1 Samuel 15

1Chaymantan Samuelqa Saulta nirqan: –Señor Diosmi ñawpaqta kachamuwarqan qanta Israelpi rey kanaykipaq aceitewan hawiykunaypaq. Chayrayku, uyariy Señor Diospa rimasqanta. 2Tukuy-atiyniyoq Señor Diosmi nin: Egiptomanta Israel runakuna hamushaqtinkun Amalec runakuna hark'arqanku, chaymantan kunan paykunata ñak'arichisaq. 3Chayrayku, kunan phawaykuspa Amalec runakunata wañuchimuy, llapan kaqninkunatapas ch'usaqyachimuy. Ama khuyapayaykuspataq wañuchimunki llapa qharita, warmita, erqekunata, qholla wawakunatapas, hinallataq wakakunata, ovejakunata, camellokunata, asnokunatapas, nispa. 4Saultaq Telaim llaqtaman runakunata huñuspa yuparqan, chaypin iskay pachak waranqa chakipi soldadokuna karqan, Judamanta soldadokunataq chunka waranqa karqan. 5Chaykunapiwanmi Saulqa Amalecpa llaqtankama rispa, ch'aki mayuq kasqanpi pakakurqanku maqanakunankupaq. 6Cen runakunatataq Saulqa nirqan: –Qankunaqa kay Amalecpa llaqtanmanta ripuychis, ama paykunawan kuska wañuchisqa kanaykichispaq. Qankunaqa Egiptomanta Israel runakuna hamushaqtinkun khuyapayaykurqankichis, nispa. Chaymi Cen runakunaqa chay llaqtamanta ripurqanku. 7Hinan Saulqa wañurachirqan Amalec runakunata Havilamanta qallarispa Egipto suyu inti lloqsimuy lado Shur ch'inneqkama. 8Amalec runakunaq reynin Agagtataq presota hap'irqorqanku, llapan runakunatañataq espadawan wañurachirqanku. 9Saultaq soldadonkunapiwan Agagta mana wañuchirqankuchu, manallataq allichachaq ovejakunata, wakakunata, wira torillokunata, borregokunatapas wañuchirqankuchu, ch'usaqyachirqankuqa llapan mana imapaq valeq kaqkunallatan. 10Chaymi Señor Diosqa Samuelta nirqan: 11–Yanqapunin Saultaqa reyta churaykurqani, kamachisqaykunata mana hunt'aspan waqllirqapun, nispa. Niqtinmi Samuelqa llakikurqan, chay tutataq illariqta Señor Diosman waqyakurqan. 12Pacha illarimuytataq Samuelqa Saúl maskhaq purirqan, hinan runakunaqa willarqanku: –Saulqa Carmel llaqtantan muyumun, chaypitaqmi paymanta yuyarina saywata perqaspa Gilgal llaqtaman ripun, nispa. 13Chaymanmi Samuelqa chayarqorqan Saulpa kasqanman, Saultaq payta nirqan: –Señor Dios saminchasunki, kayqa Señor Diospa kamachiwasqantaqa hunt'arqamunin, nispa. 14Samueltaq nirqan: –Chay hinari, ¿ima ovejakunaq waqasqantataq uyarishani? ¿Ima wakakunaq waqasqantataq uyarishani? nispa. 15Saultaq nirqan: –Soldadokunan Amalec runakunamanta allichaqnin ovejakunata wakakunata ima apamurqanku, Diosniyki Señor Diosman sacrificio haywanankupaq, ichaqa llapantapunin wañuchimurqayku wakin uywakunataqa, nispa. 16Chaymi Samuelqa nirqan: –¡Upallay! Aswanpas uyariway, Señor Diospa qayna tuta niwasqantan willasqayki, nispa. Saultaq: –Niway, nirqan. 17Hinan Samuelqa nirqan: –Qan kikiykin pisipaq qhawarikurqanki, riki. Chay tukuywanpas Israel suyupi kamachikuqpuniraqmi kanki, Señor Diosmi Israelpi rey kanaykipaq aceitewan hawirqasunki. 