1 Samuelmi llapa Israel runakunata nirqan: –Tukuy ima munasqaykichistan ruwarqani, reyta munaqtiykichispas qoykichismi, 2 Kunanqa qankunawanmi reyniykichis kashan kamachinasuykichispaq. Ñoqaqa soqo uma machuñan kani, wawaykunapas qankunawanmi kashan. Wayna kasqaymantapachan qankunata kamachirqaykichis, 3 kunan qayllaykichispi kashaqtiy, Señor Diospa qayllanpi reyniykichispa qayllanpiwan uyaypi niwaychis, ima mana allintapas ruwarqaykichis chayqa. ¿Icha pimantachu qoykachikurqani wakantapas asnontapas? ¿Pitapas q'oturqanichu? ¿Pitapas saruncharqanichu? ¿Qolqeta qoykachikuspachu sayapakurqani? Chay hinata ruwarqani chayqa, kutichipusaqmi, nispa. 4 Paykunataq nirqanku: –Manan pitapas q'otuwarqankikuchu. Manan pitapas sarunchawarqankikuchu. Manan pimantapas imaykutapas qechuwarqankikuchu, nispanku. 5 Hinan Samuelqa nirqan: –Señor Dioswan akllakusqan reypiwanmi kunan p'unchay testigo kanku qankunaq ñoqapi mana ima mana allintapas tariwasqaykichismanta, nispa. Paykunataq nirqanku: –Arí, hinapunin chayqa, nispanku. 6 Chaymi Samuelqa nillarqantaq: –Señor Diosmi Moisestawan Aarontawan akllakurqan, hinallataq ñawpa taytaykichistapas Egipto suyumanta horqomurqan. 7 Kunantaq kaqllapi sayaykuychis, ñoqañataq Señor Diospa qayllanpi qankunata uyanchasqaykichis, tukuy imaymanakuna ñawpa taytaykichistapas qankunatapas qespichinanpaq Señor Diospa ruwasqanmanta yuyarichispa. 8 Yuyariychis imaynatachus Jacobqa Egiptoman haykusqanta. Chaypin ñawpa taytaykichis ñak'ariypi kaspanku Diosmanta waqyakurqanku, chaymantataq Señor Diosqa kachamurqan Moisesta Aarontawan. Paykunan taytaykichiskunata Egipto suyumanta horqomurqanku, hinaspan Señor Diosqa kaypi tiyaykachirqan. 9 Paykunataq ichaqa Diosninku Señor Diosta qonqapurqanku, chaymi Señor Diosqa paykunata hap'iykachirqan Hazor llaqta soldadokunaq umallin Sisaraq makinman, kaqllataq Moab suyu reypa makinmanpas, Filistea runakunaq makinmanpas, paykunawantaqmi maqanakushallarqanku. 10 Chaymi paykunaqa Señor Diosta waqyakuspa nirqanku: –Señor Diosniyku, huchallikuykun, qanta qonqapuspayku Baal dioskunata Astarte diosakunatawan yupaychaspayku. Kunanqa horqowayku awqaykuq makinmanta, qantataq servipusqaykiku, nispa. 11 Hinan Señor Diosqa kachamurqan Jerobaalta, chaymanta Baracta, Jeftetapas, hinallataq ñoqatapas kachamuwarqan. Muyuriqnintin awqaykichismantataq horqorqasunkichis thak-kaypi tiyakunaykichispaq. 12 Amón runakunaq reynin Nahas qankuna contra sayarimuqtintaq, Señor Dios qankunaq reyniykichis kashaqtin niwarqankichis: Manan, huk reytan munayku ñoqaykuta kamachiwanankupaq, nispa. 13 Kunanqa, kayqa akllakusqaykichis rey, mañakusqaykichistan Señor Dios qosunkichis. 14 Señor Diosllatañachus yupaychankichis chayqa, nisqantapas uyarinkichistaq, kamachikusqantapas kasunkichistaq, qankunawan reyniykichispiwan Diospaq hinapunitaq kawsankichispas chayqa, tukuy imapas allillanmi kanqa. 15 Manataq Señor Diosta uyarikunkichispaschu kasukunkichispaschu chayqa, qankuna contrallapunin kashanqa, imaynan taytaykichispaq karqan hina. 16 Kunantaq kaqllapi sayaykuychis Señor Diospa musphana ruwasqanta rikunaykichispaq. 17 Kunanqa chiraw tiempo trigo ichhuy kinraymi kashan riki. Chaymi ñoqa, Señor Diosmanta mañakusaq chikchita t'oqyachimunanpaq parata chayachimunanpaq. Qankunataq chayta rikuspa Señor Diosmanta reyta mañakusqaykichis sinchi hatun hucha kasqanta reqsikunkichis, nispa. 18 Hinaspan Samuelqa Señor Diosmanta mañakurqan, Señor Diostaq kaq ratopacha chikchita t'oqyachimurqan paratapas chayachimurqan. Chaymi llapa runakuna Señor Diosta Samueltawan pasaqta manchakurqanku. 19 Hinaspan llapallanku Samuelta valekurqanku: –Señor Diosta rogaykapuwayku ama wañunaykupaq, cheqaqtapunin llapan huchaykuman astawanraq yapaykusqayku huk reyta mañakusqaykuwan, nispanku. 20 Samueltaq paykunata nirqan: –Ama mancharikuychischu. Chay hinataña huchallikurqankichis chaypas, kunanmantaqa tukuy sonqowanyari Señor Diosta servikunkichis, amaña paymanta t'aqarikuspa. 21 Mana imapaq valeq idolokunataqa aman servinkichischu, chaykunaqa yanqan, manan yanapaytapas qespichiytapas atinkuchu. 22 Señor Diosmi Israeltaqa llaqtachakapurqan, chaymi payqa mana saqerparinqachu qhapaq sutin ama sarunchasqa kananpaq. 23 Manachus qankunapaq mañapusqaykichis chayqa, ñoqan huchallikusaq, ichaqa amapuni Señor Dios munachunchu. Aswanmi yachachisqaykichis allinkaqta cheqaqkaqtawan. 24 Chayrayku, Señor Diosllataña servikuychis cheqaq hunt'aq tukuy sonqoykichiswan, may musphanakunata qankunawan Señor Diospa ruwasqanta yuyarispa. 25 Mana allinkaqtachus ruwashallankichispuni chayqa, qankunapas reyniykichispas ch'usaqyachisqan kankichis, nispa.
