1 Crónicas 19

1Amón suyu runakunaq reynin Nahas wañupuqtintaq, churin Hanún rantinpi kamachikurqan. 2Hinan Davidqa nirqan: –Hanunpa taytan Nahasqa khuyapayawarqanmi, ñoqapas churin Hanunman oficialniykunata kachasaq taytanmanta llakikuyninpi sonqochaykuqta, nispa. Davidpa oficialninkuna Hanún sonqochaq Amón suyuman chayaqtinkutaq, 3chay suyupi umalli qharikunaqa Hanunta nirqanku: –¿Davidqa taytaykita munakuspa sonqochaqta kachamusqasuykitachu yuyanki? Aswanpas, ¿manachu llaqtanchista reqsinankupaq, qhawaranankupaq, chay qhepatataq atipawananchispaq kachamushanman? nispa. 4Chaymi Hanunqa Davidpa oficialninkunata hap'ispa sunkhanta k'isurqachirqan, p'achantapas kuskanta sikipatankama wit'urqachirqan, hinaspataq kacharparipurqan. 5Chaytan Davidman willarqanku, hinan payqa willaqkunata kacharqan taripananpaq, paykuna sinchi p'enqasqa kashasqankurayku. Davidqa nirqanmi: Jericó llaqtapi qhepakuychis sunkhaykichis wiñanankama, chaymantaña kutimpunkichis, nispa. 6Hanuntaq Amón runakunapiwan Davidwan cheqnichikusqankuta reparakuspa, kinsa chunka waranqa kilo qolqewan mink'akurqanku carretakunata caballoyoq soldadokunatawan Mesopotamiamanta, Siria suyupi Maacamanta, Sobamantawan. 7Ahinapin mink'akurqan Maaca reyta, ejercitonta, kinsa chunka iskayniyoq waranqa carretankunatawan. Hinan paykunaqa rispanku Medeba qhawaypi karpakurqanku. Amón runakunapas sapanka llaqtankumanta huñukullarqankutaq maqanakuyman rinankupaq. 8Tukuy chaykunata yachaspataq Davidqa ejerciton umalli Joabta kacharqan llapan soldadonkunatawan. 9Amón soldadokunataq lloqsimuspa llaqta punku haykunapi maqanakuypaq wakichikurqanku. Yanapaq riq reykunataq sapaq campopi kasharqanku. 10Hinan Joabqa qhepanpi ñawpaqenpi awqankuna kashasqanta rikuspa, aswan allin qharinkunata soldadonkunamanta akllarqospa wakichirqan Siria soldadokunawan maqanakunanpaq. 11Wakin soldadokunatataq wawqen Abisaiman hap'ichirqan, hinaspan paykunata wakichirqan Amón soldadokunawan maqanakunanpaq. 12Nirqantaq: Siria soldadokuna atipawaqtinqa qan yanapawanki, Amón soldadokuna atipasuqtiykitaq ñoqa yanapasqayki. 13¡Kallpachakusun! ¡Allin qhari kasun llaqtanchisrayku, Diosninchispa llaqtankunarayku ima! ¡Diosninchis Señor Diospuni munasqanman hina ruwachun! nispa. 14Joabtaq soldadonkunapiwan Siria soldadokunawan maqanakuq lloqsirqan, Siria soldadokunataq ichaqa paykunaq qayllankumanta ayqekapurqanku. 15Amón soldadokunapas Siria soldadokunaq ayqekusqanta rikuspa, Joabpa wawqen Abisaipa ñawpaqenmanta kutiripullarqankutaq, hinaspa llaqtaman haykurqanku. Chaymi Joabqa chay qhepata Jerusalenman kutipurqan. 16Siria soldadokunataq ichaqa Israel soldadokunaq atipasqan kasqankuta reparakuspa, Eufrates mayu chimpaman willaqkunata kacharqanku, hinan chay chimpamanta Siria soldadokunaqa Sofacpa umallisqan hamurqanku. Sofacqa Hadad-ezerpa ejercitonpa umallinmi karqan. 17Davidtaq chayta yacharqospa, llapan Israel soldadokunata huñurqorqan, hinaspan Jordán mayuta chimparqospa Siria soldadokunawan maqanakunanpaq soldadonkunata wakichirqan. Maqanakuyta qallariqtinkutaq Siria soldadokunaqa 18Israelpa qayllanmanta ayqepurqan. Chaymi Davidqa wañuchirqan qanchis waranqa carretapi soldadokunata, tawa chunka waranqa chakipi soldadokunata, ejército umallin Sofactapas wañuchillarqantaq. 19Hadad-ezerpa kamachisqan llapan reykunataq Israelpa atipasqan kaspanku, Davidwan allipunayta mañakurqanku. Chaymi Siria runakunaqa Israelpa kamachisqan kapurqanku, manañataq chaymantapacha hayk'aqpas Amón runakunata yanapayta munarqankuñachu.

will be added

X\