1 Reyes 15

1Abiamqa Judapi kamachikuyta qallarirqan Nabatpa churin Jeroboam Israelpi chunka pusaqniyoqkaq watapi kamachikushaqtinmi. 2Jerusalenmantataq kinsa watata kamachikurqan. Mamanmi karqan Abisalompa ususin Maaca sutiyoq. 3Payqa taytanpa ruwasqan kikin huchakunallatataqmi ruwarqan, manataq Diosnin Señor Diospaq hunt'aqchu karqan imaynan ñawpa taytan David hunt'aq karqan hinaqa. 4Chaywanpas, Diosnin Señor Diosqa Davidta allinta qhawarisqanraykullan paypa mirayninta Jerusalenpi kamachikushanallanpaq churarqan, ahinapin Abiamman huk churita qorqan Jerusalenta waqaychananpaq. 5Davidqa Señor Diospa ñawpaqenpi chanintan kawsarqan, payqa manan hayk'aqpas kawsayninpi Señor Diospa kamachikuyninmanta t'aqakurqanchu, aswanpas Het runa Uriasta wañuchisqallanwanmi t'aqakurqan. 6Roboam kawsashaqtinqa Jeroboamwan churanakuyllapin karqanku. 7Hinallataq chay qhepatapas Abiamwan Jeroboamwan churanakuyllapi karqanku. Abiammanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan. 8Abiam wañukapuqtintaq Davidpa Llaqtan nisqapi p'ampapurqanku. Chay qhepatataq churin Asa rantinpi kamachikurqan. 9Asaqa Judapi kamachikuyta qallarirqan Israelpi Jeroboam iskay chunkakaq watapi kamachikushaqtinmi, 10Jerusalenmantataq tawa chunka watata kamachikurqan. Hatun mamanmi karqan Abisalompa ususin Maaca sutiyoq. 11Asaqa Señor Diospa munayninman hinan chaninta ruwarqan ñawpa taytan Davidpa ruwasqanta hina, 12payqa suyumantan wikch'urqan yupaychana wasikunapi yupaychaq hamuq qhari-masinkunawan t'inkikuq qharikunatapas, ñawpa taytakunaq ruwasqan llapan idolokunatapas. 13Hinallataq hatun maman Maacata reina mama kayninmanta wikch'urqan Asera diosaq millay rikch'ayninta ruwachisqan hawa. Chay rikch'aytan Asaqa ñut'uta chhallurqan, hinaspan Cedrón mayu wayq'opi ruphachirqan. 14Manaña Israel suyupi orqo patapi yupaychana wasikunata thunirqanchu chaypas, Asaqa Señor Diospaq hunt'aqllapunin karqan tukuy kawsasqan p'unchaykunapi, 15hinallataq Señor Diospa wasinman churarqan paypas taytanpas Señor Diospaq t'aqasqanku qorita, qolqeta, serviciokunatawan. 16Asaqa Israel suyu rey Baasawanmi tukuy tiempo maqanakuyllapi karqanku. 17Baasataq Judata maqanakuq rispa Ramá llaqtata allinta perqachirqan Asaq suyunman haykuqtapas lloqsiqtapas hark'ananpaq. 18Hinan Asaqa Señor Diospa wasinpi puchuq llapan qorita, qolqeta, paypa qhapaq kayninkunatapas huñuspa, oficialninkunawan apachirqan Siria suyu rey Ben-Hadadman. Payqa Hezionpa churin Tabrimonpa churinmi karqan, tiyarqantaq Damasco llaqtapi. Asaqa kay hina willakuytan apachirqan: 19Qanwan ñoqawan rimanakusun, imaynan taytanchiskuna rimanakurqan hinata. Kayqa sumaq sonqota apachimushayki qorita, qolqetawan. Israel suyu rey Baasawan rimanakusqaykita saqepuy, ahinapin ñoqaq suyuymanta paykuna ripunqaku, nispa. 20Hinan Ben-Hadadqa rey Asaq nisqanta uyakurqan, chaymi Israel llaqtakunata phawaykunankupaq soldado umallikunata kacharqan. Hinan munaychakurqanku Ijonta, Danta, Abel-Bet-Maacata, llapan Cineret-ta, llapan Neftalí hap'iytawan. 21Baasataq chayta yacharqospa manaña Ramá llaqtata perqachirqanñachu, aswanpas Tirsamanmi kutipurqan. 22Hinan rey Asaqa Judá suyu runakunata llapallanta waqyachirqan, hinaspan Ramá llaqtata perqananpaq Baasaq apasqan rumikunata kurkukunata ima aparqan. Chaykunawantaq rey Asaqa sayarichirqan Benjaminpi Geba llaqtata Mizpa llaqtatawan. 23Asamanta wakin willakuykunapas, paypa atiyninpas, tukuy ruwasqankunapas, llaqtakunata sayarichisqanpas Judá Reykunaq Willakuynin Qelqapi qelqasqan kashan. Yuyaqña kaspanmi Asaqa chakinmanta onqoykurqan. 24Wañukapuqtintaq Davidpa Llaqtan nisqapi ñawpa taytankunaq p'ampananman p'ampapurqanku. Chay qhepatataq churin Josafat rantinpi kamachikurqan. 25Iskaykaq watapi Judá suyupi Asa kamachikushaqtinmi, Jeroboampa churin Nadabqa Israel suyupi kamachikuyta qallarirqan, iskay watallataq kamachikurqan. 26Payqa manan Señor Diospa munayninman hinachu ruwarqan, taytan hina huchallikuspan Israel runakunatapas huchallichirqan. 27Isacar ayllumanta kaq Ahiaspa churin Baasataq ichaqa Nadab contra hatarirqan, hinaspan Nadabta wañuchirqan, Filistea runakunaq Gibetón llaqtanta Nadabwan Israel soldadokunapiwan muyuykushaqtin. 28Baasaqa Nadabta wañuchirqan Judapi Asa kinsa wata kamachikushaqtinmi, chaymi Nadabpa rantinpi kamachikurqan. 29Kamachikuyta qallarispa hinataq Jeroboampa llapan ayllunta wañuchirqan, manan ch'ullallapas qheparqanchu, Señor Diospa Silomanta profeta Ahiaswan willachisqanman hina. 30Jeroboamqa Israelpa Diosnin Señorta phiñachisqa huchankunawan Israelta huchallichisqanwan, chaymi Señor Diosqa mirayninkunata ch'usaqyachirqan. 31Nadabmanta wakin willakuykunapas tukuy ruwasqankunapas Israel Reykunaq Willakuynin Qelqapi qelqasqan kashan. 32Asaqa Israelpa reynin Baasawanmi tukuy tiempo maqanakuyllapi karqanku. 33Judá suyupi kinsakaq watapi Asa kamachikushaqtintaq Ahiaspa churin Baasaqa Tirsamanta llapa Israelta kamachiyta qallarirqan, kamachikurqantaq iskay chunka tawayoq watata. 34Payqa manan Señor Diospa munayninman hinachu ruwarqan, aswanpas Jeroboam hinallataqmi huchallikurqan, kaqllataq Israel runakunatapas huchallichirqan.

will be added

X\