1 Reyes 3

1Salomonmi Egipto suyu rey Faraonwan aylluchakurqan, chaymi rey Faraonpa ususinwan casarakurqan, hinaspa Davidpa Llaqtan nisqaman payta pusarqan. Chaypitaq tiyarqanku, reypa wasintapas, Dios yupaychana wasitapas, Jerusalén llaqta muyuriq perqatapas sayarichiyta tukunankukama. 2Chaykamaqa manan Señor Dios yupaychana wasita sayarichirqankuraqchu, chaymi orqo patakunapi yupaychana cheqaskunapi sacrificiota haywaqku. 3Salomonqa munakurqanmi Señor Diosta, hunt'arqantaq David taytanpa kamachisqan simikunata, ichaqa orqo patakunapin yupaychana cheqaskunapi sacrificiota haywaq inciensotapas ruphachiq. 4Gabaón llaqtapin karqan aswan mentasqa orqo patapi yupaychana cheqas. Hinan reyqa sacrificio haywaq Gabaonta rirqan, chay altarpin waranqa sacrificiota ruphachispa haywarqan. 5Gabaonpin chay tuta Señor Diosqa Salomonman mosqoypi rikhurispa nirqan: –Ima munasqaykita mañakuway, ñoqataq qosqayki, nispa. 6Hinan Salomonqa kutichirqan: –Taytay Davidmi qanpaq hunt'aq karqan, chanintaq allin runataq, chaymi qanqa tukuy tiempo khuyapayarqanki. Qanqa kaqllapunin chay hatun mana tukukuq khuyapayakuyniykiwan payta munakushanki, chayraykun qanqa kamachikunan tiyanapi churinta tiyaykuchinki. 7Chay hinaqa, Diosníy, Señor Dios, qanmi David taytaypa rantinpi kamachikuqta churawarqanki, ichaqa waynallaraqmi kani, manan imatapas yachaniraqchu. 8Chaywanpas akllakusqayki llaqtaykiwanmi kashani, paykunaqa ancha hatun mana yupay atina llaqtan. 9Allin yachayta qoykuway llaqtaykita kamachinaypaq, allinta mana allinta yachaspa chaninchanaypaq, mana chayqa manan pipas kay hatun llaqtaykita kamachiyta atinmanchu, nispa. 10Chay hinata mañakuqtinmi, Señor Diosqa Salomonta nirqan: –Allinmi. 11Qanqa manan mañakuwankichu unay kawsaytapas qhapaq kaytapas awqaykikunaq wañunantapas, aswanpas allin yachayllata allin chaninchaywan kamachinaykipaq mañakuwanki. 12Chay hinaqa, qosqaykin mañakuwasqayki allin yachayta allin yuyaytawan. Qanmanta ñawpaqtaqa manan qan hina yachaysapa karqanchu, manataqmi qhepaykitapas kanqachu. 13Qollaykitaqmi qhapaq kaykunatapas atiytapas, chaykunataqa manan mañakuwarqankichu, tukuy kawsasqayki p'unchaypiqa manan qan hina reyqa kanqachu. 14Taytayki David hina munayniyta ruwanki, kasukunkitaq kamachikuyniykunata unanchayniykunatapas chayqa, unaytan kawsachisqayki, nispa. 15Salomontaq puñusqanmanta rikch'arispa mosqoy kasqanta repararqan. Jerusalenman kutipuspataq Señor Diospa rimanakuynin arcaman asuykurqan, hinaspa ruphachina sacrificiokunata, sumaq kawsay sacrificiokunatawan haywarqan. Chay qhepatataq llapan oficialninkunaman hatun mikhuyta haywarqan. 16Chay tiempopin iskay rabona warmikuna reyman rirqanku. 17Reyman asuykuspankutaq, huknin warmi nirqan: –¡Ay! ¡Señor reyníy! Kay warmipiwanmi kuska huk wasillapi tiyayku, hinan ñoqa paypa qayllanpi tiyasqayku wasipi huk qhari wawata wachakurqani. 18Wachakusqaymanta kinsa p'unchayña kashaqtiytaq, kay warmipas huk qhari wawata wachakullarqantaq. Iskaynillaykun kasharqayku, manan pipas wak runa chay wasipi ñoqaykuwan karqanchu, aswanpas ñoqayku iskaynillaykupuni. 19Hinan huk tuta kay warmiqa wawan patapi puñurqakapusqa, chaymi wawanqa mukisqa wañupusqa. 20Hinan kuska tutata hatarirqospa, ñoqa puñushaqtiy wawayta puñunaymanta aparqowaspa puñunanman siriykuchisqa, ñoqaq puñunaymantaq paypa wañusqa wawanta siriykuchimuwasqa. 21Pacha illarimuytataq ñuñunaypaq rikch'arispa wawayta qhawaykurqani, wañusqataq kapushasqa. Ichaqa tutamanta inti k'anchaypiña allinta qhawaykuspaymi repararqani mana wachakusqay wawaychu kasqanta, nispa. 22Hukkaq warmitaq nirqan: –¡Manan! Kawsashaqkaqmi ñoqaq wawayqa, wañusqakaqqa qanpan, nispa. Ñawpaq rimaq warmitaq kutichirqan: –¡Manan hinachu! Wañusqakaqmi qanpa, kawsashaqkaqqa wawaypunin, nispa. Ahinatan reypa ñawpaqenpi ch'aqwarqanku. 23Chaymi reyqa nirqan: –Huknin warmin nin: Kawsashaqkaqmi ñoqaq waway, wañusqakaqqa qanpan, nispa. Hukkaq warmitaq nin: Manan, kawsashaq wawaqa ñoqaqmi, wañusqa wawan qanpaqa, nispa. 24Chaymi reyqa kamachikurqan: –¡Apamuwaychis espadata! nispa. Espadata payman apamuqtinkutaq, 25nirqan: –Kawsaqkaq wawata iskayman phasmiychis, hinaspa sapankaman kuskanta qoychis, nispa. 26Kawsaq wawaq mamanpuni kaq warmitaq ichaqa wawanmanta sinchita ukhu sonqonmanta llakikuspa reyta valekurqan: –¡Reyníy! ama hinachu kay, ama wawata wañuchiychu, aswanpas kay warmiman qopuy, nispa. Hukkaq warmitaq nirqan: –Manan ñoqamanpas qanmanpas qowasunmanchu. ¡Iskayman phasmikuchun! nispa. 27Hinan reyqa chaninchaspa kamachikurqan: –Wawaq mana wañunanta munaq warmiman wawata qopuychis, ama wañuchiychischu. Paymi chay wawaq cheqaq mamanqa, nispa. 28Llapan Israelmi yacharqan imaynatachus chay ch'aqwayta reypa chaninchasqanta, chaymi anchata reyta respetarqanku, yacharqankutaq chaninchaywan juzgananpaq Diospa yachay qosqanta.

will be added

X\