ZACARÍAS 2

1Mosqoypi jina ujtawan rikullarqanitaj uj runata midina q'aytuta jap'ishajta. 2Chantá chay runata tapurerqani: Maymantaj rishanki? nispa. Paytaj kutichiwarqa: Jerusalén llajtata midej rishani, yachanaypaj sayt'unman, anchonman ima mashkhachus kasqanta, nispa. 3Chantá noqawan parlasharqa, chay angelqa riporqa, waj angeltaj payta taripaj jamorqa, 4nerqataj: Usqhayta chay waynaman nimuy: Watejmanta Jerusalenpi tiyakullanqankutaj may chhika runas, nispa. 5Tata Diosqa nin: Chaywampis, Noqa kikiy sayaykusaj Jerusalenpa muyuynimpi nina perqa jina, kikin llajta chawpipitaj jatun kayniypa k'anchayninta rikuchisaj, nispa nin Tata Diosqa. 6Tata Diosqa nillantaj: Noqamin qankunata tukuynejman ch'eqeracherqaykichej. Kunantajrí niykichej: Usqhayta ayqekuychej jaqay wichaynejpi kaj nacionmanta. Maymanchus presos apasqa karqankichej, chay Babiloniamanta ayqeychej, pikunachus ñawpajta Sionpi tiyakojkuna. Noqa Tata Diosmin chayta nini. 8Tukuy Atiyniyoj Tata Diosqa kayta willanaypaj kachamuwan, tukuy imasniykichejta ch'uskirasorqachej, chay nacionespa contrankupi: Pillapis aylluyta llankhaykojqa ñawi papaytapis llankhaykunman jina. 9Chayrayku Noqa kikiy contrankuta maqanakusaj, kikin wata runasnillankutaj paykunata ch'uskiranankuta nisaj. Ajinamanta yachankichej Tukuy Atiyniyoj Tata Dios kachamuwasqanta. 10Jerusalenpi tiyakojkuna, kusiywan takiychej, imaraykuchus qankuna ukhupi tiyakoj jamusaj. Ajinata nin Tata Diosqa. 11Chayta rikuspa, ashkha runas Tata Diosman chimpakamonqanku, Paytaj nenqa: Kay runasqa ayllullaytaj kanqanku. Noqataj kawsakusaj qankunawan khuska, nispa. Ajinamanta yachankichej Tukuy Atiyniyoj Tata Diosqa qankunaman kachamuwasqanta. 12Tata Diosqa watejmanta Judata jap'ikapullanqataj sumaj herenciampaj jina Paypaj t'aqasqa jallp'ampi. Jerusalentapis watejmanta Paypaj t'aqakonqa. 13Tukuy kay pachapi kajkuna ch'in kachunku Tata Diospa ñawpaqempi, imaraykuchus Payqa noqanchejman jamun may santo cheqamanta, maypichus tiyakun, chaymanta.

will be added

X\