1 Samuel 16

1Señor Diostaq Samuelta nirqan: –¿Hayk'aqkamataq waqanki Saulmantari? Ñoqan Israelpi rey kananmanta wikch'upuniña. Phaway, hap'isqayki waqraman aceiteta hunt'achimuy, kachasqaykin Belén llaqtapi Isaipa wasinman. Paypa churinkunamantan hukkaqninta akllakuniña rey kananpaq, nispa. 2Samueltaq nirqan: –¿Imaynatataq risaqri? Risqayta yacharqospaqa Saulchá wañurqachipuwanqa, nispa. Señor Diostaq nirqan: –Huk malta wakata aysaykukuy, hinaspa ninki, Señor Diosman sacrificio haywaqmi rishani, nispa. 3Sacrificio haywanaykipaqtaq Isaita waqyachinki, chaypin ñoqa nisqayki ima ruwanaykitapas, hinaspa pitachus nisqayta aceitewan hawiykapuwanki rey kananpaq, nispa. 4Samueltaq Señor Diospa nisqanta hina ruwarqan. Belén llaqtaman chayaqtintaq kurak runakunaqa sinchi manchasqa taripamurqanku. Hinaspan payta tapuykurqanku: –¿Kusikuy willakuywanchu hamushanki? nispa. 5Paytaq nirqan: –Arí, Señor Diosman sacrificio haywaqmi hamushani. Ch'uyanchakamuychis, hinaspa sacrificio haywana pataman riysiwaychis, nispa. Isaitataq wawakunantinta Samuelqa ch'uyanchaykurqan, hinaspa invitarqan sacrificio haywanaman. 6Paykuna chayamuqtinkutaq Samuelqa Eliabta qhawarirqan: Kaytapunichá Señor Diosqa reypaq akllakurqan, nispa. 7Señor Diostaq Samuelta nirqan: –Aman qhawankichu rikch'ayninta, hatun kaynintapas, manan paytaqa munanichu. Manan ñoqaqa runa hinachu patallanta qhawani, runallan rikch'aynintaqa qhawan, ñoqan ichaqa sonqonta qhawani, nispa. 8Chaymantan Isaiqa Abinadabta waqyaspa Samuelman asuykachirqan. Samueltaq: –Manan kaypaschu Señor Diospa akllakusqanqa, nirqan. 9Samuelman chimpamunanpaq waqyallarqantaq Samata, Samueltaq nirqan: –Manan kaypas Señor Diospa akllakusqanchu, nispa. 10Ahinatakaman Isaiqa qanchisnintin churinkunata Samuelpa qayllanman asuykachirqan, Samueltaq nirqan: –Manan kaykunamanta mayqenpas Señor Diospa akllakusqan kanchu, nispa. 11Chaymi Samuelqa tapuykurqan: –¿Llapanchu churiykikuna kaypi kashan? nispa. Isaitaq nirqan: –Sullk'akaq churiy kashanraqmi oveja michinapi, nispa. Niqtinmi Samuelqa nirqan: –Usqhaylla waqyachimuy, manan sacrificiota haywasunmanchu chayamunankama, nispa. 12Waqyachimuqtintaq churinqa chayamurqan, payqa sumaq rikch'ayniyoq puka uya, munay ñawikunayoqmi karqan. Hinan Señor Diosqa Samuelta nirqan: –Kaymi chay akllakusqay, kunanqa hawiykapuway, nispa. 13Chaymi Samuelqa waqrapi aceitewan wawqenkunaq qayllanpi hawiykurqan, chaymantapachan Señor Diospa Espiritun Davidman hunt'aykurqan, Samueltaq Ramá llaqtata kutipurqan. 14Señor Diospa Espiritunmi Saulmanta t'aqarikapurqanña, hinaspan mana allin espirituta Señor Diosqa kachamurqan Saulta ñak'arichinanpaq. 15Oficialninkunataq nirqan: –Señor Diospa kachamusqan mana allin espiritun qantaqa ñak'arichishasunki. 16Chayrayku, reyniyku, ñoqaykuta kachawayku huk arpa tocaqta maskhamunaykupaq, mana allin espíritu ñak'arichishasuqtiyki arpata tocaspa sonqoykita tiyaykachinanpaq, nispa. 17Paykunatataq Saulqa nirqan: –Phawaychis, allin tocaqta maskhamuwaychis, nispa. 18Chaymi oficialninmanta huknin nirqan: –Belén llaqtapi Isaipa churinmanta huknin kanmi, arpa tocayta allinta yachaq, sumaq rimakuq, sinchi kallpayoq, maqanakuypaq kusallaña, payqa Señor Diospa yanapasqantaqmi kanpas, nispa. 19Hinan Saulqa Isaiman kacharqan: Oveja michiq David churiykita kachamuway, nispa niqta. 20Chaymi Isaiqa Saulman kachamurqan churin Davidta, asnopi t'anta cargaykusqata, huk qara p'uyñu vinontinta, huk cabrachantinta ima. 21Ahinatan Saulman Davidqa chayarqan, chaypin payqa Saulpa sinchi munasqa kamachin kapurqan, Saultaq arma apaysiqninta churakurqan. 22Hinaspan Davidpa taytan Isaiman kacharqan: Valekuykin churiykita qopuwanaykipaq, payqa gustawanmi, nispa. 23Sapa kuti Señor Diospa kachamusqan mana allin espíritu Saulta ñak'arichiqtintaq Davidqa arpanta hoqarispa tocaykuq, chayllan sonqonta tiyaykachikuq, mana allin espiritutaq paymanta t'aqarikuq.

will be added

X\