1 Crónicas 29

1Chaymantataq Davidqa llapan huñuykusqa runakunata nirqan: –Diosqa churiy Salomonllatan akllakurqan. Payqa warmallaraqmi, manan yuyaykukuytapas yachanraqchu. Llank'ananqa ancha hatunmi, manan wasitaqa runakunapaqchu sayarichinqa, aswanpas Señor Diospaqmi. 2Chaymi tukuyta atisqayman hina askhata huñurqani Diosniypa wasinta sayarichinanpaq: qorita, qolqeta, bronceta, fierrota, kurkutawan, sapanka chaykunawan tukuy necesitasqanta ruwananpaq. Huñullarqanitaq yanayoq-yuraq umiñata, ch'olqochina umiñakunata, color-color rumikunata, tukuy t'aqa umiñakunata, yuraq qespi rumikunatapas askhatapuni. 3Tukuy chay huñusqaykunamanmi yapaykullanitaq Diosniypa wasinta munakusqayrayku. Ñoqaq kaqniykunamantan qorita qolqetawan qoni: 4pachak waranqa kilo ch'uyay-ch'uya qorita, iskay pachak kinsa chunka waranqa kilo ch'uya qolqeta, yupaychana wasi perqakunata qatanapaq, 5qori serviciokunapaq, qolqe serviciokunapaq, artesanokunaq tukuy imaymana ruwanankupaqwan. Chay hinaqa, ¿mayqenniykichistaq mana mich'akuspa tukuy sonqo Señor Diospaq qoyta munankichis? nispa. 6Hinan ayllu umallikuna, waranqa soldadoq umallinkuna, pachak soldadoq umallinkuna, ayllu oficialkuna, reypa kaqninkunapi kamachikuqkunapas tukuy sonqo ofrendankuta aparqanku 7Señor Diospa wasinta sayarichinapaq: pachak soqta chunka phisqayoq waranqa kilo qorita, chunka waranqa qorimanta qolqeta, kinsa pachak kinsa chunka waranqa kilo qolqeta, soqta pachak waranqa kilo bronceta, kinsa waranqaq waranqan kinsa pachak waranqa kilo fierrotawan. 8Umiñayoq llapan runakunapas umiñankuta qorqanku Señor Diospa wasinpi qhapaq kaykunapaq. Chaykunatan waqaycharqan Gersonpa miraynin Jehiel. 9Chaymi llapa llaqta anchata kusikurqanku tukuy sonqo ofrendankuta Señor Diospaq qosqankumanta. Hinallataq rey Davidpas anchatapuni kusikurqan. 10Chaymantataq Davidqa llapa huñuykusqa runakunaq qayllanpi Señor Diosta hatunchaspa nirqan: –Israel ñawpa taytaykuq Diosnin Señor, wiñay-wiñaykama yupaychasqan kanki. 11Qanqa, Señor Diosníy, hatunmi atiyniyoqmi kanki, qanqa manchanataq qhapaqtaq lliphlli-kayniyoqtaq kanki. Qanpan hanaq pachapi kay pachapi tukuy kaqkunapas. Qanmi, Señor Diosníy, munaychakunki, qanmi hatunchasqa Qollanaqa kanki. 12Qanmantan qhapaq-kaypas atiypas hamun, llapallantan qanqa kamachinki. Qanpan kallpapas atiypas, llapallanta hatunchanaykipaqpas kallpachanaykipaqpas. 13Chay hinaqa, Diosniyku, graciastan qoykiku, qhapaq qollanan sutiykitataq yupaychaykiku. 14¿Imataq ñoqari kani? ¿Imataq llaqtaypas, mana mich'akuspa qonaykupaq? Tukuymi qanpa, qanmanta chaskisqallaykutan qoykiku. 15Ñoqaykuqa wak llaqtayoq qorpachakuq runa hinallan ñawpaqeykipi kayku, imaynan llapan ñawpa taytaykupas karqan hina. Kay pachapi kawsayniykupas llanthu hinallan chinkaripun, manan unaytachu takyan. 