1 Reyes 6

1Israel runakunaq Egipto suyumanta lloqsimpusqan tawa pachak pusaq chunka wata kashaqtin, tawa wataña Israelpi kamachikushaspa, wataq Zif nisqa iskaykaq killanpi Salomonqa Señor Diospaq wasita sayarichiyta qallarirqan. 2Señor Diospaq Salomonpa sayarichisqan wasiq ukhunmi kay hina tupusqa karqan: wask'anman iskay chunka qanchisniyoq metro, anchonman isqon metro, sayayninmantaq chunka kinsayoq metro kuskannin. 3Yupaychana wasiman haykuna wasiqa kay hinan karqan: wask'anman isqon metro, anchonmantaq tawa metro kuskannin. 4Salomonqa ventanakunatan churarqan, chaykunan karqan ukhun aswan hatun hawanmantaqa. 5Hinallataq yupaychana wasi perqawan k'askata ladopuranpi qhepanpiwan kinsa patata sayarichirqan, chaykunapitaq wasichakuna karqan. 6Pampakaq muyuriq wasichakunaq anchonmi karqan iskay metro iskay chunka phisqayoq centímetro, iskay pata muyuriq wasichakunaq anchonmi karqan iskay metro qanchis chunka centímetro, kinsa pata muyuriq wasichakunaq anchonmi karqan kinsa metro chunka phisqayoq centímetro. Yupaychana wasi perqataqa anchotan qallarirqanku, kinsa kutitataq suchuykachirqanku muyuriq pata kurkukunata chayman chakanapaq, ahinapin perqata mana t'oqorqankuchu. 7Wasitaqa sayarichirqanku rumi qolqapi wakichisqa rumikunawanmi, chayraykun wasita perqashaspaqa mana takarqankuchu martillowanpas hachawanpas, manataq ima herramientawanpas. 8Pampakaq muyuriq wasichakunaq punkunmi karqan yupaychana wasiq uray ladonpi, iskaykaq patapas kinsakaq patapas muyurispa seqanayoqmi karqan. 9Wasi perqayta tukuspataq Salomonqa cedro kurkuwan chakaspa cedro tablawan wasiq altonta mast'arqan. 10Yupaychana wasi perqawan k'askata cedro kurkuwan hap'ichisqata kinsa patata sayarichirqan, sapanka pata iskay metro iskay chunka phisqayoq centímetro sayayniyoq karqan. 11Hinan Señor Diosqa Salomonta nirqan: 12–Kay yupaychana wasita sayarichishasqaykirayku kayta nisqayki: Kamachikuyniyta, unanchayniyta, tukuy chaninchayniykunatapas kasukunki chayqa, taytayki Davidman qanmanta prometesqaytaqa hunt'asaqmi. 13Israel runakuna ukhupin tiyasaq manataq Israel llaqtaytaqa saqerparisaqchu, nispa. 14Salomonmi yupaychana wasi sayarichiyta tukupurqan. 15Wasi ukhu perqatan cedro tablawan k'askachirqan pampamanta altopi kurku chakasqakama, pampantataq pino tablawan mast'arqan. 16Hinallataq wasi ukhupi qhepa cheqaspi isqon metro wask'ayoqta t'aqarqan, pampamanta altopi kurku cheqaskama cedro tablawan churaspa, chaymi karqan Ch'uyay-ch'uya Cheqaspaq. 17Ch'uyay-ch'uya Cheqasman qatiq cheqastaq wask'anman chunka pusaqniyoq metro karqan. 18Wasi ukhuqa llapanmi cedro tablawan llup'asqa karqan, manataq rumiqa rikhurirqanchu. Chay tablakunapin purukunata t'ikakunata llaqllaspa thuparqanku. 19Salomonmi yupaychana wasipi Ch'uyay-ch'uya Cheqasta wakichirqan Señor Diospa rimanakuynin arcata churananpaq. 20Ch'uyay-ch'uya Cheqasqa isqon metron karqan, anchonmanpas, wask'anmanpas, sayayninmanpas. Hinaspan Salomonqa chayta qoriwan qatarqan, chayman haykuna cheqaspitaq cedromanta altarta churarqan. 21Hinallataq yupaychana wasi ukhuta qoriwan qatarqan, Ch'uyay-ch'uya Cheqas haykunatataq qori cadenawan wisq'aykurqan. 22Ahinatan llapan wasi ukhuta qoriwan qatarqan, hinallataq Ch'uyay-ch'uya Cheqaspi kashaq altartapas qatarqan. 23Ch'uyay-ch'uya Cheqaspitaq iskay querubinkunata olivo k'ullumanta ruwarqan. Chay querubinkunan sapanka karqan tawa metro kuskan sayayniyoq. 24Sapanka raphrankunataq karqan iskay metro iskay chunka phisqayoq centímetro, chaymi huk raphraq puntanmanta hukkaq raphraq puntankamaqa tawa metro kuskannin karqan. 25Hinallataq hukkaqnin querubinpas tawa metro kuskannin, iskaynin querubinkunaqa sayaypuran karqanku, anchonmanpas kasqanpurataq. 26Sapanka querubinkunan tawa metro kuskannin sayayniyoqkama karqan. 27Chaykunatan Salomonqa Ch'uyay-ch'uya Cheqasman churarqan raphranku mast'arisqatakama. Chaymi paña ladopi kaq querubinpa huk raphran perqata tuparqan, huk raphrantaq lloq'e ladopi kaq querubinpa raphranta tuparqan. Lloq'e ladopi kaq querubinpa huk raphrantaq perqata tuparqan, huk raphrantaq paña ladopi kaq querubinpa raphranta tuparqan. 28Chaymantataq querubinkunata qoriwan qatarqan. 29Ch'uyay-ch'uya Cheqas ukhu perqapi, hinallataq Ch'uya Cheqas ukhu perqapipas querubinkunata, palmerakunata, t'ikakunata llaqllaspa thuparqan. 30Hinallataq Ch'uyay-ch'uya Cheqas pampatapas Ch'uya Cheqas pampatapas qoriwan mast'arqan. 31Ch'uyay-ch'uya Cheqaspa iskayman kichakuq punkuntaqa olivo kurkumantan ruwarqan, chay punkuq marcontaq phisqa esquinayoq karqan. 32Chay punkupitaq querubinkunata palmerakunata t'ikakunata llaqllaspa thuparqan, hinaspataq punkupi llaqllasqa rikch'aykunatapas lliwta qoriwan qatarqan. 33Yupaychana wasi haykuna punkuq marcontataq olivo kurkumanta ruwarqan tawa esquinayoqta. 34Pino kurkumantataq iskayman kichakuq punkuta ruwarqan, sapanka ladon iskayman q'echukuq karqan. 35Hinallataq chay punkupi llaqllaspa thuparqan querubinkunata, palmerakunata, t'ikakunata ima, hinaspa qoriwan qatarqan. 36Hinallataq yupaychana wasiq ñawpaqenpi huk patiota ruwarqan, chayta perqaspan thupasqa rumiwan sapa kinsa patata muyurispa, huk patata cedro kurkuwan churarqan. 37Señor Diospa wasin teqsitan rey Salomonqa churarqan Zif nisqa iskaykaq killapi tawa wataña kamachikushaspa. 38Yuyaykusqanman hinan tukuy imaymanantinta wasita tukurqan wataq Bul nisqa pusaqkaq killanpi, chunka hukniyoq wataña kamachikushaspa. Chhaynapin rey Salomonqa Dios yupaychana wasi sayarichiyta qanchis watapi tukurqan.

will be added

X\