18Hinaspan qanta Señor Diosqa allinta kamachispa kacharqasunki huchasapa Amalec runakunata hap'ispa llapanta wañuchimunaykipaq. 19Chayri, ¿imanaqtintaq qanri mana kasukuspa awqanmanta llat'anaspa qechumusqata apakamunki, Señor Diospa ñawpaqenpi mana allinta ruwaspa? nispa. 20Saultaq kutichirqan: –Ñoqaqa allintan ruwashani, Señor Diospa kamachiwasqantapas llapantan hunt'ashani, chaymi Amalec runakunaq reynin Agagtapas presota apamurqani, Amalec runakunatapas llapantan wañuchimurqani. 21Soldadokunan ichaqa wañuchinapaq kaq uywakunamanta allichaqninkunata wakata, ovejakunata apamurqanku Gilgalpi Diosniyki Señor Diosman haywanankupaq, nispa. 22Hinaqtinmi Samuelqa nirqan: –Señor Diospa qayllanpi aswan allinqa kasukuymi ruphachina sacrificiota wak sacrificiotawan haywaymantaqa. Aswan allinqa uyarikuymi, kasukuymi uywakunaq wiran ruphachinamantaqa. 23Señor Dios contra sayariqqa, watuqwan kuska huchachasqan, idolota yupaychaqwan kuskachasqan, chay llapa mana kasukuqkunaqa. Qanpas manañataq kamachikusqanta kasukunkichu chayqa, paypas rey kanaykitaqa manan munanñachu, nispa. 24Chaymi Saulqa Samuelta nirqan: –Cheqaqtapunin huchallikuni Señor Diospa kamachisqanta qanpa nisqaykitapas mana kasukuspa, llaqta runata manchakuspaymi mañakusqankuta ruwarqani. 25Pampachaykuwaypuni kay huchayta. Haku, kutiysiway Señor Diosta yupaychaykuq, nispa. 26Samueltaq nirqan: –Manan kutiysiykimanchu, Señor Diosmi Israelpi rey kanaykita mana munanñachu, paypa kamachinta mana hunt'asqaykimanta, nispa. 27Samuel ripunanpaq kutirishaqtintaq Saulqa capanmanta hap'ipakuspa ch'ullpanta llik'irqorqan. 28Chaymi Samuelqa kutirimuspa Saulta nirqan: –Ahinallatataqmi Señor Diosqa Israel suyupi rey-kayniyta qanmanta llik'iqapun, hinaspanmi qanmanta aswan allinnin kaq llaqtamasiykiman qopunña. 29Israelpa Qhapaq-atiyniyoq Diosninqa manan llullakuqchu, manataqmi yanqa runachu qhepataña yuyaykukunanpaqpas, nispa. 30Hinan Saulqa nirqan: –Huchallikunipunin, chay tukuywanpas valekuykin Israel kurak runakunaq qayllanpiqa reyta hinapuniraqyá qhawariway. Chhaynaqa, riysiwaypuniraq Diosniyki Señor Diosta yupaychaysimuway, nispa. 31Chaymi Samuelqa paypa qhepanta rirqan, Saultaq Señor Diosta yupaychaykurqan. 32Samueltaq nirqan: –Pusamuway Amalec runakunaq reynin Agagta, nispa. Agagtaq kusisqa Samuelpa ñawpaqenman hamurqan, phiñakuywan wañuchinakuyqa pasarqapunñan, nispa. 33Samueltaq nirqan: –Imaynan qanpas espadaykiwan askha warmiq wawanta wañurqarichirqanki, kaqllataqmi mamaykipas mana churiyoq kapunqa, nispa Agagta nak'aspa Gilgalpi Señor Diospa ñawpaqenpi kuchurqarirqan. 34Chaymantan Samuelqa Ramá llaqtata ripurqan. Saulñataq Gabaa llaqtapi wasinman kutipurqan. 35Manaña astawanpas Saulta rikuspataq, Samuelqa khuyayta waqarqan. Señor Diostaq llakikurqan Saulta Israel suyuman rey churasqanmanta.

will be added

X\