1 Crónicas 17

1Davidqa wasinpiñan tiyasharqan, chaymi payqa profeta Natanta nirqan: –Qhawariy, ñoqaqa cedro tablamanta ruwasqa wasipin tiyani, Señor Diospa rimanakuynin arcataq ichaqa karpallapi kashan, nispa. 2Natantaq kutichirqan: –Qanwanmi Diosqa kashan, ima munasqaykita ruway, nispa. 3Chay tutapachan Diosqa Natanta rimaykurqan: 4Phaway David kamachiyman, hinaspa nimuy: Qanqa manan tiyanaypaq wasita ruwapuwankimanchu. 5Egiptomanta Israel runakunata horqomusqaymanta kunankama manan hayk'aqpas wasipiqa tiyarqanichu, aswanpas karpallapin kayneqman haqayneqman purispa huk cheqasmanta huk cheqasman rirqani. 6Kay tukuy unayñan llapa Israel runakunawan purimushani, manataqmi mayqen Israel qollana umallikunatapas: ¿Imanaqtinmi cedro tablamanta wasita mana ruwapuwankichischu? nirqanichu. 7Chay hinaqa, David kamachiyta ninki, Tukuy-atiyniyoq Señor Diosmi nin: Campopi ovejata michispa purishaqtiykin, ñoqa pusamurqayki Israel llaqtayta umallinaykipaq. 8Maypiña puriqtiykipas qanwanmi karqani, llapan awqaykikunatapas ñawpaqeykipi muchuchirqani. Kay pachapi mentasqa runakunata hinan ruwasqayki. 9Israel llaqtaypaqtaq huk cheqasta wakichisaq, chaypin takyachisaq, hinan tiyanqaku mana piqpa muchuchisqan. Manataq awqankupas llakichinqañachu, 10imaynan Israel llaqtayman qollana umallikunata churasqay p'unchaymanta llakichirqanku hinataqa. Tukuy awqaykikunamantan qespichisqayki, prometeykitaqmi mirayniykimanta kamachikuqkuna kanantapas. 11Wañukapuqtiykipas ñawpa taytaykikunawanmi p'ampasqa kapunki, qanmanta paqarimuq churiykitataq kamachikuqta churasaq, hinaspa suyunta takyachisaq. 12Paymi wasita ruwapuwanqa, ñoqataq wiñaypaq atiyninta sayachisaq. 13Ñoqan taytan kasaq, paytaq churiy kanqa. Tukuy tiempon paytaqa munakusaq, manan Saulmanta hinachu t'aqakusaq. 14Ñoqan llaqtaypi umallita churasaq, paytaq ñoqapaq kamachishallanqapuni, kamachikuyninpas kashallanqapunin allin takyasqa nispa, nispayki. 15Hinan Natanqa llapan rikhuriypi rikusqantapas uyarisqantapas lliwta Davidman willarqan. 16Chaymi rey Davidqa karpaman haykurqan, Señor Diospa qayllanpi tiyaykuspataq nirqan: –Diosníy Señor Dios, kaykamañan yanapamuwanki, ichaqa ñoqapas aylluypas manan imapaschu kayku. 17Chaywanpas, Diosníy, chaykunamantaqa astawanñan ruwashanki, hamuq mitakunapaqpas prometellankitaq aylluyta saminchanaykipaq. Diosníy Señor Dios, allin mentasqa runapas kayman hinan qhawariwarqanki. 18¿Hatunchashawaqtiykiqa imatañataq niykiman? ¡Qanmi kay kamachiykita reqsiwanki! 19Señor Diosníy, qanmi munarqanki ñoqapaq kay hatun musphana ruwayta, ahinapin prometewarqanki kay hatuchachaq kaqkunata. 20Señor Diosníy, lliwta uyarisqayman hinaqa manan kanchu qan hina, manan kanchu huk Diosqa, sapallaykin kanki. 21¿Mayqen llaqtataq kay pachapi Israel llaqtayki hinaqa kanman? Qanmi Egipto suyumanta kacharichirqanki llaqtayki kananpaq. Manchay musphanatan paykunapaq ruwarqanki, ñawpaqenkumanta llaqtakunata wikch'urqanki, chaykunawantaq qanqa hatun mentasqa sutiyoq kapurqanki. 22Wiñay llaqtayki kananpaqmi Israelta akllakurqanki, Diosninkutaq kapurqankipas. 23Chay hinaqa, Señor Diosníy, ñoqamanpas aylluymanpas prometesqaykiqa hunt'akushallachunpuni. Nisqaykita hina ruway 24prometesqayki hunt'akushanallanpaq, ahinapin ancha mentasqa kanki. Hinan runakunaqa ninqaku: Tukuy-atiyniyoq Señor Diosmi Israelpa waqaychaqnin Diosqa, nispa. Ñoqaq aylluypas mana urmaqtaq ñawpaqeykipi sayanqa. 25Qanmi Diosníy, ñoqataqa niwarqanki aylluy mana urmaq sayananta, chaymi kay confianzawan mañakamuyki. 26Señor Diosníy, qanqa Diosmi kanki, qanmi prometewarqanki kay ancha allinta. 27Qanmi Señor Diosníy, aylluytaqa saminchayta munarqanki paykunata qhawashanallaykipaq. Qanmi aylluytaqa samincharqanki, wiñaypaq saminchasqataq kanqa, nispa.

will be added

X\