1 Crónicas 26

1Punku qhawaqkunapas rakisqallataqmi karqanku: Corepa mirayninmanta: Ebiasafpa churin Meselemías. 2Meselemiaspa churinkunan karqan: phiwin Zacarías, iskaykaqtaq Jediael, kinsakaqtaq Sebadías, tawakaqtaq Jatniel, 3phisqakaqtaq Elam, soqtakaqtaq Johanán, qanchiskaqtaq Elihoenai. 4Obed-edompa churinkunan karqan: phiwin Semaías, iskaykaqtaq Jozabad, kinsakaqtaq Joa, tawakaqtaq Sacar, phisqakaqtaq Natanael, 5soqtakaqtaq Amiel, qanchiskaqtaq Isacar, pusaqkaqtaq Peultai. Obed-edomtaqa Diosmi anchata samincharqan. 6Obed-edompa phiwi churin Semaiaspa churinkunan nacellarqantaq. Paykunan allin qhari karqanku, chaymi ayllunkupi umalli karqanku. 7Semaiaspa churinkunan karqan: Otni, Rafael, Obed, Elzabadpiwan. Hinallataq wawqenku Eliupas Samaquiaspas allin qhari karqanku. 8Llapan chaykunan Obed-edompa miraynin karqan, paykunapas churinkupas wawqenkupas allin kallpasapa imaymana atiq, Señor Diospa wasinpi llank'ay yachaq karqanku, llapanku soqta chunka iskayniyoq. 9Meselemiaspa churinkunan wawqenkunapiwan chunka pusaqniyoq allin imaymana atiq qharikuna karqanku. 10Merariq mirayninmanta Hosaq churinkunan karqan umalli Simri (payqa manan phiwi churichu karqan, chaywanpas taytan Hosanmi umallita churarqan), 11iskaykaqtaq Hilcías, kinsakaqtaq Tebalías, tawakaqtaq Zacarías. Hosaq llapan churinkunan wawqenkunapiwan chunka iskayniyoq karqanku. 12Chay punku qhawaqkunan umallinkuman hina rakisqa karqanku, paykunapas wawqenku hinallataqmi Señor Diospa wasinpi llank'ananku karqan. 13Sapanka punku qhawaqpaqtaq sorteopi akllarqanku ayllunkuman hina, kuraktapas sullk'atapas llapanta. 14Hinan Selemiasman tuparqan inti lloqsimuy lado punku. Churin Zacariasmantaq tuparqan wichay lado punku, payqa allin yachaysapa yuyaychaqmi karqan. 15Obed-edommantaq tuparqan uray lado punku, paypa churinkunamantaq tuparqan imaymana waqaychana wasikuna. 16Shupimpaq Hosapaqwantaq tuparqan inti haykuy lado punku, patakaq ñanpi Salequet punkupiwan. Punku qhawaqkunaqa qati-qatin llank'arqanku tupaqninkuman hina. 17Sapa p'unchaypaq inti lloqsimuy ladopi Leví runakuna soqta karqan, wichay lado punkupipas tawa runakuna, uray lado punkupipas tawa runakuna, imaymana waqaychana wasikunapipas tawa runakuna iskaykama tupachinakunankupaq. 18Inti haykuy lado patio qaylla ñanpi tawa runakuna karqan, kikin patiopitaq iskay runakuna. 19Chay hinatan punku qhawaqkunata rakirqanku, paykunan karqan Corepa mirayninmanta, Merariq mirayninmantawan. 20Leví runakunamanta Ahiastaq Diospa wasinpi qhapaq kaykunata waqaycharqan, Diospaq t'aqasqa qokuykunata churana wasikunatapas. 21Gersonpa mirayninmanta Laadanpa churinkunaq ayllun umallikunan karqan: Jehiel, 22Zetam, wawqenku Joelpiwan. Paykunan Señor Diospa wasinpi qhapaq kaykunata waqaycharqanku. 23Amrampa mirayninmanta, Izharpa mirayninmanta, Hebronpa mirayninmanta, Uzielpa mirayninmantawan karqan, 24Moisespa churin Gersonpa miraynin Sebuelmi qolqe waqaychaqkunaq umallin, karqan. 25Gersonpa wawqen Eliezerpa mirayninmi karqan Rehabías, Rehabiaspa churintaq Jesaías, Jesaiaspa churintaq Joram, Jorampa churintaq Zicri, Zicriq churintaq Selomit. Paykunan Sebuelpa ayllumasin karqanku. 26Selomitmi wawqenkunapiwan Señor Diospaq tukuy t'aqasqa qokuykunata waqaycharqanku. Chaykunatan qorqanku rey David, ayllu umallikuna, waranqa runaq umallinkuna, pachak runaq umallinkuna, ejército wakin oficialkuna ima. 27Paykunaqa maqanakuypi wakin llat'anasqankutan Señor Diospa wasinpaq t'aqarqanku. 28Selomitqa wawqenkunapiwan waqaychallarqantaqmi profeta Samuelpa, Cispa churin Saulpa, Nerpa churin Abnerpa, Sarviaq churin Joabpa t'aqasqankuta, hinallataq wakin runakunaq llapan t'aqasqankutapas. 29Izharpa mirayninmanta Quenaniastaq churinkunapiwan Señor Dios yupaychana wasimanta sapaq cheqaskunapi Israel runakunapaq oficialkuna juezkuna karqanku. 30Hebronpa mirayninmanta Hasabiasmi wawqenkunapiwan waranqa qanchis pachak allin imaymana atiq qharikuna karqanku. Paykunan Jordán mayu inti haykuy suyupi kamachirqanku Señor Diospaq tukuy llank'aykunata, reypaq tukuy ruwaykunatapas. 31Hebronpa miraynin ayllukunaq umallinqa Jeriasmi karqan. Tawa chunkakaq watapi rey David kamachikushaqtinmi Hebronpa miraynin ayllukuna qelqata qhawarqanku, hinan Galaadpi Jazer llaqtapi tiyaq allin imaymana atiq qharikunata tarirqanku. 32Jeriaspa wawqenkunan iskay waranqa qanchis pachak ayllu umalli allin imaymana atiq qharikuna karqanku, chaymi rey Davidqa paykunata churarqan Rubén aylluta, Gad aylluta, Manasespa kuskan aylluntawan kamachinanpaq, Diospaq tukuy llank'aykunapi, reypaq tukuy ruwaykunapipas.

will be added

X\