1 Chaymi Davidqa yuyaykurqan: Kaypin Señor Diospa wasinqa kanqa, kayllapitaq Israel runakunaq sacrificio ruphachinan altarpas kanqa, nispa. 2 Chaymantataq Davidqa kamachikurqan Israel suyupi tiyaq wak llaqtayoq runakuna huñukunanpaq, hinaspa paykunamanta akllarqan rumi thupaqkunata Diospa wasinta sayarichinapaq rumikunata wakichinankupaq. 3 Hinallataq askha fierrota qorqan punkukunapaq clavokunata hap'iqkunatawan ruwananpaq, qollarqantaq ancha askha bronceta mana pesay atiytaraq, 4 askha cedro kurkukunatapas mana yupay atiytaraq. Chay cedro kurkukunataqa Sidón runakuna Tiro runakunapiwanmi askhata Davidman aparqanku. 5 Davidmi yuyaykurqan: Salomón churiyqa warmallaraqmi, manataq ima ruwaytapas yachanraqchu, Señor Diospaq wasi sayarichinantaq ichaqa ancha musphana mentasqa kanqa, llapan kay pacha suyukunaq yachasqan. Chay hinaqa, wakichipushasaqña wasi sayarichinanpaq, nispa. Chaymi Davidqa manaraq wañukapushaspa ancha askhataña wasi sayarichinapaq wakichirqan. 6 Chaymantataq Davidqa churin Salomonta waqyachispa Israelpa Diosnin Señorpaq wasita sayarichinanta kamachirqan: 7 –Churilláy, sonqoypin yuyaykurqani Diosninchis Señor Diosta hatunchanapaq wasita ruwapuyta, 8 ichaqa Señor Diosmi niwarqan: Qanqa askha runatan wañuchirqanki, hatun maqanakuykunapitaq maqanakurqankipas. Manan ñoqapaq wasita ruwapuwankimanchu, ñawpaqeypi kay pachapi askha runata wañuchisqaykirayku. 9 Aswanpas huk churiykin nacenqa, paymi kanqa llamp'u runa. Ñoqan muyuriqpi llapan awqankunamanta waqaychaspa sumaqta kawsachisaq, chaymi sutinpas Salomón kanqa, Israel suyumantaq qosaq sumaq kawsayta, llamp'u kawsayta Salomón wañukapunankama. 10 Paymi ñoqapaq wasita ruwapuwanqa. Paymi ñoqaq churiy kanqa, ñoqataq paypa taytan kasaq. Israel suyupitaq paypas mirayninpas kamachikushallanqapuni, nispa. 11 Chay hinaqa, churilláy, Diosninchis Señor Dios qanwan kachun. Paymi nisqanman hina kallpachasunki paypaq wasita ruwanaykipaq. 12 Señor Dios munachun yachayniyoq allin yuyayniyoq kanaykita, Israel suyuta kamachishaspayki Diosniyki Señor Diospa kamachikuy siminta hunt'anaykipaq. 13 Tukuypi allin kanaykipaqqa makilla qhaway Señor Diospa kamachikuyninkunata unanchayninkunata hunt'anaykipaq, chaykunatan payqa Israelpaq Moisesman qomusqa. ¡Kallpachakuy! Ama pisi kallpayaychu, ama manchakuychu, amataq musphaypaschu. 14 Ñoqaqa anchata kallpachakuspaymi Señor Diospa wasinpaq wakichirqani kinsa waranqaq waranqan tawa pachak waranqa kilo qorita, kinsa chunka tawayoq waranqaq waranqan kilo qolqeta, broncetapas fierrotapas mana pesay atiyta, hinallataq rumitapas, kurkutapas. Chaymanñachá qan yapaykunki. 15 Askhan llank'aqniykikunapas kanqaku, rumi thupaqkuna, wasi perqaqkuna, k'ullu llaqllaqkuna, hinallataq tukuy llank'ay yachaq askha runakunapas. 16 Askhan kashan qoripas qolqepas broncepas fierropas. Llank'allayña, Señor Diostaq qanwan kachun, nispa. 17 Hinaspataq Davidqa Israel suyupi llapan umallikunata kamachirqan Salomón churinta yanapanankupaq: 18 Qankunawanmi Diosninchis Señor Dios kashan, paymi thak kawsayta suyuntinpi qorqasunkichis. Señor Diosmi kay suyupi tiyaq runakunata hap'ichiwarqan, chaymi kay suyutaqa Señor Dios munaychakun Israel llaqtanpas munaychakullantaq. 19 Chay hinaqa, tukuy sonqo tukuy alma Diosniykichis Señor Diosta maskhaychis. Llank'aychis, Señor Diospa wasinta sayarichiychis, Señor Diospa rimanakuynin arcata, Diospaq t'aqasqa serviciokunatawan apaspa chayman churanaykichispaq. Chay wasin kanqa Señor Diosta hatunchanapaq, nispa.
