1 Samuel 10

1Chaypitaq Samuelqa Saulpa umanman aceitewan hich'aykurqan, hinaspan much'aykuspa nirqan: –Kunanmi Señor Dios akllasunki llaqtanta kamachinaykipaq. Qanmi Señor Diospa llaqtanta kamachinki, awqanña muyuykamuqtinpas hark'anki. Chaymantapas imaymanakunataraqmi Señor Diosqa rikuchisunki akllasqa kasqayki señalta hina. 2Chaymi ripuspayki tupanki iskay runawan Benjamín hallp'api Selsa llaqta qayllapi Raquelpa p'ampakusqan cheqaspi, paykunan willasunki: Taytaykiqa maskhasqaykichis asnokunata tarikapunñan, kunanqa qanmantañataqmi llakiykukushan: ¿Imanaykusaqtaq wawaymantaqa? nispa. 3Chaymanta rispaykitaq Taborpi encina sach'a chakipi kinsa runakunawan tupanki, paykunan Betel llaqtaman Dios yupaychaq rishaqkuna, hukmi kinsa cabrachata apashanqa, hukkaqtaq kinsa t'antata, hukkaqñataq qara p'uyñupi vinota. 4Paykunan napaykusunki, hinaspan iskay t'antata qosunki, chaytan chaskikullanki. 5Chaymantataq rispayki chayanki Diospa Orqon nisqaman, chaypin kashanqa Filistea soldadokunaq tropan. Chaymanta rispaykitaq, tupallankitaq huk t'aqa profetakunawan orqo patapi yupaychana cheqasmanta uraykamushaqwan. Ñawpaqenkutataq tocaqkuna uraykamushanqa arpata, tamborta, qenata, tawtinkutawan tocaspanku. Profetakunataq tususpa qaparkachaspa hamushanqaku. 6Hinan Señor Diospa Espiritun qanman qonqaylla uraykamunqa kallpachanasuykipaq, chaymi qanpas paykuna hina kapushallankitaq huk-hinaman tukuspa. 7Chaykuna kasunki chayqa, ima munasqaykitan ruwanki, Diostaq yanapasunki. 8Chaymantataq Gilgal llaqtaman rinki manaraq ñoqa rishaqtiy, chayman hamuspaymi Señor Diosman haywasaq sumaq kawsay sacrificiota ruphachina sacrificiotawan, ichaqa chayamunaykaman qanchis p'unchayta suyawanki, chaypiñan willasqayki imachus ruwanaykita, nispa. 9Hinaspan chay ratopacha kutirillaqtinraq, Saulpa sonqonqa huk-hinaman tukurqapurqan, sonqonta Diospa t'ikrarqosqanrayku. Chay kikin p'unchaypachataq Samuelpa nisqankunaqa llapan hunt'akurqan. 10Paykuna Diospa Orqon nisqaman chayaqtintaq, huk t'aqa profetakunaqa taripamurqanku, Señor Diospa Espirituntaq payman uraykamurqan sinchi atiywan, chaymi Saulqa paykuna hina kapushallarqantaq. 11Hinan Saulta huch'uyninmanta reqsiqkuna profetakunatawan rikuspa nirqanku: –¿Imanarqontaq Cispa churin Saultari? ¿Paypas profetamanchu tukurqapullantaq? nispa. 12Chaypi kaq runataq nirqan: –¿Pitaq paykunaq taytanri? nispa. Chaymantapachan rimay karqan: ¿Saulpas profetamanchu tukupun? nisqa. 13Saulpa profeta hina tusuyninmi qaparkachayninmi tukukapurqan, hinan orqo patapi yupaychana cheqasman chayarqan. 14Tiontaq Saulta kamachintawan tapuykurqan: –¿Maytataq rirqankichis? nispa. Paytaq nirqan: –Chinkasqa asnoyku maskhaqmi, manaña tarispaykutaqmi Samuelman tapukuq rirqayku, nispa. 15Tiontaq valeykukurqan: –¿Ima nintaq Samuelri? Willaykuwaypuni, nispa. 16Saultaq tionman willarqan: –Chinkasqa asnokunaq rikhurisqantan iman kaqllata willamuwanku, manataq sut'incharqanchu rey kananmanta nisqantaqa, ni imallatapas. 17Chaymantataq Samuelqa Señor Diospa ñawpaqenpi Israel runakunata Mizpa llaqtapi huñuchirqan. 18Hinaspan paykunata nirqan: –Israelpa Diosnin Señormi kay hinata nin: Ñoqan horqomurqaykichis Egipto suyumanta chay runakunaq kamachinpi kashaqtiykichis, kaqllataq wakin llakichiqniykichis llaqtakunamantapas horqorqaykichis, nispa. 19Diosmi chay tukuy imaymana sasachayniykichispi llakiyniykichispi yanapaykurqasunkichis, qankunataq ichaqa payta saqerparipuspa ninkichis: Reyta qowayku kamachiwanankupaq, nispa. Chhaynaqa, Señor Diosman qayllaykamuychis ayllu-ayllu huñusqa, chay ukhupitaq familiantinkama t'aqasqa, nispa. 20Hinaspan Samuelqa llapa ayllukunata chimpaykachikurqan, Benjamín ayllutataq Señor Diosqa akllakurqan. 21Hinaspataq Benjamín aylluta chimpachikurqan familiantinkama t'aqasqata, chaymantan Matri familia akllasqa karqan. Chaymantañataq qharitakama chimpachikusqanmanta Cispa churin Saulta akllarqan. Payta maskhamuspankutaq mana tarimurqankuchu. 22Chaymi wakmanta Señor Diosta tapurqanku: –¿Icha kanraqchu huk runapiwan qayllaykamuq? nispa. Chaymi Señor Diosqa kutichirqan: –Saulmi q'epi-q'epi ukhupi pakakamushan, nispa. 23Chaymi phawarispa pusarqamurqanku, chawpiman sayaykachiqtinkutaq llapan runata altonmanta hatun-kayninpi qhawaykuq. 24Samueltaq llapa runata nirqan: –¡Qhawariychis Señor Diospa akllakusqanta! Pay hinaqa manan pipas llaqtantinmanta kanchu, nispa. Hinaqtinmi llapa runaqa kusikuymanta qaparirqan: –¡Kawsachun reyqa! nispanku. 25Chaymantataq Samuelqa llapa runaman reypa imachus ruwanankunata lliwta willarqan, hinaspan chayta huk qelqanaman qelqaykuspa, Señor Diospa ñawpaqenman waqaychaykurqan. 26Chaymantataq Samuelqa llapan runakunata wasinkuman kachapurqan, Saulpas Gabaa llaqtapi wasinman ripullarqantaq allin qharikunapiwan, chaykunaq sonqonmi karqan Señor Diospa tanqarisqan. 27Wakin millay runakunan ichaqa nirqanku: –¿Imaynatataq kayri atinman ñoqanchis qespichiyta? nispa pisichaspanku, hinaspan mana ima qokuyllatapas apamurqankuchu. Saultaq ichaqa ch'inlla qhawarirqan.

will be added

X\