1 Reyes 16

1Chaymi Señor Diosqa Hananiq churin Jehuta rimaykurqan Baasata ninanpaq: 2Señor Diosmi nisunki: Mana valeqmantan ñoqaqa akllarqayki, hinaspa Israel llaqtay kamachiqta churarqayki. Qantaq ichaqa Jeroboam hina huchallikurqanki, Israel llaqtaytapas huchallichispayki, chaykunawanmi phiñachiwarqanki. 3Chayraykun qantapas aylluykitapas chinkachipusqaykichis. Imaynan Nadabpa churin Jeroboamta ruwarqani, ahinallatataqmi qankunatapas ruwasqaykichis. 4Llaqtapi aylluykikuna wañuqtaqa alqokunan mikhunqa, campopi wañuqkunatataq phalaq animalkuna mikhunqa, nispa. 5Baasamanta wakin willakuykunapas, ruwasqankunapas, paypa atiyninpas Israel Reykunaq Willakuynin Qelqapi qelqasqan kashan. 6Baasa wañukapuqtintaq Tirsapi p'ampapurqanku. Chay qhepatataq churin Ela rantinpi kamachikurqan. 7Hananiq churin profeta Jehuwanmi Señor Diosqa willachirqan Baasata aylluntawan huchachananta, mana Señor Diospa munayninman hinachu ruwasqanrayku. Baasaqa Señor Diosta phiñachirqan Jeroboampa ayllun hina mana chaninta ruwaspa, Jeroboampa ayllunta wañuchispa ima. 8Judá suyupi iskay chunka soqtayoqkaq watapi Asa kamachikushaqtintaq, Baasaq churin Elaqa Tirsamanta llapa Israelta kamachiyta qallarirqan, kamachikurqantaq iskay watata. 9Zimriqa maqanakuy carretakunaq kuskannin kamachiq oficialninmi karqan, paymi Ela contra sayarirqan. Huk p'unchaymi Elaqa Tirsa llaqtapi mayordomon Arsaq wasinpi machasharqan. 10Hinan chay rato Zimriqa chayaspa Elata wañurqachirqan, hinaspa rantinpi pay kamachikurqan. Chaytan ruwarqan Judá suyupi iskay chunka qanchisniyoqkaq watapi Asa kamachikushaqtin. 11Kamachikuyta qallarispantaq Zimriqa kamachikuy tiyanapi tiyaykuspa hina Baasaq llapan ayllunta wañuchirqan, manapuni huk qharitapas, amigollantapas kawsachirqanchu. 12Ahinatan Zimriqa wañuchirqan Baasaq llapan ayllunkunata, Jehú profetawan Baasa contra Señor Diospa willachisqanman hina. 13Baasaqa churin Elapiwanmi Señor Diosta phiñachirqanku huchallikuspanku, Israel runakunata huchallichispanku, idolokunata yupaychaspanku ima, chaymi Señor Diosqa chay hinata muchuchirqan. 14Elamanta wakin willakuykunapas tukuy ruwasqankunapas Israel Reykunaq Willakuynin Qelqapi qelqasqan kashan. 15Judá suyupi iskay chunka qanchisniyoqkaq watapi Asa kamachikushaqtinmi Zimriqa Tirsa llaqtapi kamachikuyta qallarirqan, ichaqa qanchis p'unchayllatan kamachikurqan. Chaykamataq Israel soldadokunaqa Filistea runakunaq Gibetón llaqtanta phawaykunankupaq muyuykurqanku. 16Hinan paykunaqa uyarirqanku: Chay Zimrin rey contra sayarispa wañuchin, nisqata. Chaymi paykunaqa chay kikin p'unchay soldadokunaq umallin Omrita reyta churarqanku. 17Omritaq llapa Israel soldadokunapiwan manaña Gibetonman phawaykurqankuñachu, aswanpas Tirsa llaqtata rispa muyuykurqanku. 18Zimritaq llaqta atipasqa kasqanta reparaspa, rey wasipi pukaraman haykurqan, wasi ukhupi kashaspataq payqa ninawan hap'iykuchirqan, ahinapi wañupurqan. 19Zimriqa manan Señor Diospa munayninman hinachu ruwarqan, aswanpas Jeroboam hinan huchallikurqan, Israel runakunatapas huchallichirqan, chaymi payqa chay hinapi wañurqan. 20Zimrimanta wakin willakuykunapas rey Ela contra sayarisqanpas Israel Reykunaq Willakuynin Qelqapi qelqasqan kashan. 21Chaymantataq Israel runakuna iskayman t'aqakurqan. Huk t'aqan Ginatpa churin Tibnaita rey kananta munarqanku, hukkaq t'aqataq Omrita. 22Tukukuypitaq Omrita rey kananta munaq t'aqa atiparqan Ginatpa churin Tibniq qatikuqninkunata, chaymi Tibni wañupurqan, Omritaq rey kapurqan. 23Judá suyupi kinsa chunka hukniyoqkaq watapi Asa kamachikushaqtinmi Omriqa Israelpi kamachikuyta qallarirqan. Ñawpaqta Tirsamanta soqta watata kamachikurqan, llapanpitaq chunka iskayniyoq watata kamachikurqan. 24Omriqa Semermanta Samaria orqota rantirqan soqta chunka kilo qolqewan, hinaspan chay orqopi perqata sayarichirqan, chaypi sayarichisqan llaqtatataq Samariata suticharqan, chay orqo vendeqnin runa Semer sutiyoq kasqanrayku. 25Omriqa manan Señor Diospa munayniman hinachu ruwarqan, aswanpas paymanta ñawpaqkaq reykunamantapas aswantaraqmi huchallikurqan. 26Nabatpa churin Jeroboampa ruwasqan kikin huchakunatan ruwarqan, chayllawantaq Israel runakunatapas huchallichirqan, ídolo yupaychaywan Israelpa Diosnin Señorta phiñachispan. 27Omrimanta wakin willakuykunapas, tukuy ruwasqankunapas, atiyninpas Israel Reykunaq Willakuynin Qelqapi qelqasqan kashan. 28Omritaqa wañukapuqtinmi Samariapi p'ampapurqanku. Chay qhepatataq churin Ahab rantinpi kamachikurqan. 29Judá suyupi kinsa chunka pusaqniyoqkaq watapi Asa kamachikushaqtinmi, Omriq churin Ahabqa Israel suyupi kamachikuyta qallarirqan. Iskay chunka iskayniyoq watatan Israel suyuta Samariamanta kamachirqan. 30Ichaqa manapunin Señor Diospa munayninman hinachu ruwarqan, aswan mana chaninraqmi karqan paymanta ñawpaqkaq reykunamantapas. 31Ahabpaqqa Jeroboam hina huchallikuyqa manan imapaschu karqan, hinan Sidón rey Et-baalpa ususin Jezabelwan casarakurqan, hinaspan Baal diosta yupaycharqan, qonqor-chakitaq servirqan. 32Hinaspan payqa Samariapi sayarichisqan Baal dios yupaychana wasipi altarta perqarqan. 33Ruwallarqantaqmi Asera diosaq rikch'aynintapas. Ahabqa paymanta ñawpaqkaq reykunamantapas astawanraqmi Señor Diosta phiñachirqan. 34Ahabpa tiemponpin Betelmanta Hielqa Jericó llaqtata wakmanta sayarichirqan. Teqsinkunata churaspanmi phiwi churin Abiramta sacrificiopi haywarqan, punkunkunata churaspataq sullk'a churin Segubta sacrificiopi haywarqan, chaymi hunt'akurqan Nunpa churin Josuewan Señor Diospa willachisqan simi.

will be added

X\