniyoq unkuta aparikuspa Keila llaqtata rirqan. 7Hinan Saulman willarqamurqanku Keila llaqtapi Davidpa kashasqanta, chaymi Saulqa kusikurqan: Hap'iykachiwanñan Diosqa, paymantakama llaqtaman haykuspa wisq'aykukunqa, allin perqasqa llaqtapi punkuta allinta chakarqarikuspa, nispa. 8Hinaspataq Saulqa llapan soldadonkunata waqyachirqan Keila llaqtata rispanku Davidta runankunatawan muyuykunankupaq. 9Davidtaq chayta yacharqospa sacerdote Abiatarta nirqan: –Unkuta apamuy, nispa. 10Hinaspan Davidqa mañakurqan: –Israelpa Diosnin Señorníy, kay kamachiykin yachani Saulpa Keila llaqtaman hamunanta, ñoqa hawa kay llaqtata thuninantawan. 11¿Saulqa yachasqayman hina ñoqa maskhaq hamunqapunichu? ¿Keila llaqtayoq runakuna Saulman hap'iykachiwanqapunichu? Israelpa Diosnin Señorníy, kay kamachiykin valekuyki willaykuwanaykita, nispa. Señor Diostaq nirqan: –Arí, hamunqapunin, nispa. 12Davidqa tapuykullarqantaq: –¿Keila llaqtayoq runakuna Saulman hap'iykachiwanqapunichu runaykunatawan? nispa. Señor Diostaq nirqan: –Arí, hap'iykachisunkichispunin, nispa. 13Chaymi Davidqa runankunantin usqhaylla Keila llaqtamanta ripurqanku, cheqas-cheqaspi tiyaspataq purirqanku. Paykunaqa yaqa soqta pachak hinan karqanku. Saulmantaq Davidpa ripusqanta willarqanku, chaymi payqa manaña Keila llaqtaman rirqanchu. 14Ahinapin Davidqa kawsarqan Zif ch'inneq orqo-orqopi pakakuspa, hinaña sapa p'unchay Saúl maskhaykachisharqan chaypas, Diosqa manapunin tarichirqanchu. 15Davidtaq ichaqa Zif ch'inneq Horespi kashaspa repararqan payta wañuchinanpaq Saulpa maskhaspa hamusqanta. 16Chaymantataq Jonatanqa Davidpa kasqan Horesman rirqan, Diospi suyakuyninta aswanta kallpachaykuq. 17Nirqantaq: –Ama manchakuychu, manan taytay Saulqa tarisunkichu. Qanpunin Israelpi reyqa kanki, ñoqataq qanman qatiq kamachikuq kasaq, taytaypas yachanñan chaytaqa, nispa. 18Chaypitaq Diospa sutinpi rimanakurqanku, chaymantan Jonatanqa wasinta kutipurqan, Davidtaq kaq Horespi qhepakurqan. 19Hinan Zif llaqtayoq runakunaqa Saulman willaq Gabaa llaqtaman rispa nirqanku: –Davidqa hallp'ayku ukhupin pakakushan, Jeshimonpa uran Horespi Haquilaq orqon qaqa-qaqapi. 20Reyniyku, chayman rillayña, ñoqaykupas maskhaspa hap'iysisqaykikun, nispanku. 21Chaymi Saulqa kusisqa runakunata nirqan: –¡Señor Diosmi saminchasunkichis ñoqa khuyapayawasqaykichismanta! 22Kunantaq valekuykichis, rispaykichis allinta qhawamunkichis maypichus kashasqanta pichus rikusqantawan, niwankutaqmi sinchi yuyaysapallaña kasqanta. 23Chayrayku, allinta qhawamuychis llapan pakakunankunata, hinaspa willawankichis allillantaña, ñoqapas qankunata riysinaypaq. Chay hallp'apipunichus kashan chayqa, ñoqan maskhasaq q'alata Judapa llapan ayllun ukhuta, nispa. 24Hinan Saulpa qayllanmanta Zif llaqtayoq runakunaqa llaqtankuta ripurqanku. Davidtaq runankunantin kasharqanku Maón ch'inneqpi, Jeshimonpa uran Kachi Qocha qaylla pampapi. 25Chaymantataq Saulqa runankunantin David maskhaq rirqanku. Chayta yacharqospataq Davidqa runankunantin rirqanku Maón ch'inneq qaqa-qaqaman. Chayta yachaspataq Davidta qatiykachaq Saulqa Maón ch'inneqman rirqan. 26Hinaspan runankunantin orqoq wak qhatanta rirqanku, Davidtaq runankunantin Saulmanta aswanta karunchayta yuyaspa wakninta rirqanku. Saultaq ichaqa hap'inanpaq ña paykunata muyuriqninmanta wisq'arqosqaña. 27Chayllamanmi Saulman huk willaq tariparqamurqan: –Usqhay haku, reyníy, Filistea runakunan suyunchisman haykurqamunku, nispa. 28Chaymi Davidta qatiykachanantapas wikch'usparaq pasampurqan Filistea runakunawan maqanakuq. Chay hawataqmi chay cheqasta suticharqanku “T'aqarikuna Qaqa”, nispa. 29Chaymantan Davidqa En-gadi qaqa-qaqapi pakakuq ripurqan.

will be added

X\