1 Chpan tak wa r'ij, are u tijon a Jesús xikeb ruc' xicta che: “¿Chin chke oj nim u 'ij chpan a taknic aj rcaj che cayujba' na cho ruwach ulew?” xicha che. 2 Tigre' a Jesús xusq'uij jun alaj ac'a, xutac'ba' chicwach. 3 Xubij: “Kas tzij quinbij chiwe, ustaj che quinmartsaj iwib. Ix we ix quijalt uwach i ch'obnic, we quibant ix pcha wajun alaj ac'a che cuyict u 'ij chbil rib, quixcon taj quixuc chpan in taknic in che aj rcaj. 4 Jela' ubnon che are lajun chiwe che mas nim u 'ij chpan in taknic in aj rcaj, are lajun che cuyict u 'ij, jela' pcha wajun alaj ac'a che cubant nim che rib. 5 Chin jun chiwe che cuya su rajawxic che jun chic che jela' mas maxo pcha wajun alaj ac'a, jnan ruc' chwe in xuban utzil. 6 “We jun chiwe che cuc'am cbe inq'uiaj che pcha tak ac'lab mas i maxo cmod, che i cjonnak chwe in, we rmal lajun aj c'mol cbe quitz'ak chpan cmac, mas c'ax c'ajsbal uwach curak na lajun che xuc'am cbe chicwach. Utz na wet cuq'uiak bic rib chpan rplo ruc' jun ca' cxim bic pukul rech kaj chuxe' rja' rech ccam juntir. 7 ¡Ust quinwlo che c'o su racle'n cho ruwach ulew che quiutakch'ej che ubanic cmac runak! Am'al c'o su quiutakch'ej che ubanic mac, xa to'ob uwach lajun chin rmal quitz'ak la inq'uiaj chpan cmac. 8 “Rmal la', we rmal jun a 'ab o we rmal jun awkan catutz'ak chpan mac, utz chwesaj bic chicka' apnak jela'. Utz na che xiw jun a 'ab, che xiw jun awkan c'olec che carak junelic a c'aslemal ruc' Dios chwach catbe chpan junelic 'a' che c'ot u q'uisic che tz'kat a bkil catbec. 9 Jela' ubnon we rmal jun a bawach catutz'ak chpan mac, utz chwesaj bic, naj chicka' apnak jela'. Utz na che xajun a bawach c'olec che carak junelic a c'aslemal chwach catbe chpan junelic 'a' rech xbalba che tz'kat a bkil catbec. 10 “Xa miwetzlaj cwach tak aj cojnel chwe che mas i maxo jela' pcha tak alaj tak ac'lab. Quinbij chiwe che c'o ángeles prcaj aj chejnel chque che am'al i c'o chwach in Ta' prcaj rech quicbij che we c'o c'ax quiquirko cmal inq'uiaj chic. 11 (In u C'jol Dios che xinux unak are in petnak che cc'olic runak che i sachnak canak chpan cmac.) 12 “¿Su quibij ix? We c'o jun achi c'o jun cient u chij. We csach can jun chque, ¿su cubno? Are wa' cubno, cuya can wa rjmuch' lajuj ruc' beljeb chpan ccral, tigre' cbe che utzucxic wajun che sachnak canak. 13 We xurko, kas tzij quinbij, che mas quictic ruc' wajun che xurko chicwach la rjmuch' lajuj ruc' beljeb che uya'onch can chpan ccral. 14 Jela' ubnon i Ta' ix c'o prcaj craj taj che csach can uwach jun chque wa rtak aj cojnel chwe, che mas i maxo jela' pcha u mod jun alaj ac'a. 15 “We jun awechlal cuban jun c'ax chawe, utz catbe ruc' cabij che xiw ix quieb ruc'. We cucoj a tzij tigre' jnan quirak 'axbal chixo'l. 16 We cuta taj su cabij che, utz quiac'am bic i quieb chic awuc' rech quicta que che re craj taj quiyujba' iwib chixo'l ruc'. 