1 Unayñan karqan, hinan kinsa watamantaña Señor Diosqa Eliasta nirqan: –Riy, hinaspa Ahabman qayllaykuy, ñan parachisaqña, nispa. 2 Hinan Eliasqa rispa Ahabman qayllaykurqan. Sinchi hatunmi yarqay Samaria llaqtapi karqan, 3 chaymi Ahabqa Abdías mayordomonta waqyachirqan. Abdiasqa ukhu sonqonmanta manchakuywan Señor Diosta yupaychaqmi karqan, 4 chaymi payqa Señor Diospa profetankunata Jezabel wañuchiyta qallarishaqtin, pachak profetakunata pakasqa. Iskayman t'aqaspanmi phisqa chunkatakama iskay qaqa t'oqopi pakasqa, mikhunankupaqpas t'antata unutawan qosqa. 5 Hinan Ahabqa Abdiasta nirqan: –Hamuy, haku puririsun suyuntinta, llapa p'uytukunata, mayukunata ima, ichapaschá q'achuta tarisunman caballokunatapas mulakunatapas kawsachinanchispaq. Mana chayqa, mana uywayoqmi kapusun, nispa. 6 Chaymi suyuta iskayman t'aqarqanku purinankupaq, hinan Ahabqa huk ñanta rirqan, Abdiastaq hukkaq ñanta. 7 Ñanta rishaspataq Abdiasqa Eliaswan tuparqan, reqsirqospataq pampakama k'umuykukuspa nirqan: –¡Wiraqocháy, qanqa Eliasmi kashanki riki! nispa. 8 Eliastaq kutichirqan: –Arí, ñoqapunin kani. Phaway wiraqochayki Ahabman willamuy kaypi kashasqayta, nispa. 9 Abdiastaq ichaqa nirqan: –¿Imapin ñoqa huchallikuni, Ahabman hap'ichiwaspayki sipichiwanaykipaq? 10 ¡Diosniyki Señor Diospa sutinpin jurani!, wiraqochay Ahabqa tukuy llaqtakunamanmi suyukunamanmi qan maskhaqta kacharqan. Chaymi, “manan kaypi kanchu Eliasqa” niqkunata payqa jurachirqan cheqaqtapuni mana chaypi tarisqasuykita. 11 ¡Kunantaq niwanki: Phaway, wiraqochayki Ahabman willamuy kaypi kashasqayta, nispa! 12 Ñoqa qayllaykimanta t'aqarikuqtiymi, Señor Diospa Espiritunqa maymanpas aparqapusunkiman, manataq yachaymanchu maypichus kashasqaykita. Ahabmantaq willamusaq kaypi kasqaykita, manataq tarisunkichu chayqa, wañuchipuwanqan. Ñoqa kamachiykiqa, wayna kasqaymantapachan Señor Diosta yupaychashallarqanipuni. 13 ¿Manachu willarqasunkiku Señor Diospa profetankunata Jezabel wañuchishaqtin imatachus ruwasqayta? Pachak profetakunatan iskayman t'aqaspay, iskay qaqa t'oqoman phisqa chunkatakama pakarqani, mikhunankupaqpas t'antatawan unutawan qorqani. 14 Kunantaq niwanki: Phaway wiraqochayki Ahabman willamuy kaypi kashasqayta, nispa. ¡Wañuchiwanantachu munanki! nispa. 15 Eliastaq kutichirqan: –¡Tukuy-atiyniyoq Señor Diospa kamachinmi kani! ¡Paypa sutinpin jurani! Kunanpachan Ahabman qayllaykusaq, nispa. 16 Hinan Abdiasqa Ahabman rispa willarqan, chaymi Ahabqa Eliaswan tupaq rirqan. 17 Rikurqospataq nirqan: –¡Yaw! ¡Qanchu kanki Israel runakunata sinchi sasachayman churaq! nispa. 18 Eliastaq kutichirqan: –Manan ñoqachu sasachayman churashani, aswanpas qanmi aylluykikunapiwan, Señor Diospa kamachikuyninkunata wikch'uspaykichis, Baal dioskunata yupaychashankichis. 