1 Filistea runakunan soldadonkunata maqanakuypaq huñuykurqan Judá hap'iypi Soco llaqtaman, hinaspan Efes-damimpi karpakurqanku Azeca llaqtawan Soco llaqtawan tupaypi. 2 Chay hinallataq Saulpas Israel runakunata huñuykurqan, hinaspan Ela wayq'opi karpakurqanku, Filistea runakunawan maqanakunankupaq wakichikuspa. 3 Israel runakunawan Filistea runakunawantaq Ela wayq'oq chimpapuranpi kasharqanku. 4 Chayllamanmi Filistea soldadokunamanta huknin lloqsimurqan Goliat sutiyoq, Gat llaqtamanta allin maqanakuy yachaq. Payqa yaqa kinsa metro hina sayayniyoqmi karqan. 5 Umanpi casconmi broncemanta karqan, cuerponpas broncemanta unkuwan allin p'achasqa, chaytaq llasarqan phisqa chunka phisqayoq kilota. 6 Chakinpipas broncemantan escarpinnin karqan, hinallataq q'epirqan huk jabalinata. 7 Lanzanpa hap'inantaq telarpi bayeta k'uyuna k'aspi hina rakhuyoq karqan, fierromanta ñawch'intaq llasarqan soqta kilo kurakta. Ñawpaqentataq escudon apaysiqnin phawarqan. 8 Hinaspataq sayaykuspa waqyakamurqan Israelpa soldadonkunata: –¿Imapaqmi hamunkichis maqanakuqqa? ¿Ñoqaqa manachu Filistea runa kashani, qankunataq Saulpa kamachinkunalla? Akllaychis qankuna ukhumanta allinnin qharita maqanakunaypaq. 9 Ñoqawan maqanakuspachus atiparqowaspa wañurqachiwanqa chayqa, qankunaq kamachiykichismi kapusaqku. Ñoqataqchus atipaspa wañurqachipusaq chayqa, ñoqaykuq kamachiykun kapunkichis. 10 Qhari kaspaqa, hamuychis maqanakusunchis. ¡Kachamuwaychis huk qharita ñoqawan maqanakunanpaq! nispa. 11 Chayta nimuqtintaq, Saulpas llapan Israel runakunapas pasaqta mancharikurqanku. 12 Judá hap'iy Belén llaqtapin tiyarqan Efrata runa Isaí sutiyoq. Saulpa p'unchayninkunapitaq sinchi yuyaqña karqan. Chay runaq churinkunan pusaq karqan, hukkaqninpa sutintaq David, karqan. 13 Isaipa kinsantin churinkunaqa Saulwan kuskan maqanakuypi kasharqanku, chaykunan Eliab, Abinadab, Samapiwan karqanku. 14 Davidqa aswan sullk'an karqan, chay kinsantin kurak kaqkunataq Saulta qatikurqanku. 15 Davidqa Saulpa kasqanta rishaqtaq, Belenpi taytanpa ovejan michiqpas kutimushaqtaq. 16 Chay Filistea runaqa tawa chunka p'unchaynintinmi Israel runakunata ch'isin paqar k'amimuq. 17 Taytan Isaimi Davidta nirqan: –Phaway wawqeykikuna watukuq, huk arroba hank'ata chunka t'antatawan aparikuspa, paykunaqa karpa-karpapin kashanku. 18 Waranqa soldado kamachiqpaqtaq chunka quesota aparikuy, hinaspa qhawarqamuy imaynachus kashanku wawqeykikuna chayta. Allillan kashanku chayqa, imallankutapas apamunkipuni yachanaypaq. 19 Paykunaqa Saulwan kuskan, llapan Israel runakunapiwan Ela wayq'opi Filistea runakunawan maqanakushanku, nispa. 20 Chaymi Davidqa tutallamanta ovejanta huk michiqman saqeykuspa puririrqan, taytanpa apachisqanta aparikuspa. Davidpa karpa-karpaman chayananpaqtaq, soldadokunaqa maqanakuq lloqsishaspanku kunkayoqta qaparisharqanku. 21 Sayaykurqankutaq chimpa-chimpapura Israel runakunawan Filistea runakunapiwan. 