1 Reyes 19

1Jezabelmanmi Ahabqa Eliaspa tukuy ruwasqantapas imaynatachus Baal diospa llapan profetankunata wañuchisqantapas willarqan. 2Hinan Jezabelqa Eliasman willaqta kacharqan: –Manachus paqarin kay horas qanta wañuchisqayki imaynan chay profetakunata wañuchirqanki hinata chayqa, dioskuna ñoqata wañuchiwachun, nispa, nimunanpaq. 3Eliastaq mancharikurqan, chaymi kawsayninta qespichinanpaq ayqekurqan. Judapi kashaq Beersebakama chayaspataq, kamachinta chaypi saqerqan. 4Chaymantataq ch'inneqman ripuspa huk p'unchay ch'isiyaqta purirqan, hinaspa huk retama chakipi tiyaykurqan. Eliasqa wañukapuyta munaspan mañakurqan: –¡Señor Diosníy, kaykamallaña! Kawsayniyta qechupuway, manan ñawpa taytaykunamanta aswan allinchu kani, nispa. 5Hinaspan chay retama chakipi siriykuspa puñurqapurqan. Hinan qonqaylla huk ángel llamiykuspa nirqan: –Hatariy, mikhuy, nispa. 6Eliastaq muyuriqninta qhawarikuspa rikurqan sawnanan qayllapi sansapi kusasqa huk t'antata, huk p'uyñupi unutawan. Hinaspan hatarispa mikhurqan, ukyarqan, chaymantataq wakmanta puñuykurqan. 7Señor Diospa angelnintaq ichaqa yapamanta hamurqan, hinaspan llamiykuspa nirqan: –Hatariy, mikhuy, mana chayqa manan purinaykita usachiwaqchu, nispa. 8Eliastaq hatarispa mikhurqan ukyarqan. Chay mikhunan kallpacharqan tawa chunka p'unchay tawa chunka tuta purinanpaq, Diospa Horeb orqonman chayanankama. 9Chayaspataq huk qaqa t'oqoman haykurqan, chaypin illarirqan. Señor Diostaq payta rimaykurqan: –Elías, ¿imatan kaypi ruwashanki? nispa. 10Eliastaq kutichirqan: –Tukuy-atiyniyoq Señor Dios, anchatan qanmanta sienterqani, Israel runakunan rimanakusqaykita saruncharqanku, altarniykikunatapas thunirqanku, profetaykikunatapas lliwta wañuchirqanku. Ñoqa sapallayñan qhepani, chaypas wañuchiwanankupaqmi maskhashawanku, nispa. 11Hinan Señor Diosqa nirqan: –Hawaman lloqsimuy, hinaspa orqo patapi ñawpaqeypi sayaykuy, nispa. Chay kikin ratotaq Señor Diosqa pasarqan, hinan paypa ñawpaqenpi hatun tutuka wayra orqokunata q'asarqan, qaqakunatapas ch'eqtarqan, ichaqa Señor Diosqa manan wayrapichu kasharqan. Chay qhepatataq pacha chhaphchiy karqan, ichaqa Señor Diosqa manan pacha chhaphchiypichu kasharqan. 12Chayman qatiqtaq nina rawray karqan, ichaqa Señor Diosqa manan nina rawraypichu kasharqan. Nina rawray qhepatataq huk sumaq samp'a wayra silbay hina uyarikurqan. 13Eliastaq chayta reparaspa capanwan uyanta pakaykukurqan, qaqa t'oqomanta lloqsimuspataq punkupi sayaykurqan. Hinan payta huk kunka rimaykurqan: –Elías, ¿imatan kaypi ruwashanki? nispa. 14Eliastaq kutichirqan: –Tukuy-atiyniyoq Señor Dios, anchatan qanmanta sienterqani, Israel runakunan rimanakusqaykita saruncharqanku, altarniykikunatapas thunirqanku, profetaykikunatapas lliwta wañuchirqanku. Ñoqa sapallayñan qhepani, chaypas wañuchiwanankupaqmi maskhashawanku, nispa. 15Hinan Señor Diosqa nirqan: –Maynintachus hamusqaykita kutipuspa Damasco ch'inneqman riy. Chayman chayaspaykitaq Hazaelta aceitewan hawinki Siria suyu rey kananpaq, 16Nimsiq churin Jehutataq Israel rey kananpaq aceitewan hawinki, Abel-meholamanta Safatpa churin Eliseotataq rantiykipi profeta kananpaq aceitewan hawinki. 17Ahinapi Hazaelpa wañuchinanmanta pipas ayqenqa chayqa, Jehú wañuchinqa. Jehupa wañuchinanmanta pipas ayqenqa chaytataq Eliseo wañuchinqa. 18Chaywanpas, ñoqaqa qanchis waranqa runakunatan kawsayniyoqta Israel suyupi waqaychasaq, paykunaqa manan Baal diosman qonqorikurqankuchu, manataq much'arqankupaschu, nispa. 19Eliastaq chaymanta ripurqan, hinaspa Eliseota tarirqan chunka iskayniyoq masa torowan llank'ashaqta, payqa qhepakaq masatan llank'achisharqan. Hinan Eliasqa qayllaykuspa capanta Eliseo pataman wikch'uykurqan. 20Eliseotaq kaq rato toronkunata saqerparispa Eliaspa qhepanta phawarirqan, hinaspa nirqan: –Suyariway tayta-mamayta huk much'aywan saqeykamunaykama, chaymantaqa ripusunchismi, nispa. Eliastaq nirqan: –Phaway riy, manan ñoqaqa hark'aykichu, nispa. 21Hinan Eliseoqa Eliaspa qayllanmanta kutirirqan, hinaspataq iskay torokunata nak'aspa kuchurqan. Toroq llank'anan yugowantaq aychata q'asparqan, hinaspa runakunaman rakirqan mikhunankupaq. Chaymantataq Eliaspa qhepanta ripurqan, paypa kamachintaq kapurqan.

will be added

X\