19 Chay hinaqa, kunan kamachikuy Israel runakuna Carmelo orqo patapi huñukuspa ñoqawan tupananpaq. Hinallataq Baal diospa tawa pachak phisqa chunka profetankunata, Asera diosaq tawa pachak profetankunatawan chayman huñuchimuy, chay profetakunatan Jezabel mikhuchin, nispa. 20 Chaymi Ahabqa waqyachirqan llapan Israel runakunata, hinaspan Carmelo orqo patapi profetakunata huñuykurqan. 21 Hinan Eliasqa llapa runakunaman asuykuspa nirqan: –¿Hayk'aqkaman qankuna iskay yuyaypi kankichis? Señor Diospuni cheqaq Dios kaqtinqa, payta serviychis, Baal kaqtintaq chayta serviychis, nispa. Runakunataq ichaqa mana imanirqankupaschu. 22 Eliastaq wakmanta runakunata nirqan: –Ñoqa sapallayñan kawsashani Señor Diospa profetan, Baal diospa profetankunan ichaqa tawa pachak phisqa chunka kashanku. 23 Chay hinaqa, iskay torillokunata qowayku, paykuna huk torillota akllachun, nak'aspankutaq kuchusqata llant'a pataman churachunku, ichaqa aman ninawan hap'ichinqakuchu. Ñoqapas hukkaq torillota kaqllatataq wakichisaq, hinaspa llant'a pataman churasaq, ichaqa manan ninawan hap'ichisaqchu. 24 Chaymantataq qankuna diosniykichista waqyakunkichis, ñoqataq Señor Diosta waqyakusaq. ¡Mayqen dioschus ninawan kutichimuwasun, chaymi cheqaq Dios kanqa! nispa. Hinan llapan runakuna kutichirqanku: –¡Allinmi nisqayki! nispanku. 25 Chaymi Eliasqa Baal diospa profetankunata nirqan: –Akllakuychis huk torillota, hinaspa ñawpaqta wakichiychis qankuna askha kasqaykichisrayku. Chaymantataq diosniykichista waqyakuychis, amataq ninataqa hap'ichinkichischu, nispa. 26 Hinan paykunaqa chaskisqanku torillota nak'aspanku wakichirqanku, hinaspan Baal diosta chawpi p'unchaykama waqyakurqanku: –¡Baal, kutichimuwayku! nispa. Perqasqanku altarpa muyuriqninpitaq saltaspa tusurqanku, ichaqa manan pipas kutichimurqanchu. 27 Chawpi p'unchayta hinan Eliasqa paykunata chanzakurqan: –¡Aswan kunkayoqta waqyakuychis! Payqa huk diosmi riki. ¡Manapaschá tiempon kanchu, hisp'akuqpaschá rin, purinpaschá! ¡Ichapaschá puñushan, rikch'arichiychis! nispa. 28 Paykunataq qaparishallarqanku, cuchillowan lanzawan cuerponkuta q'allakuspanku yawar phawanankama, paykunaq ruwayninkuman hina. 29 Chawpi p'unchaypas pasarqanñan, paykunataq waq'a hina saltaspanku qaparishallarqanku sacrificio haywana las tres horaskama. Ichaqa manan ima rimaypas uyarikurqanchu. Manan pipas uyarimurqanchu, manallataq kutichimurqanpaschu. 30 Hinan Eliasqa llapan runakunata nirqan: –Ñoqaman asuykamuychis, nispa. Chaymi llapan runakuna Eliasman asuykurqanku, paytaq Señor Diospa thunisqa altarninta allicharqan. 