17 We craj taj cuta u be i tzij su quibij che, tigre' utz cabij chque tak quinmal chicxo'l rajcojnel. We cuta taj su quicbij che, tigre' jela' quiban che pcha jun aj cojnel taj. C'ot re chiwe, ni c'ot re ruc' Dios quiban che pcha wet jun aj tol alcawal petnak pucuent Roma. 18 “Kas tzij quinbij chiwe, ix ix in tijon are su quibij ix che utz cuban jun chixo'l ural cho ruwach ulew, jela' utz quel chwach Dios prcaj. Jela' jnan su quibij ix cuban jun chixo'l ural cho ruwach ulew che ustaj, jela' ustaj quel chwach Dios prcaj. 19 “Jewa' quinbij chiwe: We i c'o quieb chiwe ix ix in tijon che cuban jnan i ch'obnic chrij jun c'ax petnak chicxo'l rajcojnel, injel su quita che in Ta' c'o prcaj jampa quiban ch'awen ruc', cya'taj na chiwe. 20 Jela' cubno rmal la' che nu c'we i quieb oxib quimlon quib chpan in be' in che xa jnan cch'obnic, chla' in c'we in chicxo'l,” xcha chque. 21 Tigre' xkeb a Lu' ruc' a Jesús, xuta che: “Uwjaw, ¿nicpa' bwelt quinsach u mac wechlal che cuban jun c'ax chwe? ¿La cubno we quincuy u mac okub bwelt?” xcha che. 22 A Jesús xutzlij ubixic che: “Jela' taj pcha cabij a Lu'. In quinbij che rajawxic cacuy u mac injel bwelt che cuban mac chawe mas tne' copan okub bwelt che oxc'al lajuj. 23 “Jela' ubnon che jun che cucuyt u mac rechlal xa jnan curko pcha lajun aj chac chpan wa rc'ambal n'oj che cubij: U taknic Dios prcaj chpan quenma' runak, xa jnan ruc' jun unmal 'atbal tzij che xraj wet quictoj cc'as wa rajchac che i c'o ruc'. 24 Jampa xumaj uta'ic cc'as, pre xicc'am lak jun aj chac che q'ui u c'as c'olec, mas jun millón u c'as. 25 Rajchac xa c'ot pwak ruc' rech cutoj u c'as. Rmal la' are u patrón xutak cq'uixic lajun rich'il'an rixkil cuc' relc'wal jnan ruc' injel su c'o pu'ab wajun aj chac, rech are u patrón cuch'ac jbe' pwak chquij. 26 Jampa jela' xuto wa rajchac xixque' chwach u patrón, xuboch'ej u jlon, xubij che: 'Uwjaw, cawi'ej na jbe', quintoj na chawe injel in c'as awuc',' xcha che. 27 U patrón xel u c'ux che rajchac, xucuy u mac ruc' ruc'as. Xubij che che rajawxicxtaj cutoj u c'as ruc', re xutz'akpij bic. 28 “Wa rajchac jampa xel bic chwach, chanim xurak jun chic rach tak aj chac che c'o jbe' u c'as ruc' re. Xuch'ip rach aj chac pukul, xupitz'ej, xubij che, 'At ela'om, ¡chatjo rac'as wuc' chanim!' xcha che. 29 Tigre' rach aj chac xixque' chwach rich'il xubij che ruc' bochnic: 'Cawi'ej na jbe', quintoj na chawe injel,' xcha che. 30 Rich'il xraj taj xucuy u mac ruc' u c'as. Xuc'am bic pcarsa, te na cutoj injel u c'as ruc' tigre' quel bic. 31 Wa rinq'uiaj chic aj chac jampa xiclo su xbantjec, mas c'ax xicna pquenma'. Xibe che ubixic che cpatrón injel wari' su xbantjec. 32 Tigre' cpatrón xusq'uij wa rnabe aj chac xubij che chpan u cho'ab riwal: '¡At itzel aj chac! In xatincyu ruc' injel a c'as wuc' che catojxtaj rmal che xata cuybal a mac chwe. 33 At cumaj chawe che xa jnan quel a c'ux che awach aj chac jela' pcha xinban in chawe xel in c'ux chawe,' xcha che. 34 Wa rupatrón congan xpe riwal xutak uc'ajsxic uwach cmal aj bnol tak c'ax rech cutoj injel u c'as ruc',” xcha a Jesús chque. 35 Tigre' a Jesús xuq'uis ubixic wa rc'ambal n'oj ruc' wa rtzij, xubij: “Jela' jnan quirak na c'ax ix rmal in Ta' c'o prcaj we ix quiwaj taj quisach uwach cmac iwechlal ruc' injel iwenma',” xcha chque.
