1 Saulwan David rimayta tukurqoqtin hinataq, Jonatanpa sonqonta Davidqa suwarqorqan, chaymi Jonatanqa pay kikinta hina sinchita munakapurqan. 2 Saultaq chay p'unchaymantapacha Davidta kamachinpaq qhepachikapurqan, manataq taytanpa wasinta kutipunanta munarqanchu. 3 Chaymantan Jonatanwan Davidwan rimanakurqanku wiñaypaq amigontin kanankupaq, Davidta pay kikinta hina munakusqanrayku. 4 Chaymantapas Jonatanqa capanta huk p'achantawan horqokuspa Davidman qoykurqan, kaqllataq espadanta, p'eqtanta, chumpintawan ima. 5 Davidqa allintapunin hunt'arqan Saulpa tukuy kamachisqankunata, chaymi Saulqa soldadonkuna kamachiqpaq churaykurqan. Hinaspan lliw soldadokunawan Saulpa oficialninkunawanpas sinchitapuni munachikurqan. 6 Davidpa Goliat-ta wañuchisqanmanta soldadokuna kutimpushaqtinkun, sapanka llaqtapi warmikuna rey Saultawan chaskiq taripamurqanku kusikuymanta takispa, tususpa, tinyata, platillotawan tocakuspanku. 7 Warmikunataq tusukuspa takirqanku: –Saulmi waranqa runata wañuchimun, Davidtaq chunka waranqa runata wañuchimun, nispanku. 8 Chay nisqanwantaq Saulqa pasaqta phiñakuspa nirqan: Ñoqataqa waranqa wañuchiqllataña qhawariwanku, Davidtataq chunka waranqa wañuchiqta. Chay hinaqa, reyllataña aswan churakapunkuman, nispa. 9 Chaymantapachataq Saulqa millay ñawinwan Davidta qhawaykapurqan. 10 Qhepantin p'unchaytaq Diospa kachasqan mana allin espíritu Saulman qonqay hamurqan. Hinan kamachikunan wasipi waq'a hina karqorqan, chaymi Davidqa wakin p'unchaykuna hina tocayta qallarirqan, Saultaq makinpi lanza hap'iykusqa kasharqan, 11 chayllamanmi Davidta perqaman ch'antirqoyta yuyaykurqospa lanzawan chanqarqan, Davidtaq iskay kutipi laq'ochirqan. 12 Saulqa yachakurqanmi Señor Diosqa paymanta t'aqarikapuspa Davidwanña kashasqanta, chaymi Davidta manchakapurqan. 13 Chayraykun ladonmanta Davidta hatarichipurqan, hinaspan waranqa soldado kamachiqta churarqan. Hinan soldadokunaq umallin Davidqa maqanakuykunaman rillaqpuni. 14 Paypaqa tukuy ima ruwasqanpas wakillaqpunin, Señor Dios payta yanapasqanrayku. 15 Allinta Davidpa purisqanta rikuspataq, Saulqa aswanta manchakapurqan. 16 Llapa Israel runakunapas Judá runakunapas Davidtan munakurqanku, maqanakuyman rinankupaq kamachiqninku kasqanrayku. 17 Huk p'unchaytaq Saulqa Davidta nirqan: –Kurak ususiy Merabta warmiykipaq qopusqayki, ichaqa ñoqapaqpas Señor Diospa sutinpi maqanakuypipas allin maqanakuq kanaykirayku, nispa. Saulqa yuyaykurqanmi mana pay kikinchu Davidta wañuchiyta, aswanpas Filistea runakunawan sipichiytan munarqan. 18 Davidtaq nirqan: –¿Pitaq ñoqari kani reypa qataynin kanaypaq? ¿Ima allintaq aylluypas Israel llaqtapi? nispa. 19 Davidman Saúl Merab ususiyta qopusqayki nisqa p'unchay hunt'akuqtintaq, Davidman qonantaqa Mehola llaqtayoq Adrielman ususinta qoykapurqan. 20 Chay tukuywanpas Saulpa hukkaq ususin Micalmi Davidta munakurqan, chayta willaqtinkutaq Saulqa kusikurqan. 21 Saulqa yuyaykurqanmi: Micalta qosqayki, niqtiyqa, ususiyraykuqa paymantakaman Filistea runakunawan sipichikunqa, nispa. Chaymi Davidta wakmanta nirqan: –Kunan ichaqa qatayniypuni kanki, nispa. 22 Chaymanta oficialninkunawan pakayllapi Davidta parlapayachimurqan: Reyqa sinchitapunin munakusunki, kaqllataq oficialninkunapas, chay hinaqa, qataynillanña kapuy, nispanku. 23 Chaymi oficialninkunaqa Davidman willarqanku Saulpa nisqankunata. Davidtaq kutichirqan: –¿Qankunapaqri hina-hinallachu kanman huk wakcha mana imayoq runapaq reypa qataynin kayqa? nispa. 24 Chay nisqantan paykunaqa llapallanta Saulman willamurqanku. 25 Chaymi Saulqa yuyaykurqan awqan Filistea runaq makinpi Davidpa wañunantapuni, chaymi nillarqantaq: –Riychis, Davidman nimuychis, manan reyqa munan qolqeta qonku warmi wawayoqman chaytachu, aswanmi payqa munashan pachak Filistea runakunaq qhari-kayninpa qarachankunata awqanmanta vengakunanpaq, nispa. 26 Saulpa chay nisqankunata oficialninkuna Davidman willaqtinkutaq, paymanqa allillan rikch'akurqan reypa qataynin kay. Chaymi payqa manaraq tiempo hunt'akamushaqtin, 27 soldadonkunata pusaykukuspan iskay pachak Filistea runakunata wañuchimurqanku. Chaykunaq qhari-kayninpa qarachankunatataq aparqamurqan reyman, qataynin kayta munaspa. Saultaq ususin Micalta qoykapurqan. 28 Paymi Davidta Señor Dios yanapashasqanta yachaspa, ususin Micalpas munakusqanmantawan, 29 manchakapurqan ñawpaqmantaqa aswanta. Saulqa tukuy tiempon Davidpa awqanpuni kapurqan. 30 Sapa kuti Filistea umallikuna maqanakuyman lloqsimuqtinkutaq, Davidqa aswan allinpuni lloqsirqan Saulpa wakin oficialninkunamantaqa, chaymi Davidqa tukuypa allin reqsisqanpuni kapurqan.
