1 Siria suyu rey Ben-Hadadmi llapan ejercitonta huñuykurqan Samaria llaqtata phawaykunanpaq. Riysirqantaq yanapanakunankupaq rimanakusqan kinsa chunka iskayniyoq reykuna caballokunantin carretakunantin ima. Hinaspa Samaria llaqtata muyuykuspa phawaykurqanku. 2 Hinaspan chay llaqtaman willaqkunata kacharqan Israel rey Ahabman willamunankupaq, 3 Ben-Hadadmi nin: Qoriykipas qolqeykipas, warmiykikunapas, allinninkaq wawaykikunapas ñoqaqmi, nispa nimunankupaq. 4 Israel reytaq kutichirqan: –Arí, señor reyníy, nisqayki hinapunin, ñoqapas tukuy kaqniykunapas qanpapunin, nispa. 5 Willaqkunataq wakmanta Ahabman kutispa nirqanku: –Ben-Hadadmi nin: Willachiykiñan qoriykitapas, qolqeykitapas, warmiykikunatapas, wawaykikunatapas qonawaykipaq. 6 Chaywanpas paqarin kay horastan oficialniykunata kachamusaq wasiykitapas oficialniykikunaq wasintapas maskhakunankupaq, hinaspa tukuy munasqayki kaqkunata paykunapaq apakunqaku, nispa. 7 Hinan Israel reyqa suyupi llapan kurak runakunata waqyachimurqan, hinaspa nirqan: –Warmiykunatapas wawaykunatapas qoriytapas qolqeytapas qopusqaykin nishaqtiypachan chay reyqa mana allinta ruwayta munawanchis, reparaychis kayta, nispa. 8 Kurak runakunataq llapan runakunapiwan kutichirqanku: –Ama uyariychu, amallataq kasuychu, nispa. 9 Hinan Ahabqa Ben-Hadadpa kachamusqankunata nirqan: –Wiraqochay reyta niychis: Ñawpaqkaq kamachiwasqantaqa tukuytan ruwasaq, kunan mañakusqantan ichaqa mana atiymanchu, nispa. Kachasqakunataq Ben-Hadadman rirqanku chayta willanankupaq. 10 Hinan Ben-Hadadqa juraspa Ahabman willaqkunata kachallarqantaq: ¡Samariapichus hallp'a ñut'ullapas qhepanman runaykunaman huk hach'iyta sapankaman qonaypaq chayqa, dioskuna sinchita muchuchiwachun! nispa. 11 Israel reytaq kachasqakunaman kutichirqan: –Ama hatunchakuychu manaraq atipashaspaqa, nispa. 12 Ben-Hadadqa rimanakusqan reykunapiwanmi karpakunapi machasharqanku kachasqakuna willakuyta kutichimuqtin. Chaymi oficialninkunata nirqan: –¡Phawaykuychis! nispa. Hinan llapanku wakichikurqanku llaqtata phawaykunankupaq. 13 Chaykamataq Israel rey Ahabman huk profeta qayllaykuspa nirqan, Señor Diosmi nin: ¿Rikunkichu ancha askha ejercitota? Kunanmi paykunata hap'ichisqayki, ahinapin yachanki ñoqa Señor Dios kasqayta, nispa. 14 Hinan Ahabqa tapuykurqan: –¿Piwantaq atipachinqari? nispa. Profetataq kutichirqan, Señor Diosmi nin: Provinciakunapi kamachikuqkunaq yanapaqnin waynakunawanmi, nispa. Chaymi Ahabqa tapuykullarqantaq: –¿Pitaq phawaykunqa ñawpaqtari? nispa. Profetataq kutichirqan: –Qanmi, nispa. 15 Hinan Ahabqa provinciakunapi kamachikuqkunaq yanapaqnin waynakunata wakichirqan, chaykunan karqan iskay pachak kinsa chunka iskayniyoq, hinallataq llapan Israel soldadokunatapas wakichirqan, chaykunataq karqan qanchis waranqa. 