1 Samuel 19

1Churin Jonatanta oficialninkunatawanmi Saulqa kamachirqan Davidta wañuchinankupaq. Jonatantaq Davidta sinchitapuni munakurqan, 2chaymi Davidman willarqorqan: –Taytay Saulmi wañuchiyta munashasunki. Paqarinmi tutallamanta pakakamunki mayllapipas, 3ñoqataq taytaywan paseaq hamusaq qanpa kasqayki cheqasman. Chaypitaq payta qanmanta rimapayasaq, imaninqachus chaytaqa willasqaykiñan, nispa. 4Jonatantaq taytanta sumaqta Davidmanta rimapayaspa nirqan: –Reyníy, ama ima mana allintapas Davidtaqa ruwaychu, payqa manan ima mana allintapas qanpaqqa ruwanchu, aswanmi allintakama ruwarqasunki. 5Hinallataq wañuyta mana manchakuspa Filistea runatapas wañuchirqan, chay hinapitaq Señor Diosqa Israel llaqtata hatun atipaywan qespichirqan. Chayta rikuspataq kusikurqanki, chayri, ¿imamantataq Davidta yanqa wañuchiwaq mana huchanmantari? nispa. 6Niqtintaq reyqa jurarqan: –Diosmi yachashan, Davidqa manan wañunqachu, nispa. 7Chay qhepatataq Jonatanqa Davidman chay nisqanta willarqamurqan, hinaspataq kaqta Saulman pusampurqan, ñawpaq imaynatachus purirqan hinata purikapunanpaq. 8Wakmantan hatun maqanakuy kallarqantaq, Davidtaq lloqsirqan Filistea runakunawan maqanakuq, hinaspataq manchanata wañurachimurqan, wakintaq ayqekapurqan. 9Señor Diospa kachamusqan mana allin espiritun wakmanta Saultaqa hap'irqapurqan, wasinpi lanza hap'iykusqa tiyashaqtin, Davidpas arpanta tocashaqtin. 10Hinan Saulqa Davidta lanzanwan perqaman ch'antirqonanpaq chanqarqan, Davidtaq laq'ochirqan. Chaymi Saulpa lanzanqa perqallaman ch'antikurqan. Chay kikin tutapachataq Davidqa ayqekuspa pasakapurqan. 11Kaq ratopachataq Saulqa Davidpa wasin qhamiyaqta runakunata kacharqan, paqarisnintin Davidta wañuchipunankupaq. Chaytan warmin Micalqa Davidman lliwta willaspa nirqan: –Manachus kunan tuta ayqekunki chayqa paqarinmi taytayqa wañuchisunki, nispa. 12Chaymi Micalqa Davidta ventananta waskhapi warkuspa kacharparirqan, paytaq pasakapurqan. 13Qhepanmantataq Micalqa wasinpi idolota Davidpa puñunanman churaykurqan, cabra millmamanta awasqawantaq sawnaykachirqan, patanmantaq huk llamp'unawan qataykurqan. 14Saulmi runakunata David apaqta kachamurqan, Micaltaq ichaqa nirqan: –Onqoshanmi, nispa. 15Wakmantan Saulqa kachallarqantaq: –¡Hina onqosqata apamuychis wañuchinaypaq! nispa. 16Saulpa kachasqan runakuna Davidpa wasinman haykuqtintaq idololla kapushasqa cabra millmamanta awasqawan sawnaykachisqa. 17Chaymi Micalta Saulqa nirqan: –¿Imanaqtinmi chhaynata q'otuwanki, awqayta kacharparispayki? nispa. Niqtinmi payqa nirqan: –Ama hark'awaychu chinkakapunayta, mana chayqa qantan wañurqachisqayki, niwarqanmi, nispa. 18Davidtaq Samuelpa kasqan Ramá llaqtaman ayqekapurqan, chaypitaq Saulpa tukuy imaymana ruwasqanta willaykukurqan. Chaymantataq kuskapacha ripurqanku Naiotpi tiyaq. 19Hinan Saulman willarqanku Davidpa Ramá llaqtapi kaq Naiotpi kashasqanta. 20Chaymanmi kacharqan runakunata Davidta apamunankupaq. Runakunataq rikurqanku huk t'aqa profetakuna profetizashaqta, Samueltataq llapankuta pusashaqta. Chayllamanmi Diospa Espiritunqa hamurqan chay runakunamanpas, hinan paykunapas profetizayta qallaripurqanku. 21Chayta yachaspataq Saulqa huk runakunata kacharqan, paykunapas chayaspaqa kaqllatataq profetizayta qallarirqanku. Saulqa wakmantan kinsakaq kutitawan runakunata kachallarqantaq, hinan chaykunapas profetizapushallarqankutaq. 22Chaymi Saulqa pay kikin Ramá llaqtaman puririrqan. Secupi hatun unu p'uytu pataman chayaspataq tapukurqan: –¿Maypin Samuelwan Davidwan tiyanku? nispa. Huk runataq nirqan: –Ramá llaqtapi kaq Naiotpin kashanku, nispa. 23Paytaq chayman rishallaqtinraq Diospa Espiritunqa paymanpas hamullarqantaq, chaymi Saulpas profetakuna hina profetizapushallarqantaq chayanankama. 24Chayaspataq payqa p'achanta ch'utirqokuspa Samuelpa qayllanpi profetizasharqan, chaymantataq q'alalla wikch'urayarqan chay p'unchayta chay tutatawan. Chaymantan rimay rikhurirqan: ¿Saulpas profetamanchu tukupun? nisqa.

will be added

X\