1 Crónicas 5

1Rubenqa Israelpa phiwi churinmi karqan, ichaqa taytanpa tiyaqmasin warmiwan puñusqanraykun phiwi-kay derechonqa wawqen Josepa churinkunaman qosqa karqan, manan phiwi nisqañachu karqan, manallataq miray qelqapi phiwi hina qelqasqachu karqan. 2Judaqa wawqenkuna ukhupi allin atiyniyoqmi karqan, paymantan kamachikuqqa karqan, chaywanpas phiwi-kay derechonqa Josepan kapurqan. 3Israelpa phiwi churin Rubenpa churinkunan karqan: Hanoc, Falú, Hezrón, Carmipiwan. 4Joelmi churiyarqan Semaiasta, Semaiastaq churiyarqan Gogta, Gogtaq churiyarqan Simeita, 5Simeitaq churiyarqan Micaiata, Micaiataq churiyarqan Reaiata, Reaiataq churiyarqan Baalta, 6Baaltaq churiyarqan Rubén aylluq umallin Beerata, paymi Asiria suyu rey Tiglat-pileserpa apasqan karqan. 7Beeraq wawqenkunan aylluntinkama miray qelqapi qelqasqaman hina karqanku: umalli Jeiel, Zacarías, 8Azaspa churin Belapiwan (paypa ñawpa taytankunan karqan Semawan Joelpiwan). Tiyarqankutaq Aroermanta Nebokama Baalmeonkama ima. 9Galaad hallp'apin uywanku askhata mirarqan, chaymi inti lloqsimuy ladopi tiyarqanku Eufrates mayumanta ch'inneq qorpakama. 10Rey Saulpa tiemponpin paykunaqa Agar runakuna contra maqanakurqanku, hinaspan paykunata atipaspa hallp'ankuta hap'ikapurqanku Galaadpa llapan inti lloqsimuy hap'iyninpi. 11Gad aylluqa wawqen Rubén aylluq wichayninpin tiyarqan, Basán hallp'api Salca llaqtakama. 12Basanpiqa Joelmi ñawpaqkaq kamachikuq karqan, Safantaq iskaykaq kamachikuq karqan, chayman qatiqkunataq Jaanai, Safatpiwan. 13Ayllu-masinkunataq familiantinkama karqanku: Micael, Mesulam, Seba, Jorai, Jacán, Zía, Heberpiwan, llapanku qanchis. 14Paykunan karqan: Huriq churin Abihailpa churinkuna. Abihailpa ñawpa taytankunataq karqan: Jaroa, Galaad, Micael, Jesisai, Jahdo, Buzpiwan. 15Guniq churin Abdielpa churin Ahiqa chay familiakunaq umallinmi karqan. 16Tiyarqanku Galaadpi, Basanpi, campo llaqtachakunapi, Sharonpa llapan pastoyoq cheqaskunapi. 17Llapan chaykunan miray qelqapi qelqasqa karqanku, Judá rey Jotampa tiemponpi, Israel rey Jeroboampa tiemponpi ima. 18Rubén ayllupi, Gad ayllupi, Manasés kuskan ayllupi karqan tawa chunka tawayoq waranqa qanchis pachak soqta chunka soldadokuna, paykunan karqanku escudowan, espadawan, p'eqtawan maqanakuypaq allin wakichisqa. 19Paykunan maqanakurqanku Agar runakunawan, Jetur runakunawan, Nafis runakunawan, Nodab runakunawan ima. 20Paykunaqa maqanakushaspankun Diosmanta mañakurqanku, hinan Diosqa paykunata yanaparqan iñisqankurayku, atipachirqantaq Agar runakunata llapan paykuna yanapaq runakunatapas. 21Hinan Israel runakunaqa Agar runakunaq uywankunata aparqanku phisqa chunka waranqa camellokunata, iskay pachak phisqa chunka waranqa ovejakunata, iskay waranqa asnokunatawan. Runakunatataq pachak waranqata presota hap'irqanku. 22Agar runakunaqa askhan wañurqanku Dioswan maqanakuy kasqanrayku. Chaymi Agar runakunaq hallp'ankupi Israel runakunaqa tiyarqanku wak suyuman kamachipaq apasqa kanankukama. 23Manasés kuskan aylluq mirayninkunan askha mirarqan. Tiyarqankutaq Basanmanta Baal-hermonkama, Senir nisqa Hermón orqokama ima. 24Familiankunaq umallinkunan karqan: Efer, Isi, Eliel, Azriel, Jeremías, Hodavías, Jahdielpiwan. Paykunan karqanku allin qharikuna, kallpasapa mentasqa qharikuna. 25Ichaqa ñawpa taytankuq Diosnin contran huchallikurqanku, hinaspa tiyasqanku suyupi dioskunata servispanku waqllipurqanku, chay dioskunatan Diosqa qayllankupi thunisqa. 26Chayraykun Israelpa Diosninqa Asiria suyu rey Pul nisqa Tiglat-pileserpa sonqonta tanqarirqan. Hinan payqa kamachipaq aparqan Rubén aylluta, Gad aylluta, Manasés kuskan ayllutawan, hinaspa aparqan Halahman, Haborman, Haraman, Gozán mayuman ima, chaypitaq qhepapurqanku.

will be added

X\