22 Chayaspataq Davidqa q'epinta q'epi qhawaqman saqeykuspa, soldadokuna ukhuman phawaykurqan wawqenkunamanta imaynachus kashasqankuta tapukuq. 23 Paykunawan parlashaqtintaq Gat llaqtayoq Goliat sutiyoq Filistea runaqa lloqsimurqan, ñawpaq p'unchaykuna hina: Qhari kaspaqa hamuychis maqanakusun, nispa. Davidtaq chayta uyarirqan. 24 Chay runata rikuspataq Israel runakunaqa mancharikuymanta ayqerikapurqanku. 25 Nirqankutaq: –¿Qhawarinkichischu haqay runata chay hina lloqsimusqanta? Israel imaymana k'amiqmi wakmanta hamun. Haqay runata atipaqmanmi reyqa qonqa qhapaq kaykunata, ususintawanpas, ayllunpa chakrankunamantapas manan impuestota pagachinqachu, nispanku. 26 Davidñataq tapupakusharqan chaypi kaqkunata: –¿Imatataq qonqaku haqay Filistea runata atipaqmanri? ¿Imatataq qonqaku Israelta p'enqachiq runata wañuchiqmanri? ¿Pitaq kanman haqay mana iñiyniyoq runari, kawsaq Diospa soldadonkunata imaymana k'amiqri? nispa. 27 Paykunataq nirqanku ñawpaq nisqanku hinatakama, Goliat wañuchiqman imatachus qonanta. 28 Chay runakunawan Davidpa parlasqanta uyarispataq kuraknin Eliabqa phiñarikuspa k'amirqan: –¿Imamanmi hamunki? ¿Pimanmi chay pisi ovejakunatapas saqemunki chay ch'usaq pampapi? Maqanakuq qhawaqmi qanqa phawamunki, qantaqa reqsiykin gustonero kasqaykita, nispa. 29 Davidtaq nirqan: –¿Imatataq ñoqari ruwashani? ¿Manañachu parlarikuyman? nispa. 30 Hukman asuykuspataq kaqllatataq tapukurqan, chay runapas wakinkunaq nisqanta hinallatapunin nirqan. 31 Davidpa chay rimasqantataq Saulman willarqorqanku, paytaq chayta uyarispa waqyarqachirqan. 32 Hinan Davidqa Saulta nirqan: –Ama pipas haqay runataqa manchakuychischu, ñoqa kamachiykin paywan maqanakuq risaq, nispa. 33 Saultaq nirqan: –Manan haqay Filistea runawanqa maqanakuyta atiwaqchu, qanqa erqellaraqmi kanki, chay runan ichaqa wayna-kayninmantapacha maqanakuqpuni, nispa. 34 Davidtaq nirqan: –Ñoqa kamachiykiqa taytaypa ovejankunata michiqmi kani. Chayman leonkuna ukumarikuna hamuspa ovejata apashaqtinmi, 35 qhepanta phawarispa siminmantapas qechullanipuni, kutirimuwaqtintaqmi qhaqllinmanta hap'ispa sipinaykama p'anaq kani. 36 Leonña ukumariña hamuqtinpas kamachiykiqa wañuchillanipunin, ñoqapaqqa chhaynallataqmi haqay mana iñiyniyoq Filistea runapas. ¿Pi hinan payqa kawsaq Diospa soldadonta imaymanata k'aminman karqan? 37 Haqay Filistea runaq makinmantaqa Señor Diosmi qechuwanqa, imaynan leonpa sillunmanta ukumariq sillunmantapas qechuwarqan hinata, nispa. Niqtinmi Saulqa nirqan: –Chhaynaqa, riy, Señor Dios yanapasunki, nispa. 38 Chaymantataq Saulqa soldado p'achakunawan Davidta p'acharqachirqan, broncemanta casconwan unkunwan ima. 39 P'achakusqan pataman espadawanpas warkuykurqan, puriykacharispataq mana atirqanchu, chay hina p'achawan mana hayk'aqpas churakusqanrayku. Chaymi Saulta nirqan: –Manan atinichu puriyta, manan kay hina p'achawan churakurqanichu, nispa. Hinaspan p'achata ch'utirparispa, 40 tawnachanta aparikuspa, phisqa llusk'a rumichakunata mayumanta hoqariykukurqan, michiq rispa apakunan wayaqachanmantaq churaykurqan. Hinaspa warak'anta aparikuspa, Filistea runaman qayllaykurqan. 