1 Crónicas 11

1Llapan Israel runakunan Davidman Hebronta hamurqanku, hinaspan nirqanku: –Ñoqaykuqa yawarniykin cuerpoykin kayku. 2Saúl kamachikushaqtinraqmi qanqa maqanakuypi Israelpa soldadonkunaq umallin karqanki. Diosninchis Señor Diospas nirqasunkin: Qanmi Israel llaqtayta michinkipas kamachinkipas, nispa. 3Ahinatan Israelpi llapan kurak runakuna rey Davidman Hebronta hamurqanku, chaypin reyqa paykunawan Señor Diospa ñawpaqenpi rimanakurqan. Hinan Davidta Israelpi rey kananpaq aceitewan hawirqanku, Señor Diospa siminta Samuelpa willasqanman hina. 4Chay qhepatataq rey Davidqa llapan Israel runakunapiwan Jebus nisqa Jerusalenta rirqanku. Chaypi tiyaq Jebus runakunataq 5Davidta nirqanku: –Manan qanqa haykumuyta atiwaqchu, nispa. Davidtaq ichaqa Sión pukarata munaychakurqan, chaymi Davidpa Llaqtan nisqa kapurqan. 6Davidmi nisqa: Pichus ñawpaqta Jebus runakunaman phawaykuspa wañuchinqa chaytan umalli qollanata churasaq, nispa. Sarviaq churin Joabtaq ñawpaqta phawaykurqan, chaymi payta umallita churarqan. 7Davidtaq Sión pukarapi tiyarqan, chaymi chay pukarata Davidpa Llaqtan nispa suticharqanku. 8Hinan Davidqa pukaraq muyuriqninpi llaqtata sayarichirqan p'ukru hunt'achisqa cheqasmanta muyuriq perqakama, Joabtaq wakin llaqtata allicharqan. 9Tukuy-atiyniyoq Señor Diosmi Davidwan kasharqan, chaymi Davidqa astawanpuni kallpachakusharqan. 10Davidpa mentasqa soldadonkunaq umallinkunapiwan llapan Israel runakunapiwanmi rey kananpaq Davidta yanaparqanku, hinallataq kamachikuynin Israel suyupi takyasqa kananpaq yanaparqanku, Señor Diospa nisqanman hina. 11Kaykunan chay mentasqa soldadokuna karqan: Hacmonimanta Jasobeammi kinsantin umallikunaq qollanan karqan, paymi huk maqanakuypi kinsa pachak soldadokunata lanzanwan wañurqachirqan. 12Ahoh ayllumanta Dodoq churin Eleazar, kinsantin umalli qharikunamanta iskaykaq karqan. 13Chay Eleazarmi Davidwan kuska kasharqan Pasdaminpi Filistea soldadokuna chaypi maqanakunanpaq huñukushaqtin. Israel soldadokuna Filistea soldadokunamanta 14ayqeshasqan cheqaspitaq cebada chakra karqan, hinan Eleazarqa soldadonkunapiwan chakra chawpipi sayaykuspa tupapakurqanku. Hinaspataq Filistea soldadokunata atiparqanku, ahinatan Señor Diosqa allintapuni atipachirqan. 15Kinsa chunka umallikunamanta kinsa umallikunan Adulam qaqa t'oqo qaylla qaqata Davidman uraykurqanku, Filistea soldadokunataq karpakuspa Refaim wayq'opi kasharqanku. 16Davidqa pukarapin kasharqan, Filistea soldadokuna Belenpi kashaqtin. 17Hinan Davidqa anchata ch'akichikuspa nirqan: –¡Ayyha! ¡Pillapas ukyaykachiwanman Belén llaqta punku p'uytu unuta! nispa. 18Chaymi kinsantin qhari soldadokuna Filistea soldadokunata tanqarparispa karpa-karpankuman haykurqorqanku, hinaspa llaqta punku p'uytumanta unuta horqomuspanku Davidman aparqanku. Paytaq ichaqa mana ukyayta munarqanchu, aswanpas Señor Diospaq ofrendata hina hich'aspa nirqan: 19¡Amapuni Señor Diospas munachunchu kay unu ukyanayta! Kay qharikunaq yawarnintapas ukyayman hinachá kanman, paykunaqa wañuyta mana manchaspan unuta apamuwarqanku, nispa. Chaymi mana ukyayta munarqanchu. Chaytan ruwarqan kinsantin umalli qharikuna. 20Joabpa wawqen Abisaitaq kinsa chunka qharikunaq umallin karqan. Paymi huk kutin kinsa pachak soldadokunata lanzanwan wañurqachirqan, chaymi paypas kinsa umalli qharikuna hinallataq mentasqa karqan, 21ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqa kaspan paykunaq umallin kapurqan. 22Cabseel llaqtamanta Joiadaq churin Benaiasmi allin qhari kallarqantaq, paymi musphanakunata ruwarqan. Moabmanta maqanakuypi mentasqa iskay qharikunata wañuchirqan. Hinallataq huk p'unchay rit'ishaqtin, t'oqoman haykuspa huk leonta wañuchirqan. 23Iskay metro kuskannin sayayniyoq Egipto runatapas wañuchillarqantaq. Chay Egipto runaqa bayeta k'uyuna hina rakhu lanzayoqmi karqan, Benaiataq ichaqa maqana k'aspilla hap'intin asuykurqan. Hinaspataq Egipto runaq lanzanta makinmanta qechurqospa chay kikin lanzanwan wañurqachirqan. 24Chaytan ruwarqan Joiadaq churin Benaía, chaymi paypas kinsa umalli qharikunawan kuska mentasqallataq karqan, 25ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqan karqan. Hinan Davidqa waqaychaqnin guardiakunaq umallinta churarqan. 26Kaykunan allin qhari soldadokuna karqan: Joabpa wawqen Asael, Belenmanta Dodoq churin Elhanán, 27Harodmanta Samot, Pelonmanta Heles, 28Tecoamanta Iquespa churin Ira, Anatotmanta Abiezer, 29Husamanta Sibecai, Ahohmanta Ilai, 30Netofamanta Maharai, Netofamanta Baanaq churin Heled, 31Benjamín ayllumanta Gabaa llaqtamanta Ribaipa churin Itai, Piratonmanta Benaía, 32Gaas k'aha-k'ahamanta Hurai, Arbatmanta Abiel, 33Bahurimmanta Azmavet, Saalbonmanta Eliaba, 34Gizonmanta Hasempa churinkuna, Ararmanta Sageq churin Jonatán, 35Ararmanta Sacarpa churin Ahiam, Urpa churin Elefal, 36Mequeratmanta Hefer, Pelonmanta, Ahías, 37Carmelmanta Hezro, Ezbaipa churin Naarai, 38Natanpa wawqen Joel, Hagriq churin Mebhar, 39Amonmanta Selec, Sarviaq churin Joabpa arma apaysiqnin Beerotmanta Naharai, 40Itrinmanta Ira, Garetpiwan, 41Het runa Urías, Ahlaipa churin Zabad, 42Rubén ayllumanta Sizaq churin Adina kinsa chunka runankunapiwan (payqa Rubén aylluq umallinmi karqan), 43Maacaq churin Hanán, Mitnimanta Josafat, 44Astarotmanta Uzías, Aroermanta Hotampa churinkuna Samapiwan Jehielpiwan, 45Simriq churin Jediael, Tizmanta wawqen Johapiwan, 46Mahavamanta Eliel, Elnaanpa churinkuna Jerebaipiwan Josaviapiwan, Moabmanta Itma, 47Eliel, Obed, Medobamanta Jaasielpiwan.

will be added

X\