1 Crónicas 13

1Chay qhepatataq Davidqa waranqa soldadoq umallinkunawan, pachak soldadoq umallinkunapiwan rimarqan. 2Hinaspa llapan huñuykusqa Israel runakunata nirqan: –Allinchus qankunaman rikch'akusunkichis, Diosninchis Señor Diospa munaynintaqchus kanmanpas chayqa, Israel suyuntinpi wakin wawqenchiskunaman willaqkunata kachasun, hinallataq llaqtankupi tiyaq sacerdotekunamanpas, Leví runakunamanpas. Ahinapin llapanku ñoqanchiswan huñukunqaku. 3Chaymantataq Diosninchispa arcanta kayman apakampusun, rey Saulpa tiemponmantañan arcamanta mana yuyarinchischu, nispa. 4Hinan llapa huñuykusqa runakuna: –Arí, ahinata ruwasun, nirqanku, paykunaman allin rikch'akusqanrayku. 5Chaymi Davidqa Egipto suyupi kaq Sihor mayumanta Hamat Q'asakama tiyaq llapan Israel runakunata huñuykurqan, Quiriat-jearimmanta Diospa arcanta apanankupaq. 6Hinaspan Davidqa rirqan llapan Israel runakunapiwan Judapi kashaq Quiriat-jearim nisqa Baala llaqtata, Señor Diospa arcanta chay llaqtamanta apanankupaq. Chay arcaqa Señor Diospa sutinwan sutichasqan karqan, paymi querubinkuna chawpipi tiyashan. 7Hinan Abinadabpa wasinmanta Diospa arcanta aparqanku huk mosoq carretapi. Uzawan Ahiowantaq carretata puriysirqanku. 8Davidtaq llapan Israel runakunapiwan Diospa ñawpaqenpi tukuy kallpawan takispa tusurqanku, hinataq tocarqanku arpata, tawtinkuta, tinyata, platillota, cornetatawan. 9Quidonpa eranman chayaqtinkutaq, torokuna carretata urmachiyta munaqtin, Uzaqa arcata makinwan llamiykuspa sayaykachirqan. 10Hinan Señor Diosqa sinchita Uzapaq phiñakurqan arcata makinwan hap'iykusqanmanta, chaymi Uzata muchuchirqan, kaq ratotaq Diospa arcan qayllapi wañusqa wikch'ukurqan. 11Davidtaq phiñakurqan Uzata Señor Diospa wañuchisqanmanta, chaymi haqay p'unchaymanta chay cheqasta “Perez-Uza” nispa suticharqanku. 12Chay p'unchaymi Davidqa Diosta manchakuspa nirqan: Chhaynaqa, ¿imaynatan Diospa arcanta wasiyman apasaq? nispa. 13Chayraykun payqa Diospa arcanta Jerusalenman mana aparqanchu, aswanpas Gat llaqtamanta Obed-edompa wasinman apachirqan. 14Chaypin Diospa arcanqa kinsa killa karqan, Señor Diostaq Obed-edomta familiantapas tukuy kaqninkunatapas samincharqan.

will be added

X\