1 Reyes 21

1Jezreel llaqtayoq Nabotpan chay llaqtapi uvas chakran karqan Samaria rey Ahabpa kamachikunan wasi qayllapi. 2Huk p'unchaymi Ahabqa Nabot-ta nirqan: –Uvas chakraykita qopuway chaypi verdura huertay kananpaq, wasiy qayllapitaq kashanpas chayqa. Chakraykiq rantinpiqa aswan allin uvas chakratan qopusqayki, mana chaytaq qolqeta hayk'achus valesqanta pagapusqayki, nispa. 3Nabot-taq ichaqa kutichirqan: –Amapuni Dios munachunchu ñawpa taytaykunamanta herencia chaskisqay chakrata qonaytaqa, nispa. 4Hinan Ahabqa llakisqataq phiñasqataq wasinta ripurqan, Nabotpa: Manan qoykimanchu, nisqan hawa. Chayaspataq puñuykurqan perqa lado kutirisqa, manataq mikhuytapas munarqanchu. 5Hinan warmin Jezabelqa payman qayllaykuspa nirqan: –¿Imamantataq sinchi llakisqa kashanki, manataq mikhuytapas munankichu? nispa. 6Ahabtaq kutichirqan: –Jezreelmanta Nabot-tan nirqani: Uvas chakraykita vendepuway, mana chaytaq rantinpi huk uvas chakrata qopusqayki, nispa. Paytaq ichaqa mana qoyta munawanchu, nispa. 7Hinan warmin Jezabelqa kutichirqan: –¿Manachu qanqa Israel suyu kamachiq kashanki? ¡Sayariy, mikhumuy! ¡Ama llakikuychu! ¡Ñoqan qochisqayki Nabotpa uvas chakrantaqa! nispa. 8Chaymantataq Jezabelqa Ahabpa sutinpi cartakunata qelqarqan, reypa selloyoq anillonwantaq ñit'iykurqan, hinaspa apachirqan Nabotpa tiyasqan llaqtapi kurak runakunaman umallikunamanwan. 9Chay cartakunapin nirqan: Ayunanapaq kamachiychis. Nabot-tataq runakunaq ñawpaqenpi tiyaykuchiychis. 10Hinallataq iskay millay runatapas Nabotpa ñawpaqenpi tiyaykuchiychis, hinaspa chay runakunata pay contra rimachiychis: Arí, ñakanpunin Diostapas reytapas, nispa. Chay qhepatataq llaqta hawaman horqospa rumiwan ch'aqespa wañuchinkichis, nispa. 11Nabotpa tiyasqan llaqtapi kurak runakunan umallikunapiwan Jezabelpa cartanpi kamachikusqanman hina ruwarqanku. 12Ayunanapaq kamachirqanku, Nabot-tataq runakunaq ñawpaqenman tiyaykuchirqanku. 13Chaymantataq iskay millay runakuna chayamuspa Nabot contra llapa runaq qayllanpi rimarirqanku: –Arí, ñakanpunin Diostapas reytapas, nispa. Hinan llaqta hawaman horqorqanku, chaypitaq rumiwan ch'aqespa wañuchirqanku. 14Chay qhepatataq Jezabelman willaqta kacharqanku: Nabotqa ch'aqesqan wañupun, nispa. 15Jezabeltaq chayta yacharqospa hina Ahabta nirqan: –Phaway, Jezreel llaqtayoq Nabotpa uvas chakranta hap'ikamuy, payqa manan vendeyta munarqasunkichu, kunanqa wañupunmi, nispa. 16Ahabtaq Nabotpa wañupusqanta yachaspa sayarirqan, hinaspa rirqan uvas chakranta hap'ikapunanpaq. 17Señor Diostaq Tisbe llaqtayoq Eliasta nirqan: 18–Phaway Samariapi tiyaq Israel rey Ahabman. Payqa Nabotpa uvas chakranta hap'ikapuqmi rin. 19Paytan ninki, Señor Diosmi nin: ¿Nabot-ta wañuchispaykichu kunanqa chakrantañataq hap'ikapushanki? May cheqaspichus Nabotpa yawarninta alqokuna llaqwarqan, chay cheqasllapitaqmi qanpa yawarniykitapas alqokuna llaqwanqa, nispa. 20Ahabtaq Eliasta nirqan: –Chay hinaqa, ¿tarirqamuwankichu qan awqayqa? nispa. Eliastaq kutichirqan: –Arí, tarirqamuykin. Qanqa Señor Diospa ñawpaqenpi mana chanin ruwaykunamanmi k'askaykukunki. 21Chaymi Señor Diosqa nin: Hatun llakitan qanman chayachimusqayki, hinaspan llapan mirayniykita tukupusaq, mirayniykimanta Israelpi kashaq llapa qharikunatan ch'usaqyachisaq. 22Ahinaqa, imaynan Nabatpa churin Jeroboampa aylluntapas, Ahiaspa churin Baasaq aylluntapas ruwarqani, ahinatan aylluykitapas ruwasaq, Israelta huchallichisqayki hawa ñoqatapas phiñachiwasqayki hawa, nispa. 23Jezabelmantataq Señor Diosqa nin: Jezreelpi kaq chakrapin Jezabeltaqa alqokuna mikhunqa, nispa. 24Nillantaq: Qanpa aylluyki llaqtapi wañuqtinqa, alqokunan mikhunqa, campopi wañuqtintaq phalaq animalkuna mikhunqa, nispa. 25Manan pipas Ahab hina Señor Diospa ñawpaqenpi mana chanin ruwaykunaman k'askasqa karqanchu, paytaqa warmin Jezabelmi sinchita yuyaycharqan mana allinta ruwananpaq. 26Idolokunata yupaychaspanmi sinchi mana chaninta huchallikurqan, imaynan Amor runakuna ruwarqanku hinata, paykunatan Señor Diosqa Israel runakunaq ñawpaqenmanta wikch'usqa. 27Ahabqa tukuy chaykunata uyarispanmi p'achanta llik'ikurqan, qhasqa p'achawan p'achakuspataq ayunarqan. Chay p'achantinmi puñurqan, sinchi llakisqataq purirqan. 28Hinan Señor Diosqa Eliasta nirqan: 29–¿Rikunkichu imaynatachus Ahabpa ñawpaqeypi huch'uyyaykukusqanta? Chay hinaqa, ñawpaqeypi huch'uyyaykukusqanrayku, pay kawsashaqtinqa manan ayllunman hatun llakita chayachisaqraqchu, aswanpas churinpa tiemponpiñan, nispa.

will be added

X\