31 Chunka iskayniyoq rumitan hap'irqan, Jacobpa churinkuna hayk'a aylluchus kasqanman hina, paytan Señor Diosqa nisqa: “Israelmi sutiyki kanqa”, nispa. 32 Chay runakunawantaq huk altarta Señor Diospaq perqachirqan. Altar muyuriqtataq yarqhata hina hasp'irqan, chaymi karqan kinsa chunka litro unuq haykunan hina. 33 Llant'ata churaspañataq torillota nak'aspa kuchurqan, hinaspa altar pataman churaspa nirqan: –Hunt'achiychis unuta tawa p'uyñuman, hinaspa hich'aychis ruphachina ofrendata llant'atawan, nispa. 34 Chaymantataq nirqan: –Huktawan hich'aychis, nispa. Paykunataq ahinata ruwarqanku. Nillarqantaq: –Huktawan hich'aychis, nispa. Hinan paykunaqa ruwarqanku kinsa kutikama. 35 Chaymi altar muyuriqman unu phaqchaykurqan, hasp'isqa yarqhaman hunt'anankama. 36 Ruphachina ofrenda haywana horastan profeta Eliasqa altarman qayllaykuspa kunkayoqta mañakurqan: –¡Abrahampa, Isaacpa, Israelpa Diosnin, Señorníy, kunan reqsichikuy qanpuni Israelpa Diosnin kasqaykita, ñoqapas qanpa kamachiyki kasqayta, hinallataq kamachiwasqaykirayku tukuy kaykunata ruwasqaytapas! 37 ¡Señor Diosníy, kutichimuway mañakusqayta! ¡Kutichimuway kay runakuna qanpuni Dios kasqaykitapas, qanman kutirikunankupaq waqyaq kasqaykitapas yachanankupaq! nispa. 38 Chay kikin raton Señor Diospa ninanqa uraykamuspa rupharqan ruphachina sacrificiota, llant'ata, rumikunatapas, hallp'a ñut'utapas, hinallataq yarqhapi unutapas ch'akichirqan. 39 Chayta rikuspan llapa runakuna pampakama k'umuykukurqanku, hinaspa qaparirqanku: –¡Señormi Diosqa! ¡Señormi Diosqa! nispa. 40 Hinan Eliasqa paykunata nirqan: –¡Hap'iychis Baal diospa profetankunata, ama hukpas ayqechunchu! nispa. Chaymi runakunaqa hap'irqanku, Eliastaq Cisón mayuman apaspa chaypi chay profetakunata nak'aspa wañuchimurqan. 41 Chay qhepatataq Eliasqa Ahabta nirqan: –Phaway mikhuq ukyaq, para kunununuymi uyarikushanña, nispa. 42 Hinan Ahabqa mikhuq ukyaq ripurqan. Eliastaq ichaqa Carmelo orqo puntaman seqarqan, chaypitaq qonqoriykukurqan moqon chawpiman uyan chayanankama, 43 kamachintataq nirqan: –Phaway, lamar-qocha ladota qhawarimuy, nispa. Kamachintaq rispa qhawamurqan, nirqantaq: –Manan imapas kanchu, nispa. Eliastaq ichaqa kamachirqan qanchis kutita qhawamunanpaq. 44 Qanchiskaq kutipitaq kamachiqa nirqan: –¡Haqayqá! ¡Lamar-qochamanta huk maki sayay phuyulla lloqsimushan! nispa. Hinan Eliasqa nirqan: –Phaway, Ahabta nimuy: Carretaykita aysachiy hinaspa ripuy, mana chayqa paran hark'asunki, nispayki, nispa. 45 Chaykamataq wayrawan yana phuyuwan cieloqa tutayaykurqan, hinan sinchita para chayarqan. Ahabqa carretanman wichaspa Jezreelman ripurqan. 46 Eliastataq Señor Diosqa kallpachaykurqan, chaymi payqa p'achanta allinta chumpiykukuspa Jezreel llaqtaman phawaspa Ahabmantapas ñawpaqtaraq chayarqan.
