1 Ahinatan Diospa arcanta apaykurqanku, hinaspa Davidpa wakichisqan karpa ukhuman churaykurqanku. Chaymantataq ruphachina sacrificiota sumaq kawsay sacrificiotawan Diosman haywarqanku. 2 Chay sacrificiokunata haywayta tukuspañan, Davidqa Señor Diospa sutinpi llaqtata samincharqan. 3 Hinallataq llapan Israel runakunaman warmimanpas qharimanpas sapankaman rakichirqan t'antata, dátil nisqa ruru k'umpata pasas k'umpatawan. 4 Chaymantataq Davidqa Señor Diospa arcanpa ñawpaqenpi Leví runakunata serviqpaq churarqan, Israelpa Diosnin Señorta yupaychanankupaq, hatunchanankupaq, paymanta mañakunankupaq ima. 5 Asafmi umalli karqan, payman qatiqtaq Zacarías, yanapaqninkunataq Jeiel, Semiramot, Jehiel, Matatías, Eliab, Benaía, Obed-edom, Jeielpiwan. Paykunan tocarqanku tawtinkukunata arpakunata ima, Asaftaq platillota tocarqan. 6 Sacerdotekunataq Benaiaspiwan Johazielpiwan Diospa rimanakuynin arcaq ñawpaqenpi tukuy tiempo cornetata tocanankupaq churasqa karqanku. 7 Chay p'unchaymi Davidqa unancharqan Asafpa wawqenkunapiwan Señor Diosman yupaychaykunata takinankupaq. 8 ¡Señor Diosman graciasta qoychis! ¡Paymanta mañakuychis! Ruwasqankunata llaqtakunaman willaychis. 9 Señor Diosman takiychis, payman yupaychaykunata takiychis, tukuy musphana ruwasqankunamanta willakuychis. 10 Ch'uya sutinpi kusikuychis, Señor Diosta yupaychaqkunaqa sonqoykichispi kusikuychis. 11 Señor Diosmanta mañakuychis kallpachanasuykichispaq, Señor Diosmanqa qayllaykullaychispuni. 12 Señor Diospa musphana ruwasqankunata yuyariychis, milagronkunata, chaninchayninkunata yuyariychis, 13 qankuna Diospa kamachin Israelpa mirayninkuna, Señor Diospa akllakusqan Jacobpa churinkuna. 14 Paymi Diosninchis Señor Diosqa, paymi kay pachantin kamachiqqa. 15 Wiñaypaq rimanakuyninta yuyaychis, waranqa miraypaq kamachikusqan simitapas yuyaychis, 16 Abrahamwan rimanakusqanta yuyaychis, Isaacman jurasqanta yuyaychis. 17 Chaytan Señor Diosqa Jacobpaq unancharqan, Israelpaq wiñay rimanakuyta churaspa nirqan: 18 Qanmanmi qosqayki Canaán hallp'ata, chaymi kanqa herenciaykichis, nispa. 19 Paykunaqa pisi runakunallan karqanku, wak llaqtayoq hinan chay hallp'api pisilla karqanku. 20 Huk suyumanta huk suyumanmi purirqanku, huk llaqtamanta huk llaqtamanmi rirqanku. 21 Señor Diosqa manan piqpa sarunchanantapas munarqanchu, paykuna hawan reykunata anyaspa nirqan: 22 Akllakusqaykunataqa aman llamiykunkichischu, profetaykunataqa aman imanankichispaschu, nispa. 23 Llapan kay pacha, Señor Diosman takiychis, qespichiwasqanchista sapa p'unchay willaychis. 24 Qhapaq-atiyninta runakunaman willaychis, musphana ruwasqankunatapas llapan llaqtakunaman willaychis. 25 Hatunmi Señor Diosqa, yupaychana hinapuni, llapan dioskunamanta aswan manchana. 26 Llaqtakunaq llapan diosninqa idolokunan, Señor Diosmi ichaqa hanaq pacha kamaq. 27 Paytaqa lliphlli-kaywan manchana-atiywanmi muyuykun, wasintaqa atiywan kusikuywanmi hunt'aykun. 28 Llapa suyu ayllukuna, Señor Diosta niychis: ¡Qanmi qhapaqqa atiyniyoqqa kanki! 29 ¡Sutiykiqa hatunchasqan! nispa. Ñawpaqenman asuykuychis ofrendakuna aparisqa, ch'uya p'achantin Señor Diosman qonqoriykukuychis. 30 Kay pacha runakuna, Señor Diospa ñawpaqenpi khatatataychis. Teqsimuyuqa allin takyachisqan, manataqmi kuyurinmanchu. 31 Hanaq pachapas kusikuchun, kay pachapas q'ochukuchun, suyukunamanpas paykuna willarichun: ¡Señor Diosmi kamachikushan! nispa. 32 ¡Lamar-qocha qaparichun, llapan chaypi kaqkunapas! ¡Campokuna kusikuchun, llapan chaypi kaqkunapas! 33 Sach'a-sach'api mallkikunan takinqaku, Señor Diospa ñawpaqenpin kusikuymanta takinqaku, Señor Diosmi hamushan kay pachata kamachinanpaq. 34 Señor Diosta yupaychaychis, payqa allinmi, munakuyninqa mana tukukuqmi. 35 Waqyakuychis: ¡Qespichiq Diosnillayku, qespichiwayku! Huñuykuwayku, hinaspa suyukunamanta qespichiwayku ch'uya sutiykita hatunchanaykupaq, q'ochukuspayku qanta yupaychanaykupaq, nispaykichis. 36 Wiñaymanta wiñaykama saminchasqa kachun Israelpa Diosnin Señorqa, nispa. Hinan llapan runakuna nirqanku: –¡Amén! ¡Señor Diosqa yupaychasqa kachun! nispanku. 37 Davidmi Asafta llank'aq-masinkunatawan saqerqan Señor Diospa rimanakuynin arca qayllapi tukuy tiempo servinankupaq, sapa p'unchay imaynatachus ruwanankuta hina. 38 Saqellarqantaq Obed-edomta soqta chunka pusaqniyoq llank'aq-masinkunatawan paykunata yanapanankupaq. Jedutunpa churin Obed-edomqa Hosapiwanmi punku qhawaq karqanku. 39 Sacerdote Sadoctataq llank'aqmasin sacerdotekunatawan saqerqan Gabaonpi yupaychana cheqaspi Señor Diospa karpan qayllapi. 40 Paykunan Señor Diosman ruphachina sacrificiota tukuy tiempo tutamantapas tardepas haywananku karqan ruphachina altar patapi, Señor Diospa Israelta tukuy kamachisqan qelqaman hina. 41 Paykunawanmi karqan Hemanpas Jedutunpas Señor Diosta yupaychanapaq wakin sutinmantakama akllasqakunapas. Paykunaqa Señor Diosta yupaycharqanku wiñay munakuyninmantan. 42 Hemanpiwan Jedutunpiwanmi cornetata, platillotawan tocarqanku, yupaychaykunata takinapaq wakin tocanakunatawan. Jedutunpa churinkunaqa punku qhawaqmi karqanku. 43 Chay qhepatataq llapa runakuna sapanka wasinkuta ripurqanku, Davidpas ripullarqantaq familianta saminchananpaq.
