APOCALIPSIS 9

1Tigre' uro' ángel xuch'awsaj u trompeta. Chanim xinwil jun ángel pcha ca'y jun ch'mil che xtz'ak lo cho rcaj pwi' ruwach ulew. Che re xya' wi wa rlawe rech uchi wa rjul eku'nlaj c'olbal che c'ot uxe'. 2Re jampa xutor uchi rjul rech eku'nlaj c'olbal, xp'ke' lo rsib chpan rjul, pcha u sibal jun nimlaj horno. Xel lo rsib pjul xuban eku'n che r'ij jnan ruc' chwach rcaj congan xuban 'ek' rmal. 3Chpan wa rsib xi'el lo inmak tak rsac', xibe cho injel ruwach ulew. Xya chque quicban c'ax chque runak jela' pcha c'ax cuban uxc'utje'. 4Xtak ubixic chque che xa micban c'ax che tak 'yes che tquil chwach ulew, ni chque jun che', ni micban c'ax che rax tak tico'n. Xiw xya' ctakquil chque che quicban c'ax chque runak che cjont quetal chwach qui jlon che cu'alajsaj che i rech Dios. 5Xa xyat chque rsac' che quiccamsaj runak. Xiw xya chque rque quicban jo chque rech job ic'. Are rc'ax quicbno jela' pcha cuban uxc'utje' jampa quiuti' runak. 6Chpan la r'ij, jampa jela' quicrak unak cmal tak sac', que ccaj wet quiccam chanim. Quictzcuj na rcamnical ruc', xa are rcamnical cusach rib chicwach. 7Are tak sac' jnan ruc' pcha rilic tak quij che cyujban lo quib che ubanic rch'oj. C'o tak pcha u mod corona picjlon chicjujnal che 'an pwak. Are qui plaj jela' pcha ca'y qui plaj runak. 8Are cwi' tak sac' jela' pcha cwi' rixkib. Are cware jela' pcha cware tak coj. 9Quicjon jun to'bal que cho cc'ux che pcha ca'y tak ch'ich'. Co quijmum u pan cxic', jela' pcha quijmum cpan inq'uiaj carwaj che cch'aren quij jampa congan quixucpnic che ubanic ch'oj. 10Are tak sac' c'o c'je' jela' pcha c'je' inmak tak uxc'utje', q'uixrij ch'ut uwi' u tza'n c'je'. Iya'on ccho'ab c'je' che ubanic c'ax chque runak rech job ic' uwach. 11Are tak sac' c'o jun unmal chque. Re la rángel rjaw rjul rech 'ek'laj c'olbal, re c'o picwi' rsac' pcha jun unmal 'atbal tzij chque. Are u be' rángel Abadón pcch'abal i aj Israel. Are u be' Apolión pcch'abal aj Griegos, are craj cubij pktzij oj: Aj camsnel. 12Jela' ubnon are nabe c'ax quic'wac'. Quil chna c'o quieb chic c'ax quipetec jampa ic'awnak chcan wajun nabe. 13Tigre' ruwak ángel xuch'awsaj u trompeta. Xinta jun ch'abal xel lo chque u xc'ut ruc'a' rporbal 'a' pon che utquel 'an pwak che c'o chwach Dios. 14Are wajun xch'awac xubij che ruwak ángel che rec'an u trompeta: “¡Chitz'akpij wa riquijab ángeles che iximtlic chuchi' rnimlaj ja' Éufrates!” xcha'. 15Jela' xubno xiturtjec wa riquijab ángeles che ucamsxic ya mer pinq'uiaj chque runak. Yujbanch lo ujer wa riquijab ángeles che are hora wari', are 'ij wari', che are ic' wari' jela' are jnab wari' rech jela' quicbno. 16In xinto nicpa' achjab aj bnol ch'oj i c'olec che quibe chquij tak quij. I ejlan i quieb cient millón chque quinjel. 17Jela' xubno xinwil cwach rquij jampa xc'ut quib chinwach chpan uchic'. Chin la' ic'ul chquij, quicjon ch'ich' tak quetz'iak che uto'ic uwach cc'ux. Are rch'ich' c'olec are quiak pcha r'a', c'o are rax pcha rcaj, ruc' 'an pcha rmar'ab. Are qui jlon rquij jela' pcha ca'y qui jlon rcoj. Chpan cchi' quel lo 'a', ruc' sib, jela' ruc' azufre. 18Xicam ya mer pinq'uiaj chque runak cho ruwach ulew cmal wa rioxib c'ax che quel lo picchi' wa rquij. Are wa rioxib c'axclil are 'a', ruc' sib, jela' ruc' azufre. 19Rmal la' che c'o ccho'ab wa rquij i c'o picchi' jnan ruc' pic'je'. Are u wi' c'je' tak quij jela' pcha qui jlon tak cmatz. Ruc' wari' quicban wi rc'ax chque runak pcha c'ax quiquirko jampa quiuti'o cmal cmatz. 20Are wa rjle' unak che xicanjec, che xicam taj cmal wa rc'ax, que xicyat can ubanic itzel tak chac quicbno. Xcyat can uyiquic qui 'ij wa ritzel tak u xlabal ruc' tak cdios che xa quibnon cmal qui 'ab runak ruc' 'an pwak, ruc' sak pwak, o ruc' ch'ich' rech bronce, ruc' abaj jela' ruc' rche'. Are wa rcdios xicbno, xa quicon taj quica'yec, ni quicta taj, ni quibin taj. 21Wa runak xicanjec que xicyat can ubanic wa ritzel tak chac. Xictakej ubanic camsnic, xicban 'itz che ubanic c'ax chque rjil qui tz'kat. Xa jnan xicban itzel tak reynic su curij cch'obnic che aj uwach ulew, xicban ela'.

will be added

X\