1 Reyes 14

1Chay p'unchaykunan Jeroboampa churin Abiasqa onqoykurqan. 2Hinan Jeroboamqa warminta nirqan: –Profeta Ahiasmi Silopi tiyan, paymi niwarqan kay suyupi rey kanaypaq. Chhaynaqa, huk-hina p'achawan churarqokuy warmiy kasqaykita ama reqsinasuykipaq, hinaspa Silota phaway. 3Chunka t'antakunata, tortakunata, huk p'uyñu miel misk'itawan aparikuspa Ahiasman riy. Paymi nisunki imaynachus kay churinchis kananta. 4Hinan warmiqa qosanpa nisqanta hina ruwaspa Silota rirqan, Ahiaspa wasinmantaq chayarqan. Ahiasqa manan rikurqanñachu, yuyaqña kaqtinmi ñawinkunaqa ayphayapusharqan, 5ichaqa Señor Diosmi payta nirqan: –Jeroboampa warminmi onqosqa churinmanta tapukuq hamushasunki pantachikuspa, qantaq ichaqa chayamuqtin, ahinata kay hinata ninki, nispa. 6Punkuta warmi haykuykushaqtintaq Ahiasqa purisqanta uyarispa nirqan: –Haykumuy, Jeroboampa warmin. ¿Imanaqtinmi pantachikuspa hamushanki? K'arak willakuytan ñoqa chaskini qanman willanaypaq. 7Chay hinaqa kutiy, hinaspa Jeroboamman willamuy, Israelpa Diosnin Señormi nin: Ñoqan runakunamanta akllarqayki, hinaspa Israel llaqtayta kamachinaykipaq churarqayki. 8Ñoqaqa Davidpa ayllunmantan kamachisqan suyuta qechurqani qanman qonaypaq. Qantaq ichaqa mana kamachiy David hinachu karqanki, payqa kamachikuyniykunatan hunt'arqan, tukuy sonqotaq qatikuwarqan, ñawpaqeypipas chaninta ruwarqan. 9Qanmanta ñawpaqkaq reykunamantapas aswan mana chanintan ruwarqanki, qanqa wak dioskunata unuyachispa rikch'aykunata ruwarqanki, ahinapin ñoqata phiñachiwaspayki wasancharpariwarqanki. 10Chaymi kunan aylluykita mana allinkunawan muchuchisaq, hinan Israelpi llapan qhari mirayniykikuna wañunqa. Mirayniykitaqa llapantan tukusaq, q'opata hinaraqmi pichasaq. 11Llaqtapi wañuq aylluykikunaq ayankunatapas alqokunan mikhunqa, campopi wañuqkunatataq phalaq animalkuna mikhunqa, ahinatan ñoqa Señor Diosqa unanchani, nispa. 12Chay hinaqa, Jeroboampa warmin, phaway wasiykita kutipuy. Llaqtaman haykuykuqtiyki hinan churiykiqa wañupunqa. 13Hinan churiykimanta llapa Israel runakuna waqaspa p'ampanqaku. Jeroboampa ayllunmantaqa pay sapallanmi Señor Diospa qayllanpi allinpaq qhawarisqa karqan, chaymi pay sapallan p'ampasqa kanqa. 14Kunan p'unchaymantapachan Señor Diosqa wak reyta Israelman churanqa, paymi kamachikuspa Jeroboampa ayllunta lliwta tukunqa. 15Señor Diosqa Israelta chhaphchinqa imaynan mayu phoqchiy t'otorata chhaphchin hinata. Ñawpa taytankuman qosqan kay sumaq hallp'amantan Israelta horqonqa, hinaspan wikch'unqa Eufrates mayu inti lloqsimuy lado chimpamanraq, Asera diosaq rikch'ayninkunata ruwakuspanku Señor Diosta phiñachisqankumanta. 16Jeroboammi huchallikurqan, hinallataq Israel runakunatapas huchallichirqan, chaymi Señor Diosqa Israelta ch'eqechinqa, nispa. 17Hinan Jeroboampa warminqa sayarispa kutipurqan, Tirsa llaqtamantaq chayarqan, wasi punkuta haykuykushaqtintaq churinqa wañurqapurqan. 18Chaymi llapa Israel runakuna paymanta waqaspa p'ampapurqanku, profeta Ahiaswan Señor Diospa willachisqanman hina. 19Jeroboampa wakin ruwasqankunapas maqanakusqankunapas, imayna kamachikusqanpas Israel Reykunaq Willakuynin Qelqapi qelqasqan kashan. 20Jeroboamqa iskay chunka iskayniyoq watan Israelpi kamachikurqan. Wañukapusqan qhepatataq churin Nadab rantinpi kamachikurqan. 21Tawa chunka hukniyoq watayoq kashaspan, Salomonpa churin Roboamqa Judá suyuta kamachiyta qallarirqan, Jerusalenmantataq chunka qanchisniyoq watata kamachikurqan, chay llaqtatan Señor Diosqa akllakusqa, Israelpa ayllunkunaq llapan llaqtankunamanta chaypi pay yupaychasqa kananpaq. Roboampa mamanqa Amón suyu warmin karqan, Naama sutiyoq. 22Judá runakunaqa Señor Diospa ñawpaqenpi manan chanintachu ruwarqanku, chaymi Señor Diosta sinchita phiñachirqanku, taytankuq huchallikusqanmantapas astawanraqmi huchallikurqanku. 23Llapan orqo patapi llapa k'allmasapa sach'a chakipin paykunaqa sayarichirqanku yupaychana wasikunata, yupaychana saywa rumikunata, Asera diosakunata ima. 24Hinallataq yupaychana wasikunapi karqan qharikuna yupaychaq hamuqkunawan t'inkikuspa huchallikunankupaq. Ahinapi Señor Diospa wikch'usqan suyukunaq millakuy ruwasqankuta hina ruwarqanku. 25Phisqakaq watapi Roboam kamachikushaqtinmi, Egipto suyu rey Sisacqa Jerusalenta phawaykurqan. 26Hinaspa Señor Diospa wasinpi qhapaq kaykunatapas, reypa wasinpi qhapaq kaykunatapas aparqan, hinallataq Salomonpa ruwasqan qori escudokunatapas llapanta aparqan. 27Hinan rey Roboamqa chaykunaq rantinpi broncemanta escudokunata ruwachirqan, hinaspan chaykunata qorqan reypa guardian oficialkunaman waqaychanankupaq, paykunan reypa wasi punkunta qhawarqanku. 28Chaymi guardiakunaqa sapa kuti Señor Diospa wasinta Roboam riqtin escudokunata chayman aparqanku, chaymantataq kaqllata churaykapurqanku guardiakunaq wasinman. 29Roboammanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan. 30Roboamwan Jeroboamwanqa tukuy tiempon maqanakuyllapi karqanku. 31Roboam wañukapuqtintaq ñawpa taytankunaq p'ampananman Davidpa Llaqtan nisqapi p'ampapurqanku. Mamanqa Amón suyu warmin karqan, Naama sutiyoq. Wañukapusqan qhepatataq churin Abiam rantinpi kamachikurqan.

will be added

X\