1 Samuel 22

1Gat llaqtamanta ripuspataq Davidqa Adulam qaqa wasiman ayqekapurqan, hinan llapan wawqenkuna ayllunkunapiwan chayta yacharqospa paywan huñuykukurqanku. 2Hinallataq Davidmanqa huñuykakamurqan llapan sarunchasqakuna, manusapakuna, runa masinwan churanakuqkunapiwan, Davidtaq chaykunaq umallin kapurqan. Paywan puriqkunataq tawa pachak hina karqanku. 3Chaymantataq Davidqa Moab suyupi Mizpa llaqtaman rirqan, hinaspan reyta valekamurqan: –Ama hinachu kay, tayta-mamayta qanwan tiyarichipuway, Dios imatachá ñoqawan ruwanqa chayta yachanaykama, nispa. 4Tayta-mamantataq Moab reyman pusakampurqan, chaypin tiyakapurqanku qaqa wasipi Davidpa pakakamusqan p'unchaykuna. 5Chaymantataq profeta Gadqa Davidta nirqan: –Amaña kay qaqa wasipi tiyaychu. Ripuy Judá suyuman, nispa. Davidtaq ripuspa Haret sach'a-sach'aman haykurqan. 6Huk p'unchaymi Saulqa Gabaa orqo patapi tamarisco mallki chakipi tiyasharqan, lanzan hap'iykusqa, oficialninkunaq chawpinpi. Hinaspan Davidmanta runankunamantawan yacharqorqan maypichus kashasqankuta, 7muyuriqninpi oficialninkunatataq nirqan: –Uyariwaychis Benjamín ayllu runakuna, ¿qankuna yuyankichischu Davidqa hallp'akunata uvas chakrakunata qonasuykichista, waranqa soldado kamachiqman pachak soldado kamachiqman churanasuykichistapas? 8Llapallaykichismi qankunaqa ñoqa contra kashankichis. Manataq pillapas willaykuwankichischu churiyqa Isaipa churinwan rimanakusqantapas. ¿Manachu mayqennillaykichispas ñoqamanta llakikunkichis? Manataq pillapas willaykuwarqankichischu churiypa kamachiy Davidta ñoqa contra sayarichisqanta. Paymi pakayllamanta hap'irqowananpaq qhawamushawan, imaynan kunan ruwashan hinata, nispa. 9Chaymi Saulpa oficialninmanta huknin Edom suyu runa Doegqa nirqan: –Ñoqan rikusharqani Davidta, Nob llaqtamanmi hamusqa, Ahitobpa churin Ahimelecman. 10Ahimelectaq Diosta tapupurqan, chaymanta t'antata qoykurqan, Filistea runa Goliatpa espadantawan, nispa. 11Chaymi reyqa waqyachimurqan sacerdote Ahimelecta, paypa ayllun Nob llaqta sacerdotekunatawan. Llapanku reypa qayllanman chayarqamuqtinkutaq, 12Saulqa Ahimelecta nirqan: –Uyariway yaw, Ahitobpa churin, nispa. Paytaq nirqan: –Wiraqocháy, kaypin kashani kamachiwanaykipaq, nispa. 13Chaymi Saulqa nirqan: –¿Imanaqtinmi qanpas Isaipa churinpiwan ñoqa contrallataq kanki? Qan qoykusqanki t'antata, espadata, Señor Diostapas tapuykapusqanki ñoqa contra kunan hina kananpaq, pakay-pakaymanta qhawamuspa wañuchiyta yuyaykuwananpaq, nispa. 14Chaymi Ahimelecqa reyman kutichirqan: –¿Pitaq llapan oficialniykimanta David hina cheqaq hunt'aq? Qanpa qatayniykiraqtaq, wasiykipi waqaychaqniykikunaq umallin, lliwpa allinpaq hap'isqan. 15Hinaspapas, ¿kunan kutillaraqchu ñoqari Davidpaq Diosta tapupushani? Manan hinachu chayqa. Chayrayku, ama huchachawaychu ñoqatawan aylluytawanqa, ñoqa kamachiykiqa manapunin imatapas chaykunataqa yachanichu, nispa. 16Reytaq nirqan: –Manan, qanqa llapan aylluykipiwan wañunkipunin, nispa. 17Hinaspan reyqa muyuriqninpi runakunata kamachirqan: –¡Señor Diospa sacerdotenkunata wañuchiychis! Paykunapas Davidpa masinkunallataqmi, ayqekushasqanta yachashaspanku mana willaykamuwarqankuchu, nispa. Reypa runankunataq ichaqa mana munarqankuchu Señor Diospa sacerdotenkuna wañuchiyta. 18Chaymi reyqa Edom suyu runa Doegta nirqan: –¡Qanllaña wañuchiy chay sacerdotekunata! nispa. Paytaq usqhaylla wañuchiyta qallarirqan, chay p'unchaymi wañuchirqan linomanta unkuwan p'achasqa pusaq chunka phisqayoq sacerdotekunata. 19Chaymantataq sacerdotekunaq llaqtan Nobman haykuspa espadawan wañuchimurqanku qharikunata, warmikunata, erqekunata, qholla wawakunata ima. Chaymantapas sipimullarqankutaq wakakunata, asnokunata, ovejakunata ima. 20Ahimelecpa hukkaq churin Abiatarmi ayqekapuspa Davidpa kasqanman ripurqan. 21Chaypitaq Davidman willarqan imaynatachus Saulqa Señor Diospa sacerdotenkunata wañurachisqanmanta. 22Chaymi Davidqa Abiatarta nirqan: –Ñoqaqa nisharqanipunin, chay Doegqa Saulman willarqamunanta, nispa. Chhaynaqa, ñoqan huchayoq kani llapan aylluykiq wañuchisqa kananpaq. 23Kunanqa ñoqawan qhepakuy ama manchakuspa, ñoqawanqa manan wañunkichu, pillapas qanta wañuchinanpaq maskhaqqa ñoqataraqmi wañuchiwanqa, nispa.

will be added

X\