16 Hinaspa chawpi p'unchayta lloqsirqanku, chaykamataq Ben-Hadadqa yanapanakunankupaq rimanakusqan kinsa chunka iskayniyoq reykunapiwan karpakunapi machashallarqanku. 17 Kamachikuqkunaq yanapaqninkunataq ñawpaqta lloqsirqanku. Ben-Hadadpa qhawaq kachasqankunataq payman willarqanku: –Samariamantan wakin qharikuna hamushanku, nispa. 18 Hinan Ben-Hadadqa kamachikurqan: –¡Maqanakuqña sumaqpiña hamushaqtinkupas, kawsashaqta pusamuwaychis! nispa. 19 Provinciakunapi kamachikuqkunaq yanapaqninkunataq Samaria llaqtamanta lloqsirqanku, qhepankutataq ejército rirqan. 20 Yanapaqkunataq huk awqankuta sapanka wañuchirqanku, chaymi usqhaylla Siria runakunaqa ayqekapurqanku. Israel runakunataq paykunata qatirqanku, Siria rey Ben-Hadadtaq ichaqa caballopi ayqerqan wakin caballería soldadokunapiwan. 21 Chaykamataq Israel reyqa chayamurqan, hinaspan caballonkuta carretankuta munaychakuspa Siria runakunata sinchitapuni atiparqan. 22 Chay qhepatataq Israel reyman profetaqa qayllaykuspa nirqan: –Phaway, ejercitoykita astawan kallpachamuy, hinaspa allinta yuyaykuy imaynata ruwanaykita, Siria reyqa huk watamantan wakmanta phawaykusunki, nispa. 23 Siria reypa oficialninkunataq payta nirqanku: –Israel runakunaq diosninkunaqa orqo-orqo dioskunan kanku, chaymi atipawarqanchis. Ichaqa pampapi paykunawan maqanakusun chayqa, atipasunchismi. 24 Chay hinaqa, señor reyniyku, allinmi kanman yanapaqniyki reykunata horqospa rantinkupi ejército oficialkunata churawaq. 25 Chaymantataq huk ejercitota wakichikuwaq atipachikuqkuna hayk'achus karqan chay chhikata, hinallataq caballokunatapas, carretakunatapas hayk'achus karqan chay chhikata. Paykunawantaq pampapi maqanakusunchis, hinaspaqa atiparqosunpunin, nispa. Ben-Hadadtaq yuyaychasqankuta chaskirqan, hinaspan nisqankuman hina ruwarqan. 26 Ben-Hadadqa huk wata qhepatan Siria ejercitota wakichirqan, hinaspa Afec llaqtaman rirqanku Israel runakunawan maqanakuq. 27 Hinallataq Israel runakunapas wakichikurqan, hinaspa mikhunata chaskispanku Siria runakunawan maqanakuq puririrqanku. Siria runakunaq ñawpaqenpi huñuykukuspankuqa ñak'aymi iskay majada cabrakuna hinalla karqanku, Siria runakunataq ichaqa llapan pampata llimp'arqanku. 28 Chay raton Israel reyman huk profeta qayllaykuspa nirqan, Señor Diosmi nin: Siria runakunan ñoqamanta ninku: “Payqa orqo-orqo diosllan, manan pampakunaq diosninchu”, nispa, chayraykun qanman hap'ichisqayki llapan chay ancha askha runakunata. Ahinapin yachanki ñoqa Señor Diosqa kasqayta, nispa. 29 Qanchis p'unchaymi chimpapurantin Israel soldadokunawan Siria soldadokunawan huñusqa kasharqanku, qanchiskaq p'unchaypitaq maqanakurqanku. Hinan Israel soldadokunaqa chay p'unchay pachak waranqa chakipi puriq Siria soldadokunata wañuchirqanku. 