1 Reyes 12

1Llapa Israel runakunan Shehemta rirqanku Roboamta reyta churanankupaq, chaymi Roboamqa Shehemta rirqan. 2Nabatpa churin Jeroboammi chayta yacharqan, payqa rey Salomonmantan Egipto suyuman ayqekapusqa, hinaspan chaypi tiyasharqan. 3Israel runakuna waqyachiqtintaq, Jeroboamqa kutinpurqan, hinan llapan Israel runakunapiwan Roboamta rimaykuq rispa nirqanku: 4–Taytaykiqa sinchitan ñoqaykuta llank'achiwarqanku, chay hinaqa pisiyarichiyyá kay sasa llank'ayniykuta, sinchi sasa llank'ay churawasqankuta qechuriwayku, hinan ñoqaykuqa servisqaykiku, nispa. 5Roboamtaq kutichirqan: –Ripuychis, minchha p'unchayña kutimunkichis, nispa. Chaymi runakunaqa kutipurqanku. 6Chaykamataq rey Roboamqa taytan Salomonpa yuyaychaqnin kurak runakunata tapukurqan: –Qankuna yuyaychawaychis, ¿ima nispan kutichisaq chay runakunaman? nispa. 7Hinan paykunaqa nirqanku: –Kay llaqtata serviyta munanki chayqa, allinta kutichiy sumaq simikunawan, chaymi paykunaqa servishallasunkipuni, nispa. 8Roboamtaq ichaqa mana kasurqanchu kurak runakunaq yuyaychasqanta, aswanpas payta serviq wiñaymasin waynakunata tapukurqan: 9–Qankuna yuyaychawaychis, ¿ima nispan kutichisaq chay runakunaman? Paykunan mañakuwanku taytaypa sasa llank'ay churasqanta pisiyachinaypaq, nispa. 10Hinan chay waynakunaqa kutichirqanku: –Taytaykiq churasqan llank'ayta pisiyachinaykita mañakuq runakunamanqa kay hinatan kutichiwaq: ¡Maki uña dedoymi aswan rakhu taytaypa wasanmantaqa! 11Payqa sasa llank'aytan kamachirqasunkichis, ñoqaqa aswan sasataraqmi llank'achisqaykichis. Payqa hasut'iwanmi soq'arqasunkichis, ñoqaqa fierro khiskayoq hasut'iwanñan soq'asqaykichis, nispa. 12Kinsa p'unchaymantataq reypa nisqanman hina Jeroboamqa llapan runakunapiwan Roboamman asuykurqanku. 13Reytaq ichaqa kurak runakunaq yuyaychasqanta mana kasukuspa, k'arak simikunawan runakunaman kutichirqan. 14Payqa waynakunaq yuyaychasqanta hap'ikuspan nirqan: –Taytaychus sinchi sasa llank'anata qorqasunkichis chayqa, ñoqaqa aswan sasataraqmi qosqaykichis, paychus hasut'iwan soq'arqasunkichis chayqa, ñoqaqa fierro khiskayoq hasut'iwanñan soq'asqaykichis, nispa. 15Señor Diosmi hunt'akunanta munarqan Silomanta profeta Ahiaswan Nabatpa churin Jeroboamman willachisqan simita, chaymi reyqa llaqtata mana uyariqpas tukurqanchu. 16Llapan Israel runakunataq reypa paykunata mana uyarisqanta reparaspa, nirqanku: –¡Manan imapas Davidwan ruwananchischu! ¡Manan Isaipa churinwan ima herenciapas phasminakunanchis kanchu! ¡Israel runakuna, wasinchista ripusunchis! ¡Davidqa ayllullanpi kamachikuchun! nispa. Hinan Israel runakunaqa kaq rato wasinkuta ripurqanku. 17Judá suyu llaqtakunapi tiyaq runakunatan ichaqa Roboamqa kamachishallarqanpuni. 18Chaymantataq Roboamqa mit'ani runakunaq umallin Adoramta Israel runakunaman kacharqan, paykunataq ichaqa rumiwan ch'aqespa Adoramta wañuchirqanku. Chaymi rey Roboamqa usqhaylla carretanman seqarqospa Jerusalenman ayqerqan. 19Chay p'unchaymantan Israel runakunaqa Davidpa ayllunwan churanakuqku. 20Jeroboampa kutipusqanta yachaspankutaq llapan Israel runakunaqa Jeroboamta waqyachirqanku llaqta huñukuyman hamunanpaq, hinaspan Israel ayllukunaq reyninta churarqanku. Chay hinaqa, llapan ayllukunamanta Judá ayllullan Davidpa ayllunwan qhepakurqan. 21Jerusalenman chayaspataq Roboamqa huñurqan pachak pusaq chunka waranqa akllasqa soldadokunata llapan Judá ayllumanta Benjamín ayllumantawan. Payqa Israel runakunawan maqanakuytan yuyaykurqan, ahinapi suyunta kutichikapunanpaq. 22Diosmi ichaqa profeta Semaiasta nirqan: 23–Nimuy Salomonpa churin Judá rey Roboamta, llapan Judá aylluta Benjamín aylluta, wakin runakunatapas: 24Ñoqa Señor Diosmi nini: Ama wawqeykichis Israel runakunawan maqanakuq riychischu, wasiykichista llapaykichis kutipuychis. Suyuq t'aqanakunantaqa ñoqan unancharqani, nispa. Hinan paykunaqa Señor Diospa nisqanta uyarispa, kutipurqanku Señor Diospa kamachisqanman hina. 25Jeroboammi Efraín orqo-orqopi kashaq Shehem llaqtata wakmanta sayarichirqan, hinaspan chaypi tiyarqan. Chaymantaqa Penuel llaqtatapas wakmantan sayarichillarqantaq. 26Sonqonpitaq yuyaykurqan: Davidpa ayllunqa kay suyuta qechuwanmanmi, 27kay runakuna rishallanqa Jerusalenta Señor Diospa wasinpi sacrificiota haywanankupaq chayqa, Judá suyu rey Roboammanmi sonqonku q'ewirinqa, ñoqatataq wañuchiwanqaku, hinaspa Judá rey Roboamman kutirikapunqaku, nispa. 28Chaykuna yuyaykusqan qhepatataq Jeroboamqa iskay qori torillokunata ruwarqan, hinaspan runakunata nirqan: –Israel runakuna, askha kutiñan qankunaqa Jerusalenta rishankichis. Kayqa Egiptomanta horqomuq diosniykichiskuna, nispa. 29Hinan chay torokunata churarqan hukta Betelman, huktataq Danman. 30Chay hawan Israel runakunaqa Betelta Dantawan yupaychaq rispanku huchallikurqanku. 31Jeroboamqa sayarichillarqantaq orqo patapi yupaychana wasikunata, hinaspa mana Leví ayllu qharikunata llaqtaq sacerdotenpaq akllarqan. 32Hinallataq huk fiestata unancharqan wataq pusaqkaq killan chunka phisqayoq p'unchaypi, Judapi hina fiestata ruwanankupaq. Paymi iskaynin ruwachisqan torillokunaman Betel altarpi sacrificiokunata haywarqan. Hinaspa orqo patapi yupaychana wasikunaq sacerdotenkunata churarqan Betelpi llank'anankupaq. 33Chay hinaqa, wataq pusaqkaq killan chunka phisqayoq p'unchaypin Jeroboamqa Betelpi sayarichisqan altarman rirqan. Chaypin akllakusqan killapi Israel runakunapaq huk fiesta ruwayta kamachirqan, pay kikintaq altar patapi inciensota q'apachirqan.

will be added

X\