1 Samuel 21

1Davidtaq Nob llaqtapi sacerdote Ahimelecpa kasqanman chayarqan, sacerdotetaq mancharisqa payman taripamuspa nirqan: –¿Imanaqtintaq sapallaykiri hamunki? nispa. 2Hinan Davidqa sacerdoteta nirqan: –Reymi kachawarqan huk ruwana ruwaqta, nimuwarqanmi: Manan pipas yachananchu qan kachasqayta, imamantaqchus risqaykitapas, nispa. Runaykunataqa ñan kamachimuniña maypichus tupanaykuta. 3Icha, ¿ima mikhunallaykipas kashanchu? Qoykuway phisqa t'antaykita, mana kaqtintaq imallaykitapas, nispa. 4Sacerdotetaq Davidman kutichirqan: –Manan yanqa t'antayqa kanchu, aswanpas Señor Diospaq t'aqasqa t'antallan kashan, chayta qoykimanmi runaykikuna warmiwan kay p'unchaykama mana puñunkumanchu karqan chayqa, nispa. 5Davidtaq nirqan: –Sapa kuti maqanakuyman lloqsinaykupaqmi warmiwan puñuymantaqa t'aqakuykupuni, hinaña kay kuti mana maqanakuqchu purishayku chaypas. Hamunaykupaqqa runaykunaqa ch'uyañan karqan, kunankamaqa aswanñachá kanpas, nispa. 6Chaymi sacerdoteqa Señor Diospaq t'aqasqa t'antata qoykurqan, manan wak t'antaqa karqanchu, aswanpas Señor Diospaq t'aqasqa t'antallan, chaytan Diospa wasinpi mesamanta hoqariqku q'oñishaq t'antata rantinpi churanankupaq. 7Chay p'unchaytaq Diospa wasinpi kasharqan Saulpa oficialninmanta huknin, paymi Edom suyu runa Doeg sutiyoq karqan, Saulpa michiqninkunaq umallin. 8Davidmi valekullarqantaq sacerdoteta: –¿Manachu lanzaykipas espadaykipas kapusunki? Manan armaytapas espadaytapas aparikamurqanichu, reypa usqhaylla qatirimuwasqanrayku, nispa. 9Hinan sacerdoteqa nirqan: –Filistea runa Goliatmanta Ela wayq'opi wañuchispa qechusqayki espadallan kashan, uma sacerdoteq unkun qhepapi telawan p'istusqa. Munanki chayqa, apakuy, chayllapunitaqmi kashanpas, nispa. Davidtaq nirqan: –May kusamá chay espadaqa. Chayta qoykuway, nispa. 10Chaymantataq Saulmanta ayqekapurqan Gat llaqta rey Aquispaman. 11Aquispa oficialninkunataq Aquista nirqanku: –¿Manachu kayqa Israel suyu rey David? Paymantan riki tususpa takirqanku: ¡Saulmi waranqa runata wañuchimun, Davidtaq chunka waranqa runata wañuchimun! nispanku. 12Chay rimasqankuta uyarispataq Davidqa Gat llaqta rey Aquista manchakurqan. 13Hinaspan waq'aman tukurqospa ñawpaqenkupi huk-hinayarqan, makinwantaq punkukunata raskhapakurqan, wilthinpas sunkhan urayta phawasharqan. 14Chaymi Aquisqa nirqan: –Kay runata waq'ata rikushaspaqa, ¿imapaqmi pusamuwankichis? 15¿Waq'a runari faltawanchu? ¿Chaytaq kaytari wasiypi waq'ayananpaq pusamuwankichis? Amapuni kayqa wasiyman haykumuchunchu, nispa.

will be added

X\