30 Wakin soldadokunataq Afec llaqtaman ayqekurqanku, chay llaqtaq muyuriq perqantaq thuniykukurqan iskay chunka qanchisniyoq waranqa soldadokuna pataman. Ben-Hadadpas chay llaqtaman ayqellarqantaq, huk wasi ukhupitaq allinta pakakurqan. 31 Hinan oficialkuna nirqan: –Yachaykun Israel reykunaqa khuyapayakuq kasqankuta, chay hinaqa, qhasqa p'achawan phalikakusun, kunkanchismantaq huk waskhawan watuchakusun, hinaspa Israel reyman risun, ichapaschá mana wañuchisunkichu, nispa. 32 Hinan churakurqanku qhasqa p'achawan, kunkankumantaq waskhata, Israel reyman qayllaykuspataq nirqanku: –Ben-Hadad kamachiykin valekusunki ama wañuchinaykipaq, nispa. Ahabtaq kutichirqan: –¿Kawsashanraqchu? ¡Payqa wawqey hinan! nispa. 33 Qharikunataq chay nisqanta allinpaq hap'irqanku, hinaspa manaraq chay simi rimayta tukushaqtin kaq rato kutichirqanku: –¡Arí! ¡Ben-Hadadqa wawqeykin! nispa. Ahabtaq nirqan: –¡Phawaychis pusamuychis! nispa. Hinan Ben-Hadadqa Ahabman qayllaykurqan, Ahabtaq carretanman seqachirqan. 34 Ben-Hadadtaq nirqan: –Taytaypa taytaykimanta qechusqan llaqtakunata kutichipusqayki, hinaspa Damascopi qhatuna wasikunata ruwawaq imaynan Samariapi taytay ruwarqan ahinata, nispa. Ahabtaq kutichirqan: –Chay hinata rimanakuspanchisqa kacharipusqaykin, nispa. Ahabqa Ben-Hadadwan rimanakuspanmi payta kacharipurqan. 35 Profeta t'aqamanta kaq huk qharin Señor Diospa kamachisqan kaspa, profetamasinta nirqan: –K'irirqoway, nispa. Paytaq ichaqa mana chayta ruwayta munarqanchu. 36 Chaymi profetaqa nirqan: –Señor Diospa kamachisqanta mana kasusqaykimantan kunan ñoqamanta t'aqarikuqtiyki, huk león wañuchisunki, nispa. Cheqaqtapunin profetamanta t'aqarikuqtin hina, huk leonqa payman phawaykuspa wañuchirqan. 37 Chay qhepatataq profetaqa wak qhariwan tupaspa nirqan: –K'irirqoway, nispa. Hinan chay qhariqa payta maqaspa k'irirqan. 38 Chaymantataq profetaqa ñan patata rispa reyta suyarqan. Mana reqsinanpaqtaq mat'inta t'eqekurqan. 39 Rey pasashaqtintaq profetaqa kunkayoqta nirqan: –Señor reyníy, ñoqa kamachiykin maqanakuypi kasharqani, hinan huk soldado qayllaykamuwaspa huk presota apamuwarqan. Niwarqantaq: Kay qharita allinta waqaychay, ayqekunqa chayqa, qanmi paymanta wañuchisqa kanki, mana chaytaq kinsa waranqa qolqeta paganki, nispa. 40 Ichaqa ñoqa kamachiyki imaymanata ruwashanaykamataq chay presoqa chinkarqowan, nispa. Israel reytaq kutichirqan: –Qan kikiykin imatachus ruwanata rimarinki, rimarisqaykiman hina huchachasqan kanki, nispa. 41 Hinan profetaqa mat'in t'eqekusqanta usqhaylla paskarqokurqan, chaymi reyqa reqsirqan profetamanta huknin kasqanta. 42 Chaymi profetaqa nirqan, Señor Diosmi nin: Wañuchinapaq huchachasqa qharitan qanqa kacharparinki, chayrayku paymanta kawsayniykiwan paganki, aylluykiwantaq paypa ayllunmanta paganki, nispa. 43 Hinan Israel reyqa Samariaman ripurqan llakisqataq phiñasqataq, hinaspa wasinman haykupurqan.