41 Filistea runataq payman pisimanta-pisi qayllaykamurqan, escudo apaysiqnintaq ñawpaqenta rirqan. 42 Davidta qhawarimuspataq Goliatqa rikurqamurqan sumaq rikch'ayniyoq puka uya waynachata, chaymi pisichaspa 43 Davidtaqa nimurqan: –¿Ñoqari alqochu kashani k'aspintin hamuwanaykipaq? nispa. Chaymantapas diosninpa sutinpi Davidta ñakaspa nirqan: 44 –Hamuy, aychaykitan ankakunaman salqa animalkunamanwan qaraykusaq, nispa. 45 Chaykunata niqtintaq Davidqa nirqan: –Qanqa hamuwanki lanzayoq, espadayoq, jabalinayoq, ñoqataq ichaqa Tukuy-atiyniyoq Señor Diospa sutinpi hamuyki. Paymi Israel soldadokunaq Diosninqa, paykunatan qanqa: Hamuychis qhari kaspaqa, nispa nimurqanki. 46 Kunanmi qanta Señor Diosqa makiyman hap'iykachiwanqa, hinaspan qanta wañurqachispa umaykita qhorusqayki. Filistea soldadokunaq ayantapas ankakunamanmi salqa animalkunamanwan qaraykusaq. Ahinapin llapan runa yachanqa Israelpi Dios kasqanta, 47 hinallataq kay runakunapas yachanqa Señor Diosqa mana espadawanchu mana lanzawanpaschu qespichiq kasqanta. Kay maqanakuyqa Señor Diospa munayninpin kashan, chayraykun qankunata makiykuman hap'iykachiwanqaku, nispa. 48 Hinaqtinmi Filistea runaqa David ladoman puririmurqan paywan maqanakunanpaq, kaqllataq Davidpas phawarirqan Filistea runawan maqanakuna pataman. 49 Wayaqachanmanta rumita horqokamuspataq warak'anwan warak'arqan. Rumitaq Goliatpa mat'inpi ch'antikurqan, wañusqataq uyanpamanta kumpakurqan. 50 Chay hinatan Davidqa Filistea runata atiparqan, mana espadallawan aswanpas rumiwan warak'aspalla wañuchipurqan. 51 Phawarispataq Goliatpa ladonpi sayaykuspa espadanta waqaychananmanta horqorqorqan, chaywantaq sipipaykuspa umanta qhorurqan. Filistea runakunataq allin maqanakuq umallinkuta wañusqata rikuspa ayqekapurqanku. 52 Israel runakunawan Judá runakunapiwantaq qaparkachakuspa Filistea runakunaq qhepanta phawarqanku Gat llaqtaman haykuna punkukama, hinallataq wak ladomanpas Ecrón llaqtaq punkunkamaraq. Ñankunapitaq Filistea runakuna wikch'u-wikch'u wañuchisqa karqan, Saaraim llaqtamanta Gat llaqtaman rina ñanpi, kaqllataq Ecrón llaqtaman rina ñanpipas. 53 Filistea runakunata qatiykachasqankumanta kutimuspataq, Israel runakunaqa awqankuq karpankunata llat'anarqanku. 54 Davidtaq Goliatpa umanta Jerusalenman aparqan, armankunatataq karpanman churaykurqan. 55 Goliatwan David maqanakuq rishaqtinmi, Saulqa ejercitonpa umallin Abnerta tapuykurqan: –¿Piqpa churinmi haqay wayna? nispa. 56 Abnertaq nirqan: –Juranin, reyníy, manapunin yachanichu, piqpa churinchá, nispa. Reytaq nirqan: Tapuykunkin piqpa churinchus kasqanta, nispa. 57 Filistea runa wañuchisqanmantan Davidqa uman aysaykusqa kutimusharqan, hinan Abnerqa payta Saulman pusarqan. 58 Saultaq tapuykurqan: –Wayna, ¿piqpa churinmi kanki? nispa. Davidtaq kutichirqan: –Ñoqaqa Belén llaqtayoq Isaí kamachiykiq churinmi kani, nispa.
