1 Jaqay tiempopeqa, yaku juturi kicharisqa kanqa, Davidpa ayllumpa jinataj Jerusalenpi tiyakojkunaj millay ch'ichi juchasninku pichasqa kanankupaj. 2 Jaqay tiempopeqa, tukuy kay jallp'amanta lantispa sutisninkuta chinkachisaj, jinamanta manaña pipis chaykunamanta yuyarikunampaj. Jinallatataj profetasninkuta chay jallp'amanta chinkachisaj, chantá millay ch'ichi sonqoyojkunata, nispa nin Tata Diosqa. 3 Chaypacha, sichus pipis Diospa sutimpi payllamanta parlayta munanqa chayqa, payta kikin tatasnillantaj nenqanku: Qan wañunayki tiyan, imaraykuchus llullakuspalla ninki: Kayqa Tata Diospa nisqan, nispa. Chantá kikin tatasnillantaj t'ojsinawan payta wañuchenqanku, payllamanta Diospa sut'inchajnin ruwakusqanrayku. 4 Jaqay tiempopeqa, profetas kajkunapis mosqoypi jina rikusqankuta sut'inchayta p'enqakonqanku. Ni pipis, profetas churayta yachanku, chay qarasmanta ruwasqa p'achata churakonqachu pitapis ch'awkiyanampajqa. 5 Manachayqa sapa ujpis nenqa: Noqaqa mana profetachu kani, manachayqa llank'aj runalla. Wawamantapacha campopi llank'aj kani, nispa. 6 Sichus pipis payta taponqa: Chantá imanakorqankitaj cuerpoykipi chay nanasqas kanampaj? nispa chayqa, pay kutichenqa: Kawsaqesniypa wasinkupi kayta ruwawarqanku, nispa. 7 Tukuy Atiyniyoj Tata Diosqa nin: Espada, oqharikuy michejpa contrampi, pichus yanapawaj kajpa contrampi. Wañuchiy chay michejta ovejasniytaj ch'eqeranqanku, Noqapis juch'uy kaj corderospa contrallankupitaj kasaj. 8 Chay naciompi tiyakojkunamantaqa, kinsaman t'aqasqamanta iskay t'aqasqa jina wañonqanku. Kinsa kaj t'aqalla kawsayniyoj qhepakonqa, chay qhepakojkunataj ninawan probasqa kanqanku. Imaynatachus qolqe metalta ninapi ch'uwachanku, chayrí qorita ch'uwachanku, ajinata paykunata llimphuchasaj. Chaypacha paykunaqa sutiyta oqharenqanku Diosninkupaj rejsikapuwasqankurayku, Noqataj uyarisaj paykunata. Chantá paykunata nisaj: Aylluy kankichej, nispa, paykunataj kutichiwanqanku: Tata Diosqa Diosninchejpuni, nispa. Ajinataqa nin Tata Diosqa.
