1 Reyes 2

1Davidpa wañukapunan p'unchaymi qayllamusharqanña, chaymi churin Salomonta kamachirqan: 2–Lliw kay pacha runakuna hinan ñoqapas wañukapusaq. Kallpachakuy, qhari hina allinta puriy. 3Diosniyki Señor Diospa kamachikusqankunata hunt'ay munayninta ruwaspa, kamachikuyninta, chaninchayninta, unanchaynintapas hunt'anki, imaynan Moisespa kamachikuynin qelqapi kashan chayman hina, ahinapin tukuy ruwasqaykipipas purisqaykipipas Señor Diosqa saminchasunki. 4Hinallataq Señor Diosqa prometewasqan simita hunt'anqa, paymi niwarqan: –Wawaykikuna chaninta purispa tukuy sonqotaq ch'ulla yuyayllataq kasuwanqaku chayqa, mirayniykiqa Israelpi kamachikushallanqakupunin, nispa. 5Qanqa yachankiñan Sarviaq churin Joab imatachus ruwawasqanta, Israelpa ejerciton iskay umallikunatan wañuchirqan, Nerpa churin Abnerta, Jeterpa churin Amasatawan. Paykunatan wañuchirqan thak-kay tiempopi maqanakuypi wañuqmanta vengakuspa, ahinapin huchachachiwarqan chay runakunaq wañusqanmanta. 6Chayrayku allin yuyaywan payta ruway, amataq suyaychu machuyaspa thak-kaypi wañunantaqa. 7Galaadmanta Barzilaipa churinkunatan ichaqa allinta rikunki, wasiykipitaq mikhuchinki, paykunan allinta rikuwaspanku mikhunawan yanapaykuwarqanku, wawqeyki Absalonmanta ayqeshaqtiy. 8Kashallantaqmi Bahurimmanta Benjamín ayllu Geraq churin Simei. Paymi sinchi millayta qaparkachaspa ñakawarqan Mahanaimman rishasqay p'unchay. Chaymantataq ichaqa Jordán mayuman hamurqan chaskiwaqniy, hinan chaypi Señor Diospa sutinpi jurarqani mana wañuchinaypaq. 9Chaywanpas ama pampachaychu. Qanqa yuyaysapan kanki, chay hinaqa qanmi yachakunki imatachus paywan ruwanaykita, paytaqa wañuchinkipunin, nispa. 10Davidmi wañukapurqan, hinan Davidpa Llaqtan nisqapi p'ampapurqanku. 11Payqa tawa chunka watantinmi Israelpi rey karqan. Hebronmantan kamachikurqan qanchis watata, Jerusalenmantataq kinsa chunka kinsayoq watata. 12Chay qhepatataq Davidpa rantinpi churin Salomón kamachikurqan, kamachikuynintaq allin takyasqa karqan. 13Haguitpa churin Adoniasmi Salomonpa maman Betsabeman rirqan. Hinan Betsabeqa tapuykurqan: –¿Sumaqpichu hamushanki? nispa. Paytaq kutichirqan: –Arí, sumaqpin hamushani, nispa. 14Nillarqantaq: –Ama hinachu kay, hukta valekusqayki, nispa. Betsabetaq: –Niway, nirqan. Chaymi Adoniasqa nirqan: 15–Allintan qanqa yachanki suyu kamachina ñoqaman tupawasqanta, llapan Israel runakunapas ñoqaq rey kanaytan yuyasharqanku. Chaywanpas wawqeytan reyta churarqanku, Señor Diosmi chay hina kananta unancharqan. 16Chhaynaqa, valekuytan munashayki, amayá, “manan”, niwankichu, nispa. Betsabetaq kutichirqan: –Valekuway, nispa. 17Hinan Adoniasqa nirqan: –Rey Salomonta rimaykapuway Sunem llaqtayoq Abisagta warmiypaq qopuwananpaq. Manachá qantaqa, “manan”, nisunkimanchu, nispa. 18Betsabetaq kutichirqan: –Allinmi, ñoqaña reyta rimaykapusqayki, nispa. 19Hinan Betsabeqa rey Salomonman rirqan Adoniaspa valekusqan hawa. Rey Salomontaq mamanta chaskinanpaq sayarirqan, hinaspan mamanpa ñawpaqenpi k'umuykukurqan. Chaymantataq tiyananpi tiyaykapurqan, kamachirqantaq mamanpaq huk tiyanata apamunankupaq, hinan Betsabeqa reypa paña ladonpi tiyaykuspa nirqan: 20–Ama hinachu kay, hukllata valekuyta munashayki, amayá, “manan”, nirqowankichu, nispa. Reytaq kutichirqan: –Mañakuway ima munasqaykita mamitáy, manan, negasqaykichu, nispa. 21Betsabetaq nirqan: –Sunem llaqtayoq Abisagta Adonías wawqeykiman warminpaq qopuy, nispa. 22Reytaq mamanta tapuykurqan: –¿Imanaqtintaq Sunem llaqtayoq Abisagta Adoniaspaq mañakunki? ¡Suyu kamachikuyta qoykapunallaytaña mana mañakuwankichu! ¿Manachu payqa kurak wawqey? Paywanmi kashanku sacerdote Abiatarpas, Sarviaq churin Joabpas, nispa. 23Chaymi rey Salomonqa Señor Diospa sutinpi jurarqan: –¡Dios wañurqachiwachun chay rimasqanmanta Adoniasta mana wañuchisaqchu chayqa! 