16¡Ay! Diosniyku Señor Dios, ch'uya sutiykipaq wasita sayarichinaykupaq huñusqayku kay llapan ofrendakunataqa qanmi qowarqankiku, qanpa kaqniykitaq llapanpas. 17Yachanin, Diosníy, sonqokuna t'aqwiq kasqaykita, chaninkaqta munasqaykitapas, chaymi kay llapan ofrendakunata apamuyki tukuy sonqo, chanin-kay sonqoywan. Kusikunitaqmi kaypi huñuykusqa llaqtaykiwanpas, tukuy sonqo ofrendankuta qosqasuykita rikuspa. 18Abraham, Isaac, Jacob ñawpa taytaykuq Diosnin Señor Diosniyku, kay llaqtaykiq sumaq sonqonta yuyaykukuynintapas kaqllata wiñaypaq waqaychay, qanta kasukuq sonqotataq qoy, 19Salomón churiymanpas qoykapuway qan kasukuq sonqota, kamachikuyniykikunata, chaninchayniykikunata, unanchayniykikunatapas hunt'ashanallanpaq, tukuyta llank'aspantaq wasita sayarichipunasuykipaq, chaypaqmi ñoqa wakichiniña, nispa. 20Chaymantataq Davidqa llapa huñuykusqa runakunata nirqan: –¡Yupaychaychis Diosninchis Señor Diosta! nispa. Hinan llapa huñusqa runakunaqa ñawpa taytankuq Diosnin Señor Diosta yupaycharqanku, hinaspa paypa ñawpaqenpi reypa qayllanpi qonqor-chaki k'umuykukurqanku. 21Qhepantin p'unchaytaq Señor Diosman sacrificiokunata haywarqanku, ruphachina sacrificiokunatapas ruphachirqanku waranqa torillota, waranqa borregota, waranqa anejotawan, sapankata hich'aykunapaq vino ofrendantintakama. Haywallarqankutaq askha sacrificiota llapan Israel runakunamanta. 22Chay p'unchaymi ancha kusisqa Señor Diospa ñawpaqenpi mikhurqanku ukyarqanku, hinaspa iskaykaq kutipi Davidpa churin Salomonta rey kasqanta sut'incharqanku, Señor Diospa qayllanpi uma kananpaq aceitewan hawispanku. Sadoctataq sacerdotepaq aceitewan hawirqanku. 23Hinan Salomonqa Señor Diospa kamachikuy tiyananpi rey tiyaykurqan, taytan Davidpa rantinpi. Salomonpaqqa tukuymi allinkama karqan, llapan Israel runakunapas paytaqa kasurqanmi. 24Hinataq llapan oficialkuna, allin qharikuna, rey Davidpa churinkuna ima rey Salomonta kasukunankupaq prometekurqanku. 25Señor Diostaq anchata Salomonta hatuncharqan, chaytan llapan Israel runakunaqa yacharqanku. Suyu kamachisqanpitaq hatun atiyta qorqan, chaymi Israel suyupi ñawpaqta mana pay hina reyqa karqanchu. 26Isaipa churin Davidqa llapan Israel suyupin kamachikurqan 27tawa chunka watata. Hebronmantan qanchis watata kamachikurqan, Jerusalenmantataq kinsa chunka kinsayoq watata. 28Payqa sinchi yuyaqñan wañukapurqan, qhapaq-kayninpipas yachayninpipas ch'isiyasqa runaña. 29Rey Davidpa ruwasqankunaqa qallariymanta p'uchukaykama qelqasqan kashan profeta Samuelpa Willakuynin Qelqapi, profeta Natanpa Willakuynin Qelqapi, profeta Gadpa Willakuynin Qelqapiwan. 30Llapan kamachikusqankunamanta, atiyninmanta, hinallataq Israel suyupi, llapan wak suyukunapipas imaymana payta qatisqanmantawan qelqasqallataqmi kashan.

will be added

X\