1 Crónicas 14

1Tiro llaqta rey Hirammi Davidman willaqkunata kacharqan, hinallataq rumi thupaqkunata, k'ullu llaqllaqkunatapas. Paykunan cedro kurkukunata aparqanku Davidpaq wasita sayarichinankupaq. 2Hinan Davidqa yacharqan Israel suyupi kamachikuyninta Señor Diospa takyachisqanta, llaqtanta munakuspa suyuntapas hatunyachisqantawan. 3Jerusalenpitaq Davidqa wak warmikunawan casarakurqan, hinaspan churikunata ususikunata astawan churiyarqan. 4Sutinkunan kaykuna karqan: Samúa, Sobab, Natán, Salomón, 5Ibhar, Elishúa, Elpelet, 6Noga, Nefeg, Jafía, 7Elisama, Beeliada, Elifeletpiwan. 8Filistea soldadokunataq Israel suyupi Davidta reypaq aceitewan hawisqankuta yachaspa llapanku wicharirqanku Davidta hap'inankupaq. Chayta yacharqospataq Davidqa paykuna contra maqanakuq lloqsirqan. 9Filistea soldadokunataq rispanku, Refaim wayq'oman ch'eqeykurqanku. 10Chaymi Davidqa Señor Diosta tapurqan: –¿Filistea soldadokunawan maqanakuq riymanchu? ¿Atipachiwankimanchu paykunata? nispa. Hinan Señor Diosqa nirqan: –Arí, riy, ñoqan atipachisqayki, nispa. 11Chaymi Davidqa Baal-perazimman rirqan, hinaspa chaypi Filistea soldadokunata atipaspa nirqan: Señor Diosmi awqaykunata ñawpaqeypi mayu llimp'ay hinaraq qhochurparin, nispa. Chaymi chay cheqasta Baal-perazim nispa suticharqanku. 12Filistea soldadokunaqa idolonkutapas chaymanmi wikch'upurqanku, hinan Davidqa soldadonkunata kamachirqan ruphachinankupaq. 13Wakmanta rispankutaq Filistea soldadokunaqa Refaim wayq'oman ch'eqeykullarqankutaq. 14Chaymi Davidqa Señor Diosta tapullarqantaq, hinan kutichirqan: –Ama paykunawan maqanakuq cheqanta riychu, aswanpas qhepankuta muyuykarqamuy, hinaspa bálsamo sach'a-sach'api tinkunki. 15Bálsamo sach'akuna patapi chhaqchaqeqta uyarispaykitaq, usqhaylla maqanakuq phawarinki, ñoqan chay rato ñawpaqeykita lloqsisaq Filistea soldadokunata atipanaypaq, nispa. 16Davidtaq Diospa kamachisqanta hina ruwarqan, hinan Filistea soldadokunata Gabaonmanta Gezerkama qatispa wañuchirqanku. 17Tukuy suyukunapin Davidpa mentasqa kasqanta uyarirqanku, Señor Diosmi Davidwan manchachirqan llapan suyukunata.

will be added

X\