24Señor Diosmi taytay Davidpa kamachikunan tiyananpi tiyachiwaspa takyachiwarqan, prometekusqanman hinataq suyu kamachikuyta qowan ñoqaman mirayniymanwan. Chaymi Señor Diospa sutinpi jurani kunanpacha Adoniaspa wañunanta, nispa. 25Chay qhepatataq Joiadaq churin Benaiata kamachirqan Adoniasta wañuchimunanpaq. Paytaq rispa Adoniasta wañuchimurqan. 26Sacerdote Abiatartataq reyqa nirqan: –Anatot llaqtaykita ripuy, hallp'aykiman. Wañuchisqan kanayki, ichaqa manan wañuchisqaykichu Señor Diospa rimanakuynin arcata David taytaypa ñawpaqenta apasqaykirayku, taytaywan kuska tukuy llakikunata muchusqaykiraykupiwan, nispa. 27Ahinatan Salomonqa Señor Diospa sacerdoten kayninmanta Abiatarta wikch'upurqan, chay hinapin hunt'akurqan Elipa ayllunmanta Silopi Señor Diospa nisqan. 28Joabqa manan Absalonpa t'aqanchu karqan, aswanpas Adoniaspa t'aqanmi, chaymi Abiatarmanta yachaspa payqa Dios yupaychana karpaman phawarqan, chaypitaq altar waqrakunaman hap'ipasqa kasharqan. 29Hinan rey Salomonman willarqanku: –Joabmi Señor Dios yupaychana karpaman ayqen, altarman hap'ipaykukuspataq sayashan, nispa. Salomontaq Joiadaq churin Benaiata kamachirqan wañuchiq rinanpaq, 30hinan Benaiaqa Señor Dios yupaychana karpaman rispa Joabta nirqan: –Reymi kamachisunki lloqsinaykipaq, nispa. Joabtaq kutichirqan: –¡Manan! ¡Kaypin wañusaq! nispa. Hinan Benaiaqa reyman rispa Joabpa nisqanta willarqan. 31Reytaq nirqan: –Munasqanta hina ruway, payta wañuchiy hinaspa p'ampaykapuy. Ahinapi taytaypa ayllunmanta ñoqamantapas mana huchayoq runakunata Joabpa wañuchisqan huchata wikch'unki. 32Señor Diosmi runa wañuchisqan huchanmanta pay kikinta wañuchinapaq huchachan. Joabqa taytaypa mana yachasqallanmi paymanta aswan allin iskay chanin runakunata wañuchirqan: Israelpa ejerciton umalli Nerpa churin Abnerta, Judapa ejerciton umalli Jeterpa churin Amasatawan. 33Chay runakunata wañuchisqan huchamantaqa Joabpas mirayninpas wiñaypaqmi muchunqaku. Señor Diosmi ichaqa Davidta, mirayninta, kamachikuynintapas allinyachinqapuni, nispa. 34Hinan Benaiaqa rispa Joabta wañuchirqan, ch'inneq wasinpitaq payta p'ampapurqanku. 35Chaymantataq reyqa Benaiata ejerciton umallita churarqan Joabpa rantinpi, sacerdote Sadoctataq Abiatarpa rantinpi. 36Chay qhepatataq Salomonqa Simei sutiyoq runata waqyachispa kamachirqan: –Jerusalenpi wasita ruwakuy chaypi tiyanaykipaq, hinaspa ama maytapas llaqtamanta lloqsinkichu. 37Lloqsispachus Cedrón mayuta pasanki chayqa, wañunkipunin, qan kikiykin wañunaykipaq huchachakunki, nispa. 38Simeitaq reyman kutichirqan: –Allinmi niwasqayki, señor reyníy, kamachiwasqaykita hinan ruwasaq, nispa. Simeiqa unaymi Jerusalenpi tiyarqan, 39ichaqa kinsa wata qhepatan Simeipa iskay kamachinkuna chinkakuspanku Gat llaqta rey Maacaq churin Aquispata pasakurqanku. Gatpin iskaynin kamachiykikuna kashan, nispa, willaqtinkutaq, 40Simeiqa asnonta caronaspan Aquispa kasqan Gat llaqtata rirqan, kamachinkunata maskhaspa. Chaymantataq kamachinkunapiwan Jerusalenman kutimpurqanku. 41Chaytan rey Salomonman willarqanku Gat llaqtata rispa Jerusalenman kutipusqanta. 42Hinan reyqa payta waqyachirqan, hamuqtintaq nirqan: –Ñoqan Señor Diospa sutinpi jurachirqayki, ama Jerusalenmanta lloqsinaykipaq, nirqaykitaq: Kay llaqtamanta lloqsinki chayqa, wañunkipunin, nispa. Qantaq kutichiwarqanki: Allinmi, kasukusaqmi niwasqaykita, nispa. 43Chay hinaqa, ¿imanaqtintaq Señor Diosman jurasqaykita ñoqaq kamachisqaytapas mana kasukunkichu? 44Qanqa allintan yachashanki David taytayta tukuy mana allinkunata ruwasqaykita. Chayraykun Señor Diosqa chay mana allin ruwasqaykita qan kikiykiman kutichisunki. 45Ñoqatataq ichaqa Señor Dios saminchawanqa, David taytaypa kamachikuynintapas paymi wiñaypaq takyachinqa, nispa. 46Chaymi reyqa Joiadaq churin Benaiata kamachirqan Simeita wañuchinanpaq, paytaq rispa wañurqachirqan. Ahinapin Salomonqa atiyninwan lliwta kamachipusharqan.

will be added

X\