1 Davidqa sinchi yuyaq runaña kaspanmi churin Salomonta Israel suyuq reyninta churarqan. 2 Davidqa Israel suyupi llapan umallikunata, sacerdotekunata, Leví runakunatawanmi huñuykurqan, 3 hinaspan Leví runakunata kinsa chunka watayoqmanta wichayman yupachirqan. Chaymi yupaqtinku kinsa chunka pusaqniyoq waranqa qharikuna karqanku. 4 Chaykunamantan iskay chunka tawayoq waranqa qharikunata Señor Diospa wasinta sayarichiypi llank'achiqta churarqanku, soqta waranqatataq oficialkunata juezkunata ima churarqan. 5 Hinallataq churarqan tawa waranqata punku qhawaqkunata, huk tawa waranqatataq Davidpa qosqan tocanakunawan Señor Diosta yupaychanankupaq. 6 Davidmi Leví runakunata t'aqarqan mirayninkuman hina kinsa t'aqata: Gersonpa mirayninta, Cohatpa mirayninta, Merariq miraynintawan. 7 Gersonpa mirayninmantan karqan: Laadanpiwan Simeipiwan. 8 Laadanpa kinsantin churinkunan karqan: phiwin Jehiel, qatiqnin Zetam, Joelpiwan. 9 Simeipa kinsantin churinkunan karqan: Selomit, Haziel, Haranpiwan. Paykunan Laadanpa ayllun umallikuna karqan. 10 Simeipa churinkunan karqan: Jahat, Zina, Jeús, Beriapiwan. 11 Jahatmi phiwin karqan, chayman qatiqtaq Zina, Jeuswan Beriawanqa manan askha wawayoqchu karqanku, chaymi huk ayllumanña yupachikapurqanku. 12 Cohatpa churinkunan tawa karqan: Amram, Izhar, Hebrón, Uzielpiwan. 13 Amrampa churinkunan karqan Aaronpiwan Moisespiwan. Aaronqa churinkunapiwanmi Diospaq t'aqasqa karqanku, aswan ch'uya kaqkunata wiñay waqaychanankupaq, Señor Diosman sacrificiota haywanankupaq, Señor Diospa ñawpaqenpi servinankupaq, Señor Diospa sutinpi runakunata saminchanankupaqwan. 14 Dios sonqo runa Moisespa churinkunan Leví ayllupi yupasqa karqanku. 15 Moisespa churinkunan karqan: Gersonpiwan Eliezerpiwan. 16 Sebuelqa Gersonpa miraynin umallin karqan. 17 Rehabiaspas Eliezerpa mirayninpi umallin karqan. Eliezerpa churinqa ch'ullallan karqan, Rehabiaspa churinmi ichaqa askha karqan. 18 Selomitqa Izharpa miraynin umallin karqan. 19 Hebronpa churinkunan karqan: phiwin Jerías, iskaykaq Amarías, kinsakaq Jahaziel, tawakaqtaq Jecamán. 20 Uzielpa churinkunan karqan: phiwin Micaía, sullk'akaqtaq Isías. 21 Merariq churinkunan karqan: Mahli Musipiwan. Mahliq churinkunan karqan: Eleazar Cispiwan. 22 Eleazarpaqa manan churin karqanchu wañukapunankama, ususinkunallan karqan, paykunawanmi Cispa churin primonkunaqa casarakurqanku. 23 Musiq churinkunan kinsa karqan: Mahli, Edar, Jeremotpiwan. 24 Chaykunan Levipa mirayninmanta karqan, sapanka sutinmantakama yupasqa, taytankuq ayllunpi umalli kasqankuman hina. Iskay chunka watayoqmanta wichaymantaq Señor Diospa wasinpi llank'arqanku. 25 Davidqa nirqanmi: Israelpa Diosnin Señormi llaqtanman thak-kawsayta qorqan, pay kikintaq wiñaypaq Jerusalenpi tiyanqa. 26 Chaymi Leví runakunaqa Señor Dioswan Tupana Karpata, yupaychanapaq tukuy serviciokunatapas manaña huk cheqasmanta huk cheqasman apanqakuñachu, nispa. 27 Chay hinaqa, Davidpa p'uchukay unanchasqanman hinan, Leví runakunaqa iskay chunka watayoqmanta wichayman yupasqa karqanku. 28 Paykunaqa Aaronpa mirayninkunatan Señor Diospa wasinpi llank'aysinanku karqan. Paykunan waqaychananku karqan patiokunata, cuartokunatawan, hinallataq Señor Diospaq t'aqasqa serviciokunatapas ch'uyanchananku karqan, wak llank'aykunatapas ruwananku karqan. 29 Kaqllataq wakichinanku karqan Diospa ñawpaqenpi churana t'antata, ruru ofrendapaq sumaq hak'uta, mana qonchuyoq llaphllallaña t'antata, hak'uta chapuspa wak t'antatapas, tukuy t'aqa tupuykunatapas yupaykunatapas qhawananku karqan. 30 Sapa p'unchaytaq ch'isin-paqar yupaychana wasipi sayaykuspanku Señor Diosta yupaychananku, graciasta qonanku karqan. 31 Chay hinallatataq ruwananku karqan ruphachina sacrificiota sapa kuti Señor Diosman haywaspanku samana p'unchaypi, Mosoq Killa Fiestapi, hatun fiestakunapi ima, kamachikuyman hina hayk'achus llank'ananku karqan chayman hina. Chaytan Señor Diospa ñawpaqenpi tukuy tiempo ruwarqanku. 32 Chay hinaqa, waqaychanankun karqan Señor Dioswan Tupana Karpata, Ch'uya Cheqastawan, Señor Diospa wasinpipas ayllunku Aaronpa mirayninkunatan llank'aysinanku karqan.
