1 Crónicas 21

1Satanasmi Israel runakuna contra sayarirqan, chaymi Davidta yuyaykachirqan Israel runakunata yupananpaq. 2Hinan Davidqa Joabta ejército umallinkunatawan kamachirqan: –Phawaychis, Israel runakunata yupamuychis Beersebamanta Dankama, hinaspa willawankichis hayk'achus paykuna kasqankuta yachanaypaq, nispa. 3Joabtaq kutichirqan: –Señor reyníy, pachak kutitaraq llaqtaykita Dios askhayachichun, paykunaqa llapallanmi kamachiykikuna. Reyníy, ¿imanaqtintaq runa yupanata munanki? ¿Imapaqtaq Israel runakunata huchachachiwaq? nispa. 4Chaywanpas reyqa mana uyarispan Joabta kamachishallarqan. Hinan Joabqa Israel suyuntinta puririrqan, chaymantataq Jerusalenman kutipurqan. 5Hinaspan Davidman willarqan maqanakuy atiq qharikuna hayk'achus kasqanta. Israel suyupitaq karqan waranqaq waranqan pachak waranqa qharikuna, Judá suyupitaq tawa pachak qanchis chunka waranqa qharikuna. 6Joabmanqa manan allinchu rikch'akurqan reypa kamachikusqan, chaymi mana yuparqanchu Leví ayllutapas Benjamín ayllutapas. 7Chay yupaytaqa manan Diosqa munarqanchu, chaymi Israel runakunata muchuchirqan. 8Hinan Davidqa Diosta nirqan: –Sinchitan huchallikuni chayta ruwaspa. Rogakuykin, Diosníy, kay huchayta pampachaykuway, mana yuyayniyoq hinan chayta ruwarqani, nispa. 9Señor Diostaq Davidpa yuyaychaqnin profeta Gadta nirqan: 10–Phaway Davidman, hinaspa nimuy, Señor Diosmi nin: Kinsa muchuchiytan churayki, kinsantinmanta hukkaqta akllakuy, hinaspa chaywan muchuchisqayki, nispa. 11Hinan Gadqa Davidman rispa nirqan: –Señor Diosmi nin: 12Akllakuy, mayqentan munanki: ¿Kinsa wata yarqaytachu? ¿Awqaykikunaq espadawan muchuchisqan kinsa killa ayqeytachu? Icha, ¿Señor Diospa angelnin Israel suyuntinpi kinsa p'unchay millay onqoywan wañuchinantachu? Chhaynaqa, akllakuy kachamuwaqniyman willanaypaq, nispa. 13Chaymi Davidqa profeta Gadta nirqan: –Hatun llaki phutiypin kashani, chaypas manan runakunaq muchuchisqan kayta munanichu, aswanpas Señor Diospa muchuchiwanantan munani, payqa ancha hatun khuyapayakuqmi, nispa. 14Hinan Señor Diosqa Israel suyuntinman millay onqoyta kachamurqan, chaymi qanchis chunka waranqa Israel runakuna wañurarqan. 15Chaymantataq Diosqa angelta kachamurqan Jerusalén llaqtata ch'usaqyachinanpaq. Chay ángel ch'usaqyachishaqtintaq Señor Diosqa chayta qhawarispa llakikurqan, hinaspan wañuchiq angelta nirqan: –¡Chaykamalla! ¡Amaña ch'usaqyachiychu! nispa. Señor Diospa angelnintaq Jebusmanta Araunaq eran qayllapi sayasharqan. 16Davidtaq altota qhawarispa Señor Diospa angelninta rikurqan, churananmanta horqosqa espadanwan Jerusalén llaqtata ch'usaqyachinan patapi kashaqta. Hinan Davidqa kurak runakunapiwan qhasqa p'achayoq qonqoriykukuspa pampakama k'umuykukurqanku. 17Chaymi Davidqa Señor Diosta nirqan: –Ñoqan runakunata yupachiqqa kani, ñoqan huchallikuni, ñoqan mana chaninta ruwani. ¿Ima huchayoqtaq kay runakunari? ¡Diosníy Señor Dios! Ama llaqtaykitaqa muchuchiychu, aswanpas ñoqata familiaytawan muchuchiwayku, nispa. 18Hinan Señor Diospa angelninqa profeta Gadta nirqan: –Davidta kamachiy Jebusmanta Araunaq eranpi Señor Diospaq huk altarta sayarichinanpaq, nispa. 19Chaymi Davidqa rirqan, profeta Gadwan Señor Diospa kamachisqanman hina. 20Araunaqa trigotan saruchisharqan, kutirispataq angelta rikurqan, chaymi paywan kashaq tawantin churinkuna pakakurqanku. 21Davidtaq Araunaman qayllaykurqan, hinan payqa Davidta rikuspa eranmanta lloqsispa Davidpa ñawpaqenpi pampakama k'umuykukurqan. 22Davidtaq Araunata nirqan: –Kay eraykita vendeway. Señor Diospaq kaypi altarta sayarichisaq millay onqoy kay suyupi thaninanpaq. Hayk'achus valesqanta pagapusqayki, nispa. 23Araunataq kutichirqan: –Señor reyníy, hayk'an munasqaykita hap'iy, hinaspa mayqenchá allin rikch'akusunki chayta ruway. Qollasqaykitaqmi torokunatapas ruphachina sacrificiopaq, trigo saruna rastrakunatapas llant'apaq, trigotataq ruru ofrendapaq, llapantan qosqayki, nispa. 24Hinan rey Davidqa Araunata nirqan: –Manan yanqallanqa munanichu, aswanpas pagapusqaykin hayk'aña valeqtinpas. Manan qanpa kaqniykitaqa Señor Diosman qoymanchu, manataq ruphachina sacrificiotapas haywaymanchu mana qolqeypa chanintaqa, nispa. 25Davidqa chay cheqasmanta soqta pachak qorimanta qolqetan Araunaman pagapurqan, 26hinaspa chaypi Señor Diospaq altarta perqarqan. Chaymantataq ruphachina sacrificiokunata, sumaq kawsay sacrificiokunatawan haywarqan. Hinaspa Señor Diosmanta mañakurqan, paytaq kutichimuspa hanaq pachamanta ninata kachamurqan altar patapi sacrificiokunata ruphananpaq. 27Angeltataq kamachirqan espadanta churananman churapunanpaq, hinan angelqa kasurqan. 28Mañakusqanta Señor Diospa uyarisqan hawan Davidqa Jebusmanta Araunaq eranpi sacrificiota Señor Diosman haywashallarqan. 29Moisespa ch'inneqpi Señor Diospaq karpa ruwasqanpas, sacrificio ruphachina altarpas Gabaonpi yupaychana cheqaspin kasharqan. 30Davidtaq chay cheqasta mana riyta munarqanchu Señor Diosta tapuq, angelninpa espadanta manchakusharqanraq chayrayku.

will be added

X\