1 Samuel 2

1Anataq mañakuspa nirqan: –Señor Diosníy, tukuy sonqoymantan kusikushani, qanmi mosoq kallpa qoqniy kanki. Kunanqa kanmi simiypas awqaypaq, chayraykun qespichiwasqaykimanta kusikushani. 2Señor Diosníy, manapunin qan hina ch'uyaqa kanchu, manan huk diosqa kanchu, manan qan hina hatun Qaqaqa kanchu. 3Upallaychis, umata hoqarispa sinchi rimaqkuna, ch'inllaña kaychis, kallpawan rimaqkuna, Señor Diosmi tukuy imaymana yachaqqa, paymi tukuy ruwasqakunata chaninchaqqa. 4Kallpasapakunaq p'eqtantan p'akin, mana kallpayoqkunatataq kallpachan. 5Askha mikhunayoqkunan qonqaylla mana kapuqtin llank'apakapushanku, yarqasqa mana imayoqkunataq hunt'asqa mikhunayoq rikhuripurqanku, mana wachakuq warmipas qanchiskaman wachakapun, askha wawayoqtaqmi mana wachakuqman tukupun. 6Señor Diosmi kawsay qechuqpas kawsay qoqpas, payllataqmi wañuy pachaman uraykachiqpas, chaymanta kawsarichimuqpas. 7Señor Diosmi wakinta wakchayachin, wakintataq qhapaqyachin, wakinta huch'uyyachin, wakintataq hatunyachin. 8P'enqaypi kashaq wakchatapas qhapaqyachinmi, mana imayoqtapas wakcha kayninmanta horqonmi, kamachikuqkunawan kuska tiyananpaq, paykunawan kuska yupasqa kananpaq. Señor Diosmi pachaq takyananta ruwaqqa, chay patamanmi kay pachata churaykurqan. 9Diosmi pay sonqo runankunata waqaychan, mana allin runataq kaq tutayaqpi chinkapun. Manan pipas pay kikillanpa kallpanwanqa atipanchu, 10Señor Diosmi awqankunata lliwta ñut'unqa, hanaq pachamantan paykuna pataman t'oqyamunqa. Señor Diosqa teqsimuyuntintan juzganqa. Reynintan ichaqa kallpachanqa, akllakusqantan atipachinqa, nispa. 11Elcanan Ramá llaqtapi wasinman kutipurqan, wawataq Eliwan kuska Señor Diosta servispa qhepapurqan. 12Elipa churinkunataq Diosta mana manchakuq millay karqanku. 13Pipas Señor Diosman sacrificiota haywayta munaspa aychata t'impuchishaqtinmi, sacerdoteq kamachinqa kinsa puntayoq trinche apaykusqa hamuq, 14chayllaraq aycha t'impushaqtinmi, chay trinchewan mankaman sat'iykuspa wakin aychata sacerdotepaq aparikuq. Paykunaqa chay hinallatapunin Siloman hamuq llapa Israel runakunawan ruwasharqanku. 15Hinallataq manaraq wiranta rupharqoshaqtin, chay kamachiqa haywaqkunaman aycha mañakuq hamuq: Qoway hanku aychallata sacerdoteq q'aspachikunanpaq, t'impusqa aychataqa manan munanchu, nispa. 16Chaymi pillapas: Wirantaraqyá ruphachun, chaymantaqa apashankichá, niqtinqa: Manan, kunanpunin munani qowanaykita, mana chaytaqmi qechurqosqayki, nispa niq. 17Chay hinan Señor Diospa qhawarinanpaq waynakunaq huchanqa sinchipuni karqan, Señor Diospaq qosqa ofrendakunata mana kaqpaq hap'isqankurayku. 18Chaykaman Samuelqa Señor Diosta linomanta unkuyoq servisharqan. 19Sapa watallan Anaqa p'achata ruwaspa apamuq, qosantin sacrificio haywaq Silo llaqtaman wichaspanku. 20Chaypin Eliqa Elcanata warmin Anatawan saminchaykuq: Señor Diosyari kunanqa kay wawaq rantinpi askhataraq qosunkichis, nispa. Paykunataq wasinkuman kutipurqanku. 21Hinan Señor Diosqa Anamanta yuyarikurqan, chaymi payqa wiksallikurqan, wachakurqantaq kinsa qhari iskay warmi wawakunata. Chaykamataq Samuelqa Señor Diosta servispa hatunña wiñasharqan. 22Eliqa sinchitañan machuyaykapusharqan, churinkunaq Israel runakunata millay ruwasqantapas uyarishallarqanpunin, Dioswan Tupana Karpa haykuna punkupi llank'aq warmikunawan puñusqankutapas. 23Chaymi Eliqa paykunata nirqan: –¿Imaraykun chay hinata ruwankichis? Ñoqamanqa llaqtantin runan willawanku imaymana mana allin ruwasqaykichista. 24¡Wawallaykuna, saqepuychisyá! ¡Llaqtantin runakunaq willakusqanqa sinchi mana allinmi! 25Huk runachus runamasin contra huchallikun chayqa, kanmi Dios payta chaninchananpaq, Señor Dios contrachus huchallikun chayqa, ¿Piñataq paymanta valepakuq kanqa? Nishaqtinpas taytankuq nisqantaqa manan kasurqankuchu, chayraykun Señor Diosqa yuyaykurqanña paykuna wañuchiyta. 26Chaykamataq Samuel waynaqa Señor Diospa qayllanpi wiñasharqan, runakunaqpas allinpaq hap'isqan. 27Diospa profetantaq Eliman hamuspa nirqan: –Señor Diosmi nin: Ñawpa taytayki Aaronmanqa sut'itan rikuchirqani, Egipto rey Faraonpa kamachin kashaqtinku. 28Chaypin llapan Israel ayllukunamantapas paypa ayllunta akllakurqani, sacerdoteykuna kanankupaq, ñawpaqeypi unkuwan churakunankupaq, altarniy patapi sacrificiota haywawanankupaq, inciensotapas q'apachimuwanankupaq. Hinallataq llapan Israelpa ofrenda apamusqankumanta kawsanankupaq qorqani. 29¿Imanaqtintaq qanri ñoqaq kamachikusqay ofrendakunata sacrificiokunatapas mana valeqpaq qhawarinki? ¿Imanaqtinmi ñoqamanta aswanta churiykikunata hatunchanki? ¿Imanaqtinmi llaqtaypa ofrenda apamusqanmanta allinninkunawan wirayachishanki? nispa. 30Chaymi Israelpa Diosnin Señorqa nin: Ñoqan prometekurqani ñawpa taytaykiq ayllunman qanpa aylluykimanpas ñoqata wiñaypaq serviwanankupaq. Kunanmi ichaqa manaña prometekusqayta ruwasaqñachu. Ñoqa hatunchawaqniytaqa hatunchasaqmi, pisichawaqniytapas pisichallasaqtaqmi. 31Kunanqa chayamushanñan taytaykiq aylluntapas qantapas chinkachipunay p'unchay, manañan kanqañachu hukllapas yuyaq kanankama kawsaq. 32Qanmi llakisqa munapayaspa qhawanki Israel llaqtay saminchasqayta, manataqmi qanpa aylluykimantaqa hukllapas yuyaq kanankama kawsaq kanqachu. 33Chaywanpas saqesaqraqmi aylluykimanta hukninta serviwananpaq, paymi ñawsayapuspa llakikusqanpi tukukunqa, wakintaq kallpallankupiraq kashaqtin wañurqachisqa kanqaku. 34Churiyki Ofniwan Fineespiwanmi huk p'unchayllapi wañupunqaku, kaymi reqsinaykipaq señal kanqa. 35Ñoqan ichaqa huk allin sacerdoteta akllakusaq, tukuy munasqaytan payqa ruwanqa, miraynintaqmi allin sayaq kanqa, aceitewan hawisqa reypa qayllanpipas tukuy p'unchay servinanpaq. 36Aylluykipi qhepaq runakunataqmi llapanku payman k'umuykunqaku, huk pisi t'antata huk pisi qolqetawan mañakunankupaq. Ninqakutaq: Ama hinachu kay, valekuykikun, sacerdoteq ima ruwanallanmanpas churaykuwayku, chay hinapi imallapas mikhunayku kananpaq, nispanku.

will be added

X\